اكتئاب ما بعد الولادة كلاكيت تاني مرة

اكتئاب الولادة الأولانية في كوكو كان كلاسيكو من اللي بيتدرس في الكتب و قعدت ما يقرب من سنة اتعافي نفسيًا منه. حاجة كدة عياط علي رفض الواقع علي اضطرابات نفسية كان شئ لطيف جدًا الحقيقة

بس الاكتئاب المرة دي هو أقرب لإضطرابات هرمونية منه لإكتئاب بجد. معظم الوقت متماسكة و مستقبلة مصيري كحتة مطبخ متحركة بيتقشط عليها بمعدل أعلي من قدرتها علي الغيار. الواحد خلاص اتعود علي ريحة اللبن المقشوط علي كتافه كجزء من الاصانص مع باقي الروايح اللي بيشمها طول اليوم من بوبو و طبيخ و خلافه

ثم إذ فجأتن و أنا بقنع كوكو انه قبل ما نفتح كارتون لازم نروق الأوضة أفتكر ان كان ممكن أعمل أي حاجة مفيدة تانية غير ترويق الأوضة اللي حتتكركب في خلال ٢٠ دقيقة بالظبط من ترويقها فأعيط بحرقة اوي و كوكو تبص لي بذهول في ايه يا ماما ؟؟

صعب كوكو تستوعب كلام زي ضياع العمر والأحلام المهزومة والوقت اللي بيجري و قلة النوم اللي بتعمل كوابيس متحركة فملاقيش حاجة اقولها لها و انا بنف غير ان " الأوضة مكركبة"

إلا ما فكرت تروق الاوضة او أصعب عليها مباخدش منها غير بصة "ربنا يشفي"

تقليعة النبطشية الليلية الجديدة مع حسن هي أفلام الحب والثورة مع فاتن حمامة و عمر الشريف و صالح سليم

هههااااااااحححححح

من أعظم انجازات ثورة ٢٣ يوليو التعليم المجاني و أفلام الباب المفتوح و في بيتنا رجل و نهر الحب. إلا الواحد بقي له اربعتاشر سنة خدمة في أم الثورة مسمعتش حرف من ديالوج اللي دار بين فاتن حمامة و صالح سليم و هو بيقنعها ان الرحلة قدامها طويلة لازم تخوضها بنفسها عشان تلاقي اللي اهم منه و من حبه ... تلاقي نفسها

هرمنا ... و مسمعناش أي حاجة من دي بتاتًا مع اني والله مش اوحش كتير من فاتن حمامة

و تبقي المعجزة الربانية ان ثورة قام بيها عسكر و جيش تطلع ديالوجات زي الباب المفتوح وثورة شعبية زي يناير ينتهي بيعا الحال لتسلم الأيادي ...

أُريد حلًا ....

بطوط عميل الامبريالية

الصين في فترة الفكر الشيوعي القح منعت بطوط من دخول الصين لأنه عميل الامبريالية الامريكية !! اه والله زي ما بقولكم كدة

كمدمنة مجلة ميكي من وانا ٧ سنين إلي يومنا هذا دا كان بالنسبة لي عته .. بطوط مين اللي عميل الامبريالية يا فاشيين انتم !

كوكو لها تلات حلقات كارتون  تتفرج عليهم علي اللاب توب بتاعي وقت الغدا (أيوة عارفة عادة سيئة .. بس انا عندي البسلة اهم اداب المائدة ) و كتغيير من توم جيري اللي حفظناه بدأنا نفتح حلقة من براعم او حلقة من بطوط

مش عارفة انا اللي اتغيرت و بقيت لجنة شئون معنوية صرف لا أقدر الفن طالما لا يهدف لسمع كلام ماما في نهاية الحلقة و لا فعلًا حلقات الكارتون اللي علي يوتيوب مختلفة تربويًا عن المجلة اللي بتصدر كل اسبوع

