السعادة هي ....

الرضا المطلق عن الحياة 

#أول_مرة_كريم_شانتيه 

حققوا أحلامكم في ولادكم

ما تظلميش البنت عشان عايزة تحققي احلامك 

ماما بتنبهني ما انجرفش مع روكي في أحلام الرياضة، ماما خايفة علي كوكو تجرب وشعرها يكرت وتعيا بسبب السباحة والجمباز. 

كوكو في أول مستوي 

ايه هي حدود اللي علينا فرضها علي ولادنا و ايه مساحات حرية الاختيار ؟ 

حضرت مناقشات كتيرة عن ضرورة فرض/إعطاء الحرية بالكامل من أول الهوايات الشخصية والرياضة لحد حرية المعتقد والأيديولوجيا 

تفرض علي ولادك اللي شايفاه أصح يملوا بيه وقتهم ولا تسيب لهم الحرية يعملوا ما بدالهم حتي لو كان النوم طول الوقت ؟ 

حصة الألعاب في مدرستي كانت عبارة عن تسكع في الحوش بلا هدف مع شلة البنات وحصة التدبير المنزلي كانت ملتقي النميمة الاول 

" انا و جوزي خريجي فنون تطبيقية وعارفة كويس أهمية ان ولادي يكون عندهم حرفة يدوية برة منظومة التعليم " واحدة صاحبتي فنانة بتحاول تعلمني كروشيه 

أنا بحاول أتعلم كروشيه وأنا عندي سبعة وعشرين سنة، التعليم مالوش سن بس لو كنت بدأت و انا عندي ١١ سنة كان حيبقي اسهل كتير، كفاية الوقت اللي بيضيع في فك العُقد اللي حسن بيعملها في الخيط 

نفسي افتكر حاجة مفيدة عملتها اثناء دراستي (غير الدراسة طبعا اللي كلنا عارفين انتهت علي ايه ) 

فرحتي الطفولية بغرزة كروشيه أو أربع لفات في التراك من غير ما نفسي ينقطع .. إنجازاتي البسيطة ...البسيطة أوي 

أنا مفتقدة مهارات حياتية كتيرة اوي عمالة احاول اتعلمها علي كبر وبحاول أعلمها لكوكو من الصغر لعلي أوفر لها وقت أو أحقق لها حلم ... أو تحققهولي 

أم في صالة الجمباز حاطة قدامها شنطة سفر وطفل بيتعلم المشي ، فهمت ان بناتها الاتنين في فرق جمباز و بتقعد يوميا من ٥-٧ ساعات تدريب بناتها جابوا ميداليات علي مستوي الجمهورية 

- ما بيزهقوش ؟ دا الجمباز الإيقاعي دا صعب اوي 

- هم اللي اختاروا يكملوا 

بعد سؤالها عن التعب والدراسة والتمارين و الأخ الأصغر وفخرها بيهم وفرحتهم بالميداليات وحياتها الاجتماعية المنتهية خارج حدود صالة الجمباز 

- انتو بدأتوا اصلا ليه ؟ ايه اللي شجعك ؟ 

هي بضحكة مكسوفة : مكنتش عايزاهم يطلعوا تخان زيي 

أمهم جات تحقق حلمها فإكتشفت لنا أبطال :) 

-ماما النهاردة عندي سباحة ولا جمباز ؟؟ 

- لا مفيش تمارين النهاردة يا كوكو 

-دبدبة في الارض- لااءاااا عايزة اروح النادي يا مامااااا 

حققوا أحلامكم في أولادكم طالما هم حبوا الحلم :)  

احنا في زمن الف**

محمد منير تعاقد مع عمرو مصطفي علي ألبومه الجديد. مصدومين ؟ ما هو نفس محمد منير اللي علمنا حب الوطن و صرخنا علي الليلة يا سمرا لما عروق رقبتنا نفرت و سابنا في ال ١٨ يوم ولا كأن أغانيه علي مدار ٣٠ سنة اللي فاتوا حرضتنا علي الثورة والحلم وطلع في الاخر وصولي 

أعلم بنتي إيه بالظبط و أنا وصلت لمرحلة بلا قناعات إلا قناعة التوحيد؟  

صلاح الدين مطلعش قائد عسكري عظيم وملهم، هرم سقارة طلع برة التاريخ و بقي مصطبة عملاها شركة مقاولات، الصحابة والخلافة الرشيدة مش مجتمع اليوتوبيا المفقودة ، مصر مش قلعة الوسطية ولا طول عمرها مجتمع متجانس، عزازيل حصلت بجد !  

