ماما بتنبهني ما انجرفش مع روكي في أحلام الرياضة، ماما خايفة علي كوكو تجرب وشعرها يكرت وتعيا بسبب السباحة والجمباز.
كوكو في أول مستوي
ايه هي حدود اللي علينا فرضها علي ولادنا و ايه مساحات حرية الاختيار ؟
حضرت مناقشات كتيرة عن ضرورة فرض/إعطاء الحرية بالكامل من أول الهوايات الشخصية والرياضة لحد حرية المعتقد والأيديولوجيا
تفرض علي ولادك اللي شايفاه أصح يملوا بيه وقتهم ولا تسيب لهم الحرية يعملوا ما بدالهم حتي لو كان النوم طول الوقت ؟
حصة الألعاب في مدرستي كانت عبارة عن تسكع في الحوش بلا هدف مع شلة البنات وحصة التدبير المنزلي كانت ملتقي النميمة الاول
" انا و جوزي خريجي فنون تطبيقية وعارفة كويس أهمية ان ولادي يكون عندهم حرفة يدوية برة منظومة التعليم " واحدة صاحبتي فنانة بتحاول تعلمني كروشيه
أنا بحاول أتعلم كروشيه وأنا عندي سبعة وعشرين سنة، التعليم مالوش سن بس لو كنت بدأت و انا عندي ١١ سنة كان حيبقي اسهل كتير، كفاية الوقت اللي بيضيع في فك العُقد اللي حسن بيعملها في الخيط
نفسي افتكر حاجة مفيدة عملتها اثناء دراستي (غير الدراسة طبعا اللي كلنا عارفين انتهت علي ايه )
فرحتي الطفولية بغرزة كروشيه أو أربع لفات في التراك من غير ما نفسي ينقطع .. إنجازاتي البسيطة ...البسيطة أوي
أنا مفتقدة مهارات حياتية كتيرة اوي عمالة احاول اتعلمها علي كبر وبحاول أعلمها لكوكو من الصغر لعلي أوفر لها وقت أو أحقق لها حلم ... أو تحققهولي
أم في صالة الجمباز حاطة قدامها شنطة سفر وطفل بيتعلم المشي ، فهمت ان بناتها الاتنين في فرق جمباز و بتقعد يوميا من ٥-٧ ساعات تدريب بناتها جابوا ميداليات علي مستوي الجمهورية
- ما بيزهقوش ؟ دا الجمباز الإيقاعي دا صعب اوي
- هم اللي اختاروا يكملوا
بعد سؤالها عن التعب والدراسة والتمارين و الأخ الأصغر وفخرها بيهم وفرحتهم بالميداليات وحياتها الاجتماعية المنتهية خارج حدود صالة الجمباز
- انتو بدأتوا اصلا ليه ؟ ايه اللي شجعك ؟
هي بضحكة مكسوفة : مكنتش عايزاهم يطلعوا تخان زيي
أمهم جات تحقق حلمها فإكتشفت لنا أبطال :)
-ماما النهاردة عندي سباحة ولا جمباز ؟؟
- لا مفيش تمارين النهاردة يا كوكو
-دبدبة في الارض- لااءاااا عايزة اروح النادي يا مامااااا
حققوا أحلامكم في أولادكم طالما هم حبوا الحلم :)
أعتقد إن التربية تستدعي إننا لازم نفرض عليهم مباديء معينة؛ لكن نترك لهم حرية الحركة داخل هذه المباديء.
ردحذفمثال: لازم أفرض على إبني تعلم رياضة معينة؛ بحكم إن الرياضة عادة مفيدة و إيجابية و لها مردود بدني و نفسي و مجتمعي؛ لكني هاسيبه يختار الرياضة االي هو حاببها.
مثال تاني: لازم أفرض على إبني الإجتهاد في الدراسة؛ لكني هاسيبه يختار كليته بنفسه.