الحلقات كلها مدمرة لأي قيم انسانية جيدة - دايمًا البادي بالعدوان هو اللي بيكسب أو اللي عمل حاجة غلط بيفلت من العقاب نهايكم بقي عن حلقات لولو و توتو و سوسو قمة قلة الادب و السلوك السئ و استحلال المقالب في بطوط عمهم و مفيش عقاب ... والحلقات البسيطة اللي هو بيبقي ظالمهم بيتم التعامل مع غلطاته في اخر الحلقة بطريقة مهينة جدًا حتي مش كأنه ند لهم لا أقل من الند

مثل هذه الحلقات طلعت جيل امريكي عادي بيرد علي أمه و أبوه و يتحدي اوامرهم و يغلطهم سرًا و علانيةً و كم من العلاقات المشوهة بين الاباء والابناء .. معرفش هي دي الامبريالية اللي الصين في الخمسينات كانت تقصدها ولا لأ ولكن الأكسد اني مش راضية عن محتوي اللي بيقدم من خلال الحلقات الكلاسيكية لبطوط

حتي توم و جيري مع اعتراضي علي حلقات كتير في النهاية معظم الحلقات اللي بدأ بالعدوان فيهم هو اللي بياخد جزاءه

في اول تعاملي مع الكارتون وكوكو بما اني مدمنة قديمة وقعت في غلطة و مخدتش بالي ان فيه كارتون محتواه لا يصلح للأطفال لأنه في الاصل غير موجه لهم زي سيمسون و فاميلي جاي و Looney tones show

لما لقيتها اتعلقت بيهم و هم غير مناسبين قررت اتعامل معاهم بنفس طريقة تعاملي مع البيبسي ... طالما مش عايزاها تشوفهم يبقي مدخلهمش البيت و مسحت الحلقات اللي عندي علي اللاب عشان لما احلف لها اكون صادقة معاها ( لأن الحوادث تحدث و لو شافتني بتفرج عليهم بالغلط حبقي كدة اتقفشت علي فيلم كارتون ههه )

قدامي اسبوع شاق - دا إن ماولدتش قبلها - من اقناعها و اقناع ترشيحات اليوتيوب ان بطوط معادش علي قائمة كارتون كوكو

الطريق إلي كي جي وان

الكلام عن المدارس عادةً بيعمل لي تلبك معوي. في حالة من الرغبة في الانتحار قبل الولادة قررت أخد لفة علي المدارس كنوع من فرهضة النفس. في الحقيقة الكلام عن أحوال المدارس شكله حيطول معايا اليومين الجايين. أنا عارفة ان الوضع سئ لكن ليس بهذا السوء .

بس النهاردة حتكلم عن "ظاهرة " جديدة علي أرض طنطا الطاهرة لما كنت بسمع عنها من أهلي من سكان القاهرة أقول الحمد لله الذي عافانا مما إبتلاهم . و هي ظاهرة الانترفيو للأب والأم والطفل. طُلب مني كشرط للتقديم و قبول الطفل عمل مقابلة للطفل وأبويه معاً!

لما تضاءل مستوي ذكائي عن فهم الحكمة وراء هذا الإجراء اللي من كلام مسئول عن شئون الطلبة في المدرسة عامل أساسي و حاسم في قبول الأطفال المستوفيين لشروط السن ، جاء رده كالآتي :

" بنعمل انترفيو للأب و الأم بالانجليزي عشان نتأكد إنه حيواكب مستوي تعليم ابنهم  إن their English is good enough! 

أما الطفل للتأكد ان معندوش مشكلة . " فلما تسائلت ايه نوع المشكلة اللي بيتم الرفض علي أساسها قيل لي "يعني لو متلعثم أو كدة "

نقطة بقي و من أول السطر عشان الواحد مستحمل حاجات كتير اوي في أم البلد دي بس كدة سو أوفر.