حرب أكتوبر مجرد حركة عسكرية محدودة مرجعتش كل الأرض، من ثورات ربيع عربي لمحدش فاهم ايه اللي بيحصل في لبيا ولا سوريا لحد ما طلعت داعش و اليمن .. العالم بيتغير و حدوده بتتشكل تاني بعد ما قعدوا تلاتين سنة يغرسوا فينا ان الحدود شرف الأوطان. ثورة ولا مؤامرة وثورة ولا انقلاب.. مصدقتش ازاي أدعياء حملة الدين خصومتهم فُجر للدرجة ولا ازاي الإعلام الوطني وصل ناس لدرجة التهليل للقتل. 

أنا بحسد أمي و كل الجيل اللي قبلنا علي رسوخ قناعاتهم أيام ما ربونا، آراءهم الواثقة إيمانهم المطلق اطمئنان قلبهم نعمة 

خلخلة الأفكار من الأول شئ مُرهق جداً علي المستوي الذهني و النفسي، الطقوس والشعائر مهمة لسلامنا النفسي 

وخايفة علي رقية .. خايفة عليها تطلع مسخ مش مميزة الصح من الغلط و كل حاجة في المنطقة الرمادي اللي بتخليني اسمع مناقشات مهما كانت صامدة عقائديا و أقول في عقلي مين عارف 

انا مش عايزة بنتي تبقي نسوية وشخصيا

مختلفة مع معظم شطحات ثورة البنات بس في نفس الوقت لولا ثورة البنات مكناش شفنا الستات بياخدوا حقهم و بيضربوا الرجالة بالشلاليت عشان يخرجوا برة عربية الستات في المترو. 

أنا خايفة علي رقية من الصراع و النحت في الصخر و الشطحات اللي علي أقصي اليسار عشان تسّمع في أقصي اليمين و تعمل تأثير يجيبنا للنص 

لولا النغمة اللي طلعت بتاعة الراجل لازم يرضع و يغير و يطبخ و يكنس مكنش سمعنا واحد دي عمرو أديب بيصرخ في الفضائيات اوعي تشيل البنطلون طلقها أحسن و مكناش شفنا نماذج حكوا عن تجاربهم في تقسيم مهام البيت بشكل غير المتعارف عليه و مكناش بدأنا نُعيد تعريف معني البيت و مهامه و تقسيمها عشان مشروع البيت ينجح 

الستات اللي عملوا الحراك دا في الأول غالبا اتطلقوا محدش استحمل ثورتهم و دفعوا تمن الحركة و خلخلة التربة اللي بيعاد تشكيلها

الملحدين و صوتهم اللي علي هم اللي بينوا لنا انه لا مفر من مراجعة ما كنا نظنه قناعات لا جدال فيها 

احنا داخلين علي أيام سودا، سياسيا مفيش أمل ، مجتمعيا بنهرس في بعض لحد ما يبان لنا صاحب طب أربي البنت  علي ايه ؟ تبقي قوية ومتحركة ومترضاش بوضع شايفاه غير منطقي و ظالم مع ما سيترتب عليه من صراعات في الحياة الشخصية و في الأغلب فشل الحياة الأسرية ؟ طب اربيها انها تمشي أمورها وخلاص ؟ ماهو انا شخصيا مثال للأفكار الثورية السرية و تلات اربع أفكاري ما بقولهاش لحد عشان مش مستعدة أتحمل تمن النقاش و وجع الدماغ و اللخبطة، من الاخر ه أربي عيالي

وحشني زمن القناعات، أيام ما كنا واثقين اوي ان الاسلام هو الحل و ان حجابي فرض و ان بكار بكف رقيق و صغير وإن الأزهر قلعة الوسطية و ان تخلفنا مؤامرة صهيونية وان اللي غنوا الحلم العربي لسه مغنوش تسلم الأيادي 

