معاناتني اليومية مع البامبرز تتحكي في مجلدات ... كيس نايلون و فيه قطنة ... تسريب و بلل و التهابات دي حياتنا اليومية عادي جدا الجيران يسمعوا صريخ في نص الليل عشان اضطريت احميها في الساقعة لأن الباميرز مستحملش ..
كل دا بعانيه انا و كوكو المسكينة في استسلام للأقدار بإعتبار اني بجيب بامبرز اللي هو انضف نوع حفاظات و ان اكيد تكنولوجيا البامبرز دا اخرها بس لما اتكلمت مع الناس لقيت الموضوع مش كدة خالص ... الباميرز من 5 سنين فاتوا كان فولاذي يتلبس من هنا و انسوه بقي ...بس زي أي حاجة في مصر باظت و اتدهورت
العبقرية انهم يدفعوك كتير و تاخد لا شئ ... الباميرز مش رخيص عشان يبقي بالرداءة دي بس انا زي زي كل المصريين اللي معاهم شوية فلوس زيادة عن الحاجات الاساسية بشتري الاسم عشان ابقي اني بجيب لبنتي احسن حاجة و خلاص حتي لو الاسم دا مجرد اسم مجرد من اي جودة
انت في مصر مواطن درجة تانية ... حتي لو معاك فلوس انت عايش عيشة الفقرا ... شوارع مكسرة مياة مخلوطة بزيت خضار مزوع بمياة مجاري و بامبرز مغشوش بيسرب
انت في مصر استهلاكي شرائي لا خطر منك و لا حول لك و لا قوة تدفع كتير لتشتري مخلفات المصانع الرديئة دون شكوي بدليل ان مصنع بامبرز مصر بيصنع نوعين من البامبرز واحد اخضر اللون الحفاظة الواحدة ب 90 قرش يباع في الاسواق المصرية و واحد برتقالي اللون يباع في السعودية و دول الخليج صناعة ممتازة احسن من السعودي و الاردني و ارخصهم ( الحفاظة واقفة ب نصف ريال ) و النوع دا للتصدير فقط كما قال المصنع لقريبتي التي وجدت نفسها بتسورد بامبرز مصري من السعودية مع اي شخص جاي من هناك ... مسخرة والله فلنذهب نحن و اطفالنا الدرجة التانية الي الجحيم و فلينعم اطفال الخلايجة بالجفاف و الهدوء و النوم الهانئ ... بامبرز عارفين كويس ان هنا اي حاجة بأي نوعية و أي سعر حتتباع .. مفيش رقابة ولا مصنفات جودة و لا حماية مستهلك و علي الاساس دا بيتصرفوا
الخلاصة انك عشان تعيش عيشة كويسة في مصر لازم مش بس يكون معاك فلوس لا دا كمان يكون لك رجل برة أو تاخدها من قصيرها و تركب سفينة نوح
معاكي حق :( إحنا كلنا هنا مواطنين درجة تانية مضطرين نستحمل الزبالة في الشوارع و المجاري الطافحة والمناظر المؤذية واسوأ الخدمات واردأ السلع :S:S:S
ردحذفانا مش حبقي سلبية و مش حشتري باميرز تاني و حكلمهم اقول لهم كدة
ردحذفبالمناسبة.. بابا دكتور أمراض جلدية وبيقوللي فيه أطفال بيجيلهم حساسية من أحسن الأنواع.. وممكن الأنواع الرخيصة تريحهم آخر حاجة !
ردحذفالماركة مش مقياس خالص.. جربي كل الانواع وشوفي هي هترتاح على إيه..
فعلا ،احنا مأساتنا في مصر النمط الاستهلاكي البشع اللي احنا فيه ،بنشتري بنشتري وخلاص مش مهم الجودة المهم الاسم والكمية ، وايه اللي حيخلى أى مصنع يحسن من انتاجه مادام الناس بتشتري؟ بالإضافة لفكرة ان كلنا بنقلد وخلاص المهم منظرنا، ومنظرنا بيتحدد من ماركاتنا اللي بنلبسها وبنستعملها وبنتكلم عنها ... "كل الناس النضيفة بتشتري من ده يبقى أنا كمان أشتري منه " !!
ردحذف