هو من أمتي يا حضرات خبراء التعليم الأفاضل كان الطفل المتلعثم مشكلة لدرجة إنه يُحرم من فرصة تعليم ؟ ما هذا التعليم القائم علي التنافسية و حياة القطيع و ان أقل اختلاف قد يحرم الأبن من فرص متساوية مع أقرانه  "المعتادين " في ظروفهم المعيشية من وجهة نظر المدرسة

حضرتك يا حضرة الخبير عايز تدخل مدرستك نوعية واحدة و شريحة واحدة من أولياء الأمور و تنقي ما بينهم بناءاً علي مزاجك في الحكم علي الناس.

أنا بتكلم هنا بحرقة و أنا من القطيع المرضي عنه مجتمعياً فأنا مسلمة متعلمة  من أبناء الطبقة المتوسطة اصحاب التعليم العالي و الوظائف المحترمة وبتكلم انجليزي و بشجع الأهلي. فضامنة حق بنتي في فرصة لكن تبقي هذه الفرصة غير عادلة و ممكن جداً تكون كوكو بتاخد مكان طفل أكثر ذكاءاً و أقل حظاً منها لمجرد ان اهله مكانوش علي مستوي تعليمي يليق بالمدرسة المحترمة

What goes around, comes around

و هل من العدل يُحرم اب من فرصة يتلقي فيها ابنه مستوي تعليمي أفضل من المستوي اللي تلقاه هو ؟

ثم يتسائلون من اين اتت كل هذه العنصرية و التصنيف و التمييز بين أفراد الشعب !

انت بتربي أجيال علي ثقافة الندرة و علي ان المختلف لا يستحق. ناهيك عن بجاحة هذه الشروط مع مدارس بتقبض علي قلبها من اولياء الأمور مبالغ مهولة و غير مستحقة مع المستوي التعليمي المتدني.

طيب هنا السؤال اللي بيفرض نفسه لما حضرتك عايز أب وأم بيتكلموا انجليزي عشان يعرفوا يذاكروا لإبنهم و عايز طفل علي درجة معينة من الذكاء و هو داخل كي جي وان يكون عارف الارقام و الحروف و الكلمات و الألوان أومال حضرتك عايز تعمل ايه بالظبط ؟ تقبض فلوسك و بس ؟

ثقافة الاستسهال تسربت لكل شئ حتي تعليم الأطفال ، هذا الإستسهال جُرم في حق الطفل المختلف عن الباقين اللي ممكن بنوع من الصبر و الرعاية يبقي أحسن من عشرة أمثال بنتي الطبيعية من وجة نظر الإدارة

المدرسة مش عايزة تتعب نفسها

تكلم د. أحمد خالد توفيق في مقال له عن الإمتحانات "لماذا يشم عادل الورد " عن ذهوله و هو بيوصل بنته لإمتحان الصف التاني الابتدائي من كم الهستريا من جانب الأمهات ما بين التوتر و الدموع و الابتهال إلي الله ان يتذكر اولادهن لماذا يشم عادل الورد. المفاجأة اللي اكتشفها و هو بيجيب بنته ان معظم الأمهات مروحوش من قصاد باب اللجنة ! كل هذا التوتر و الإنهاك النفسي للأم و ابنها علي امتحان لا قيمة له في حياة الطفل ولا مستقبله المهني !

تسائل في المقال عن ان كان غياب مشروع قومي جامع و عملية تعليم حقيقية هما السبب في هذا المشهد. رأيي اننا بنخلق الكدبة و نعيشها لحد ما نصدقها

لا يوجد تعليم حقيقي فأصبح التنافس علي قشور و توافه. لا توجد مدارس متميزة فأخترعوا الوانينج ليست و المقابلات و مميزات تافهة فقط من أجل ارضاء الزبون انه يحس انه كسب ما يستحق دفع كل هذه الأموال من أجله