الحج في المدارس

-تعالي يا كوكو شوفي الحجاج في التليفزيون علي جبل عرفات 

-اه طلعته في المدرسة 

ما شاء الله حيطلع لنا جيل كامل حج في المدارس وشرب مية زمزم من كولدير الحوش، مش قادرة احدد مشكلتي بالظبط مع مجسم الكعبة اللي مدرسة روكي عملته في إطار احتفالية الحج. عموما اللي اعرفه انه مش ابتداع مصري، حجاج ماليزيا بيعلموهم أركان الحج علي مجسم الاول قبل ما ينتقلوا للسعودية ودا له معني الحقيقة عشان ميضعوش وقت في تخبط و توهان وممارسات خاطئة. لكن ايه معني ألفف أطفال بالكاد مستوعبين الصلاة و الصيام حوالين مجسم و احكي لهم قصة صعبة الهضم و الفهم زي قصة سيدنا ابراهيم و الأضحية ؟ 

فيه آراء انه معقدهاش والعيال بتنبسط من غير ما تستوعب وبكرة يفهموا عادي. لو هم فاكرين ان الناس بتحج في المدرسة كمان سنتين تلاتة حيعرفوا ان الحج في مكة. بسطها تتبسط وبلاش زيادة التفكير والتعقيد في كل خطوة 

لما طرحت تساؤل صعوبة هضم الأطفال لقصة الأضحية علي مديرة الكي جي زغرت لي وبلهجة حاسمة قالت لي انهم بيقدموها بشكل مبسط ثم انها مذكورة في القرآن. مردتش بقي أتناقش انه مش كل ما هو مذكور في قران يستوعبه الأطفال بس مصطفي اقترح عليّ كنوع من الهزار السمج مع مدرسة رقية اني احفظها نحن غرابا عك 

مشكلتي الحقيقية بقي مع الشق التجاري للمسألة لما جيت أدور علي لبس الحجيج ، عبايات مطرزة و اسدالات مزركشة و جلاليب ب١٠٠ و ١٥٠ و ٢٠٠ ج 

المفروض اني اعلم بنتي فضيلة الحج و اروح اشتري عباية مطرزة ب ٢٠٠ ج عشان تتلبس لبسة واحدة و تترمي معا انا في تفريغ الأشياء من مضمونها و معانيها و تحويلها لمجرد طقوس حركة بدنية. 

بعد لف طويل اتناقشت مع صاحبة محل ان دي أسعار جنونية وكان ردها الحاسم انه محاولش في الفصال لأن لو مخدتهاش فيه ميت واحدة حتيجي تاخدها 

الإحرام بالذات كان امر من ربنا للحجاج بعدم الإسراف عشان الكل يبقوا عند رب الكعبة سواسية و ينسوا تماماً الفروق الطبقية و الاجتماعية اللي ما بينهم. مقدرتش أطاوع العبث السائد دا لأنه بيفرغ المعني من مضمونه حتي لو رقية مفهمتش و كتسجيل اعتراضي جبت لها ابسط جلابية صبياني سادة ملهاش اي خطوط قلت تحضر بيها الحفلة و تنفع اخوها بعد كدة لما ينزل يصلي مع باباه. 

والحمد لله اني عملت كدة لأن كوكو اصلا قفشت علي احتفالية الحج و مرديتش تطوف عشان جعانة... تخيلوا بقي فرستي لو كنت دفعت ٢٠٠ جنيه في عباية ما اتلبستش :)

كل سنة و أنتم طيبين 

كوكو و هي قافشة و جعانة :)  

عُدنا

محدش افتقدني ؟

 

مش عارفة اكتب، زهقانة جالي قفلة الكتابة أو أيا كان بس فجأة لقيت إن كوكو دخلت المدرسة و بقت في منظومة العملية التعليمية، حسن حيتم سنة الأسبوع دا، أنا يترجم إنجليزي عشان اتعلمه، محاولاتي المستمرة في ابعادحسوكي عن مية التواليت، مجاراة كوكو في اعتقادها انها من أهم تلات سباحين في مصر، الوحدة والغربة في قاهرة المعز ، الناس اللي ربنا بيبعتهم لي عشان يطبطبوا عليا، علاقات إنسانية جديدة، بحاول ابقي أم ناجحة و أفهم هم ليه بيقفشوا علي المدرسة عشان لسه مخلصوش الدرس الاول. جمهورية المعادي المستقلة ، المسافات ، الطرق ، الزحمة ، المترو ، اوتوبيس خط ١٠٠٠٩. الفويس مسيچ

اللي بقي حياتي، رقية بقي مشهد طبيعي اني عمالة أكلم نفسي في الموبايل و بناءا علي بقت بتكلم نفسها في المراية. رقية فاكرة ان اللي بيحفظ قرآن بيروح "الچيم" . وحسن بيحب يستربع جوا غسالة الأطباق، الثورة انهزمت و احنا انهزمنا و ادينا عايشين إلي أن يقضي الله أمرا كان مفعولا. صباح الخير 

رسالة إلي اللولو

عزيزي حسن 

ارحم أمي من الفرك، عارفة انك عايز تنزل تجري مش تزحف، روحك الطلقة اول ما بتشوف مكان مفتوح بتبقي خلاص سيبونييييي عايز اجرييي عايز اجرب كل حاجة ممكنة في العالم. 

أنا عارفة انك مبيهمكش تزحف علي ارض النادي، تجرب طعم النجيلة، تجري ورا النمل الفارسي ولو مسكته تاكله ... عارفة انك لا تبالي ولا تمانع و في الحقيقة كمان ولا أنا .. لكن المجتمع يمانع للأسف يابني مش مستوعبين روح الطبيعة الحرة اللي جوايا انا و انت و كل تلات دقايق أم متحمسة تيجي تزعق لي .. هي معاها حق طبعا الارض مش نضيفة بس انت بتفرك جامد و انا بدوخ من الهز و الفرك. طب أسيبك تنطلق ولا اعمل ليكم حادثة وانا سايقة بيك انت و أختك؟ 

أنا اسفة يابني احنا في مجتمع رجعي مكبل بالقيود و أمك ضعيفة النظرة او الانتقاد بيفسدوا يومها .. نفسي أسيبك تجري زي ما انت عايز و تحقق كل احلامك المدمرة و تسوي الهوايل 

بكل الحب، 

أمك 

بهجة غير مبررة

في ظل هجمة اكتئاب شديدة الوطأة حسن قرر ان هو دا الوقت المناسب عشان يحترف السقفة بيصحي عشر مرات بليل عشان يسقف، بيسقف و هو بيرضع، بيسقف لما يشوف صنية الأكل ، بيسقف و اللقمة جاية علي بُقه -قبل ما يتفها-، يسقف لما افتح التلاجة (انا تقريبا بجوّعه هههه)، الحماسة طبعا بقي كلها بعد كل عملية اخراج ، وسقفة حسن مصحوبة بأداء كوكو وراه وهي بتقول هيييه هييييه وانا بشطفه عالحوض ...

اداء حماسي مبالغ فيه مع واحدة فاقدة الأمل في الحياة 

أمنيات عيد الميلاد

وقت أكثر لنفسي يعني ساعة في اليوم كدة ورحلات حمام جماعية أقل ... كفاية تضامن بقي 

آه و يا رب أشتغل بقي :) 

أنا عندي أخت lovely

المشهد الأول 

بسوء تقدير مني حطيت حسن علي السرير ودخلت الحمام، بعدها بتلات دقايق سمعت صوت دبة علي الأرض وعياط حسن و كوكو بتجري ماماااا الحقي أسن وقع وأسمعها ترجع له 

ما تزعلس يا آسن 

ماما بتعمل بوبو يا آسن 

نناه بتقول عليه إي إي يا آسن 

أغني لك يا آسن ؟؟ 

ماما زمانها جاية  .. جاية بعد شوية معاها شنطة فيها بطة بتقول واط واط وااااااااااط 

المشهد التاني 

حسن لابس بيجاما كلها ورد بينك معبرا عن معاناة الأخ الأصغر لأخت، في إيده عروسة سوسو بيحاول يفهم ليه أخته شريكته في المكان اللي عايش فيه مصرة تحطها في بقه و بتدور وشه ناحيتها و هي عمالة ترقص علي الأغنية اللي عرفتها في شم النسيم من تلات أيام 

الدنيا عبيع و الجو بديع قفلي علي تل المواضيع قفل قفل قفل قفللللل  

المشهد التالت 

كوكوهاجمة علي حسن بكل جسمها و مادة بقها عشان تلطع علي خده بوسة -غالبا مبربرة- وفي آخر لحظة علي بُعد سنتيمترات من بقه تفتكر إننا بنبوسه من إيده وتحول المسار علي إيده "عشان معديش آسن" 