يا فندم طالما انت لاتقدم تعليماً بديلاً و تدرس ما فُرض عليك من كتاب الوزارة العقيم يبقي زيك زي غيرك. من فضلك ما تشتغلش نفسك و لا تشتغلني

أما عن الحكمة الحقيقية وراء الانترفيوهات في المدارس المحترمة في الانظمة التعليمية اللي بتحترم الأطفال فهي لتقييم مستواه عشان ما يدخلش فصل غير ملائم لقدراته و يطلعوا من الطفل أفضل ما فيه

لله الأمر من قبل و من بعد

توتة توتة ... مش سهلة الحدوتة

مرة كنت قريت ان التربية والتأديب الغير مباشرين عن طريق القصص و المثال الحي المتمثل في شخصي الغلبان علي المدي البعيد لهم تأثير أعمق من التوجيه المباشر و العقاب الفوري .

هات بوسة ، ماهو اصله اللي قاعد ينظر غير اللي بيصرخ ٢٤ ساعة علي تصرفات تحرق الدم و تشيب الشعر و تجيب ازمات قلبية مصغرة من حين لآخر ... كوكو حتقضي عليّ

المهم نوبات الزن الغير منطقية قرب ميعاد النوم أغرتني باللجوء لحل القصص و الموعظة الحسنة دا. كوكو بتعيط بحرقة عشان عايزة تشرب ميراندا، بعد كم مهول من المحايلات عشان ننسي الفكرة استقريت في السرير و بدأت متقمصة روح زوزو نبيل و شغلت اسطوانة كان يا مكان .

مش سهلة حكاية الحدوتة خصوصاً الحواديت المرتجلة اللي القصد منها تأديب موقف معين، الحكي و الحواديت ملكة مش عندي فالحدوتة بتاعتي بتطلع ولا اجدعها  لجنة شئون المعنوية . قصة مباشرة تماماً بنفس الاحداث اللي حصلت مع تغيير اسم كوكو لأي أسم تاني و طبعاً ماما علي طول بتطلع صح هههههههه

الغريب ان كوكو بتتشد و تسمع الحكاية بس لما تلاقي ان ال "ماما" هي اللي طلعت صح لما أجي اسألها في نهاية القصة حلوة ولا ملتوتة ترد لأ وحشة هههههه

انا مدركة تماماً انها وحشة بس اهي بتقضي الغرض و بتقللل نسبة الزن . بدأت اتوسع في الشخصيات اللي علي طول بتعمل حاجات وحشة. النونو عادل اللي بياكل حلويات و مبيشربش اللبن و اخد حقنة . النونو كوكي اللي بتفتح علي ماما باب الحمام و هكذا .... كل ما يحصل تصرف غلط اشهق شهقة مخضوضة و اقولها يا نهاااار ابيض فاكرة النونو كذا اللي معملش كذا و حصل له كذا، لو استجابت كان بها خير و بركة . أما بقي لو مستجابتش فيفضل الزعيق و العقاب حل ناجح جداً فككوا بقي من حقوق الانسان . القمع هو الحل  :D

أحلام كوكو

مفيش طريقة الواحد يعرف ولاده بيفكروا أو بيحلموا بإيه وهم نايمين ؟؟ الشئ المؤكد انه مش نوم متصل أسود بلا أفكار, كوكو لها أطوار في النوم , فترات بيبقي هادي و فترات بتتقلب وتتحرك في حركات دوارنية يا ويل اللي نايم جنبها, عادي جداً أصحي علي صوتها وهي بتنادي ماما ماما و هي نايمة أو أصحي ألاقي قدمها في بقي أو مستلقاني وفاردة جسمها علي رقبتي

بس الأغرب لما بتصحي فجأة من عز النوم تطلب طلب عجيب – غالباً مستحيل تحقيقه – وتصر عليه و تعيط بقهرة اني بقولها مينفعش, أحب أعرفكم بنفسي أنا عامةً إنسانة هادية لحد ما حد يصحيني من نومي اللي أصلاً مقطع تحت وطأة الجوع والحمل اللي كبس علي نفسي و خلاني بنام قاعدة ودخول الحمام كل 25 دقيقة, فلما كوكو تصحيني و تشد فيَ عشان أقوم أجيب لها ميا في ازازة بيبسي فاضية شايفة انه عادي جداً اصرخ في وشها.