لطف حسن المتوقع مستقبلا راجع لكونه تربية أخته اللي عايشة -معظم الوقت- معاه في جو البنات البنات ألطف الكائنات 

 

أنا نوننة يا آسن

ماما أنا نوننة وااااء وااااء أنا نوننة 

كدة دا بالنسبة لكوكو الحجة المفحمة لرغباتها في تقليد حسن وطلباتها في العودة للرضاعةوالشيل والببرونة الخ الخ ... من رحمة ربنا علي أعصابي انها مش بتطالب بالعودة البامبرز الحمد لله 

ما علينا انا بستحمل و احتسب و ألبي طلباتها في سبيل حياة نفسية صحية وعلاقة سوية بأخوها و افتكر و أنا بجز علي سناني انه اللي بيفهم أهم من اللي مبيفهمش 

وكنت محتارة أمتي المفروض أوقفها واكتب صح أقولها انت الكبيرة أو سيبي أخوكي أو النهر اللي عامة بنشوفه في الفصل بين الأخوات الكبير والصغير 

حطيت خطوط عريضة متعلقة بالسلامة وعدم الأذية و دي بيتم العقاب عليها مش عشان هي الكبيرة و هو الصغير لكن عشان ممنوع أصلا حد يأذي أو يضرب حد أيا كان سنه 

وبعد التمثليات المتكررة انها التابتن (الكابتن) و بتدرب النونو علي الأومباز بطلت أتدخل إلا لما يعيط لأنه أولا ساعات كتيربتمرمطه ويضحك ويبقي زعيقي مالوش أي معني بالنسبة لها و تاني حاجة انها بتلعبه أومباز ١٥ مرة في اليوم مش معقول ازعق ١٥ مرة .. بقي اول ما يعيط أقول خلاص كفاية و أشيله من سكات 

مكتوب عليّ النكد ماهو كان ساكت وقاعد في حاله بس ازاي نسيب الولية اللي قاعدة دي تنعم بلحظات من الهدوء دا حتي يبقي منظر كوكو ايه قدام نفسها ؟ 

ما علينا المهم اني برضه مش عارفة صح اسيبها تقعد علي حجري و تمثل انها نوننة و بترضع ولا لازم أوقف السلوك دا؟ 

And then it hits me 

بعد ما رجعت من بيات ليلتين عند جدتها رجعت بتعمل النشاط الأساسي اللي بنشوف ماما بتعمله .. التسبيح والصلاة .. فرشت السجادة وعمالة علي السبحة تقول هبّر هبّر هبّر هبّر 

(اللي هي غالبا الله أكبر) 

كوكو مش غيرانة من حسن ولا عايزة نفس الاهتمام كوكو بتقلد كل حاجة بتشوفها 

بتقلدني بتقلد مس الحضانة بتقلد أطفال الحضانة بتقلد أخوها بتقلد نناه بتقلد هابي بتقلد خالتو بتقلد بابا بتقلد للقطط والحصان والعربيات و كابتن الجمباز بتقلد كل كائن متحرك بتشوفه  ... هي دي طريقتها في التعلم و هو دا سن التقليد والتمثليات ولو حنزعق علي تقليد حسن يبقي منضحكش علي تقليد نناه ولا نشجع تقليد ماما 

اللهم هبني مرارة قوية تتحمل 

للبهجة أوجه كثيرة

كالعادة طالما مفيش حد فوق دماغي بيقولي فين يا هانم المقالة وإلا حنخرب بيتك بأجل و أسوف وأقول أنا تعبانة النهاردة بكرة بقي. بس حرام اللولي قرب يدخل في شهره السادس من غير ما أدون عن تجربتي معاه بشكل كافي.. الحقيقة ان حسن عموما في أحواله لطيف ظريف دمه خفيف.. بيصحي خمس ست مرات بليل ومفيش بامبرز بيصمد معاه ولا حتي مولفيكس ولما يدخل له أكل يعيط ولما يخرجه برضه يعيط و in between  و هو بيهضمه بيعيط .. العادي يعني مفيش حاجة أوفر

الأحوال اللي حوالين حسن هي اللي سريعة و شديدة عليّ.. طبعا نجمة الموسم وكل موسم توتي القطة الدكتورة النونة الماما الملكة مع حفظ ترتيب الألقاب, مطلعة عين اللي خلفوني وحياتي الرتيبة ذات الإيقاع الهادي بتتغير بشكل درامي جدا كل دا مع خلفية الحيطة اللي حنلبس فيها كلنا كشعب واحد متكاتف علي هدف واحد... نغّور بعضينا في ستين داهية

**أحنا أخوات بنحب بعض .. أحنا أخوات بنخاف علي بعض** أغنية اللي ألفتها لكوكو ولولي عشان تبطل محاولات فقع عينه

في نهاية الشهر الخامس مع اللولي الحلو فجأة كدة فيسط بقي .. ارهاق بقي مش قادرة يعني, زعيق وشخط في روكي مفيش أي انتاجية بعملها أقل القليل عشان منموتش من الجوع ولما مبلاقيش هدوم نلبسها ببدأ أدور اني أغسل طبعا كل مشاريع الجرافيكس وال Technical English  بتجيب لي هستريا من الضحك. حتي منفذي اليومي للتنفيس عن بخار الحلة في الرياضة واليوجا متوقف بعد أصابة الملاعب اللي اتصابتها في ركبتي ومكسلة أبدأ من الأول تاني.

وبعد أسبوع رياح مترب ومبشر بالربيع الشمس طلعت تاني و الدنيا بقت حر وعلاء عبد الفتاح طلع من الحبس اللي كان غير مفهوم ليه دخله أصلا وليه قعد من غير تهمة ولا عرض علي النيابة أكتر من تلات شهور .. علاء عبد الفتاح اللي من أشهر ناشطي الثورة ومن عائلة حقوقية لها سمعة وصوت داخليا وخارجيا قعد من غير تهمة موجهة له تلات شهور, أمال الغلابة اللي مالهومش حس بيتاخدوا من بيتهم بيقعدوا قد ايه ؟

"هناك احتمال آخر لتتويج مسعانا بغير الهزيمة.. ما دمنا قررنا أننا لن نموت قبل أن نحاول أن نحيا" - رضوى عاشور، "أثقل من رضوى"

للبهجة أوجه كثيرة .. في جري علاء علي أهله ومراته أول ما طلع عالأسفلت, في نزولي بكوكو وحسن النادي وأنا بتطوح عشان تروح الجمباز, في التخطيط لمرحلة جديدة من حياة عيلتنا الصغيرة, في المج البنفسجي اللي صدمته من جدة كوكو وبشرب كل يوم فيه الشاي, في انتصاري علي سخونية التطعيم وورم رجل حسن بكمادات Tempo cool  وطبعا في ضحكة اللولي اللي يعمل العملة السودا من دول ويقعد يضحك لي فيثبتني معرفش أتنرفز و أخيرا في نوم كوكو بعد يوم طوييييييييل من المهاتية والخناق. 

ضبط غُرزة كاتشاب بأسفل السفرة

أثناء حملة التنضيف المعتادة تم ضبط آثار غُرزة الكاتشاب تحت السفرة و جاري التحفظ علي احراز القضية لحين رجوع كوكو من الحضانة و مواجهتها بالعقاب الرادع بالشبشب إن شاء الله 

بالنسبة للغيرة حضرتك

>>الخلفة حلوة مفيش كلام  <<

أنا-بزعق- : يا كوكو مش معقولة اللي بتعمليه دا ارحميني مفيش سمع كلام ..بلا بلا بلا بلا زعيق زعيق زعيق 
كوكو: انت بتحبيه ؟؟ بتشاور علي زعبلة اللي شايلاه و أنا عمالة أزعق و اتنفض علي عمري اللي حينقص بسبب عمايلها. ايه علاقة دا بدا ؟ 

بيقولوا ان الأخ الجديد دا زي ما يكون جوزك اتجوز عليكي و جاب ضرتك في البيت عشان تسليكي..

داحنا حنتسلي أحلي تسلية .. اه والله. كوكو وزعبلة لعبتهم المفضلة انهم يسلموني لبعض أول ما دي تنام دا يصحي ويفضل صاحي لحاااااد ما هي تصحي يسلمها الراية وينام ولا الطبل البلدي يصحيه. بيضّحكوا معايا كركركركرررر 

قبل الولادة بيوم رسمت لكوكو علي شكل قصة مصورة تفاصيل اليوم الكبير .. حتعمل ايه , حتروح فين , حتبات مع مين .. و أنا بعمل ايه و ازاي النونو حيطلع من بطني. الموضوع فرق معاها فعلاً. بس اللي معملتش حسابه هو الأيام اللي تلت الولادة. كوكو عند الجدات وخلاص من غير تفاصيل بقي طبعًا حيسلوها ويفسدوها ويعملولها كل اللي هي عاوزاه, give me one fasad فيه أجمل من كدة ؟؟ 

لاحظت في الأيام اللي كوكو باتت معايا فيها اضطراب في السلوك بشكل غير معتاد, كوكو مطلعة عيني اه بس مش أوي كدة. فيه حاجة مش مظبوطة. فكرة اني أهز راسي في ذكاء وأقول معلش غيرانة من النونو حسيتها استسهال لتحليل الموقف. مكنتش أعرف فيه ايه بالظبط بس بالسليقة كدة حسيت ان الموضوع له علاقة بتنطيطها من مكان لمكان و بياتها كل يوم في بيت شكل. 

وطلعت بفهم فعلًا.. بعدها بأيام قريت بالصدفة دراسة عن السن المناسب لنزول الأم للشغل و ذهاب الأطفال للحضانة. الدراسة اتكلمت بشكل مستفيض عن تأثير نزول الأم أو غيابها في حياة الطفل في الأعمار المختلفة, مش دا محل كلامي دلوقتي بس المعلومة المهمة اللي طلعت بيها انه في حال غياب الattachment figure أو الشخص اللي الطفل متعلق بيه من الأفضل استبداله بشخص أخر معرفة وثابت يتلقي منه الرعاية اللي بيتلقاها من أمه. وأسوأ وضع ممكن لنفسية الطفل هو الطفل اللي بيتلقي الرعاية من ناس مختلفة وبتتبدل بسرعة .. بالبلدي كدة مفيش بديل للأم بس إن كان ولابد البديل يبقي بديل ثابت والطفل بيحبه ومتعود عليه وفاهمين بعض كويس 

صحيح هم كل الحكاية كانوا خمس أيام لخبطة بس كوكو كالعادة درامية وأوفر ونفساويتها اتأثرت جدًا وطلعته يا عيني علي جدتها اللي عهدت لها العناية بكوكو لحد ما افوق وأتحرك. احنا أسفين يا نناه 
راحت السكرة وجائت الفكرة بعد ما روحت بيتي واستفردوا بيا هم الأتنين. المفروض اني اراعي رضيع لا حول له ولا قوة وفي نفس الوقت أخد بالي من واحدة معتبرة نفسها مركز الكون والآمر الناهي و ان مش بس انا بتاعتها دا أخوها كمان دخل في حقوق الملكية وبقي " أسن بتاعي"... 
احنا بنأتمر بأمرها فمش من المقبول بتاتًا اني أرضعه عشان هي عايزة تخش الحمام أو أبص له عشان هي توريني الحركة الجديدة أو أحطه جنبي عشان هي فجأة قررت ان أنسب مكان لتمضية الوقت انها تنام علي كتفي.

السبب واضح ومش محتاج فذلكة. الغيرة وعدم فهم انا ليه مبقتش مركز الكون إني مور ؟؟ طب والحل يا جدعان ؟ من أعجب النصايح اللي سمعتها هي نصيحة ما تهتميش بيه ولا ترضعيه قدامها ! طب مرضعوش ازاي ؟؟ دا اسمه حتي رضيع من الرضاعة  هو فيه أي فعل تاني في حياته غير انه يرضع ؟؟

قعدت أدور علي نصيحة اقعية غير اني أموت الولد من الجوع, نصيحتين اللي نفعوا نوعًا ما معانا. إني أعمل انا وهي فريق علي زعبلة (وباباه بالمرة هههه) وإني اديها من وقتي ان شا الله ربع ساعة بس من غير أي مداخلات. لا حسن ولا موبايل ولا فيس بوك ولا أي حاجة غير ان أنا وهي بنعمل نشاط ما مع بعض.

اه والنصيحة التالتة اني بطلت اتكسف من طلب المساعدات .. كل نص ساعة بنامها زيادة هي زعيق وإنهيار أقل في وش كوكو... مش عشاني يا جماعة أنا بسحلكم معايا عشان نفسية كوكو الرهيفة 

الأسبوع اللي فات كنا أسرة مريضة متحابة بتعدي في بعضيها. بس أشد دورين كان اللي أخدتهم أنا وزعبلة فطبعًا أثر سلبا علي مقدرتي اني أركز معاها أو اني أعمل أي حاجة أصلًا. بعد يومين إنهيار في السرير وصريخ انها تنزل من فوق دماغي مش كفاية اللي أنا فيه ؟ صعبت عليّ وحسيتها منكسرة انه مكنش العشم الإهمال دا كله. تحاملت علي نفسي وبعد ما نيمت حسن –أخيرًا- قعدت معاها علي سلم الرسيبشن نتكلم وجبت كورتين وقعدنا نحدفهم لبعض. كانت فرحانة بشكل وجع لي قلبي. ضحكات مضطربة وفرحة بلعبة من كتر ما بلعبناها سوا زهقت منها. جبر الخواطر علي الله .. معلشي يا كوكو بكرة "أسن" يكبر وتعملي عليه ريّسة و انتو بتلعبوا سوا

مئة يومٍ من الحُسن

مئةُ يومٍ علي إشراق بلادنا بنور ميلادك يا حسن.... حلوة دي:D طول عمري بنبهر بإقتناع الأمهات بأن ولادهم اسم اللع عليهم محور الكون بس كوكو وحسن أكيد محور كوني أنا

بكتب التدوينة دي لما ادركت بالصدفة إن النهاردة الذكري المئوية علي تشريف الطفل البرئ حسن عامر مع انه يوم تنفيض وصريخ مبرر وغير مبرر من حسوكي وشقاوة مبررة وغير مبررة من جانب كوكواللي مصرة تشقلب اخوها و تشيله من رجليه عشان يلعب معاها "أومباز"...أشكو إليك

مئة يومٍ من الرضاعة و السهر والشيل والجري ورا كوكو في النادي بحسن علي صدري والشنطة\الدولاب المصغر علي ضهري شيلاهم هم الاتنين زي شنط المدرسة. من أهم ملامح  "الميت يوم حسن " اني حاولت قدر امكاني مكتئبش.. صحيح التحدي صعب الولادة علي أسوأموجة برد عدت علي مصر في الميت سنة اللي فاتوا علي الاحباطات اليومية والحياتية علي اللحظات المطولة من المورستان اللي عايشة فيه. كفاية لما الاتنين يصرخوا مع بعض في نفس الوقت ولا لما يعملوا عليّ نبطشيات طلبات أو نبطشيات الصحيان يسلموني لبعض دا ينام دي تصحي لحد ما اصرخ فيهم  بحرقة عايزين مني ايييييه يا قراطيس النكد ؟؟؟

والله يكفيني فخرًا اني خسيت 10 كيلو في الميت يوم و بكدة يبقي فاضلي قدهم وأكافئ نفسي بدولاب جديد وفطيرة تفاح لي لوحدي لوحدي أنا وبس.

أما من موقعي هذا من بلكونة بيتنا بدوّن وأنا شايلة حسن علي كتف وحركة هز بندول لا ارادية في محاولة إني أعدي نوبة الصريخ الغير مفهوم بتاعة كل يوم الساعة سبعة أحب اقولكم ان الطفل الأول علي كل الاهتمام اللي بياخده مظلووووم مظلوووووم .. مظلوم بعدم الخبرة والتجريب فيه وعدم فهمه وعدم تقبل الألغاز الغير مفهومة. الطفل التاني مصحوب بثقة في النفس, لامبالاة كدة بالعياط المتكرر, الصبر علي ما ابتلانا بيه ربنا و تقبل أكثر لفكرة اني حتة مطبخ متحركة بشيل الكشط بمنديل من علي البيجاما و أكمل حياتي بكل إشراق

حسن .. إن ربنا وفقني انقذته من حوادث كوكو المؤسفة حيكبر ويبقي قرة عيني حسوكي الدرامي العاطفي علي طول حساس علي طول ضحوك علي طول دمه خفيف وطيب بس قلبته زبالة لا يمكن أعرف اسكته ولا حتي بحركة البندول المهتز