هي دي اللحظة اللي الأزواج بيقتلوا مراتاتهم فيها أو بيطلقوهم لو كانوا متحضرين.

مكنتش دي أول مرة تصحي من النوم مسيطر علي دماغها طلب عجيب, ياما صحيت تطلب الساعد 5 الفجر أنها تنزل البسين أو أشتري لها عجلة أو تاكل فسدق .. حاجات عجيبة بس لما بصحي من النوم بقي و أفتكر الواقعة بفتكر ان الحاجات دي لها أصل مش مختلقة من العدم , دا بيأكد لي إن الأطفال مابينسوش ولا حاجة زي ما كل الناس أكدت لي ان لو كوكو طلبت طلب و قلت لها حاضر و ضيعت حتنسي..

لا للأسف مابتنساش, أعتقد ان الأطفال بيبطلوا زن عشان بشكل أو أخر بيعرفوا ان أهاليهم مش بينفذوا الكلام اللي بيقولوه, إنما كوكو بتفضل تكرر الطلب في صور وهيئات مختلفة عشان عارفة ن عمري ما قلت لها حاضر علي حاجة و ما بتتنفذش, مشكلة كوكو بس في الحيز الزمني. لسه معندهاش إدراك ان "حاضر حجيب لك السكوتر في عيد ميلادك"  معناها لسه قدامها شهر علي ما ييجي السكوتر فبيفضل السكوتر دا مسيطر علي أفكارها في اليقظة و الأحلام وتصحي لي الفجر تدور علي السكوتر في البيت عشان عايزة تركبه

يعني أنا الحق عليّ اني بنفذ وعودي, يعني الغلط اللي بعمله أتعاقب عليه و الصح اللي بعمله يقرفني ؟! الرحمة فوق العدل يا ست كوكو, أيام الرضاعة كانت كتير بتحرك بقها و هي نايمة كنت بضحك أنها بتحلك بأخر شفطة لبن, دلوقتي أحلامها بقت أكثر تعقيداً و فيها سكوتر و ميا في ازايز البيبسي وحاجات إما مكلفة و إما مزعجة

و أرجع ألوم نفسي اني بشتكي من أحلام بنتي بدل ما أطلعها للنور زي أحلام ميلا ...

أستمتعوا بصور الأم المبدعة دي من باب التجديد بدل الناس اللي طول الوقت بتشتكي دي .. أحم ! مش أنا خالص

http://www.ibda3world.com/%D9%85%D8%AC%D9%85%D9%88%D8%B9%D8%A9-%D8%B5%D9%88%D8%B1-%D8%B7%D8%B1%D9%8A%D9%81%D8%A9-%D8%B7%D9%81%D9%84%D8%A9-%D8%AA%D8%B5%D9%88%D9%8A%D8%B1/

للبقاء في الحمل

الحمل الأولاني حمادة و التاني حمادة تاني خالص, في الحمل الأول انت في الغالب عروسة جديدة الكل بيدلعك, أكلك بيجيلك لحد عندك, الحياة لسه مش معقدة و الالتزامات اللي عليكي وعلي جوزك مش كبيرة ومكلكعة.. حتي لو بتشتغلي سبب أدعي للدلع و الهنهنة فتبقي متاعب الحمل التقليدية هي التحدي اللي قصادك و هو مش هيَن

في الحمل التاني بقي متاعب الحمل بتتحول لإزعاج في الخلفية وتبقي مسئولياتك و التزاماتك تجاه الطفل الأول و البيت و الشغل في المقدمة, صحيح دوشة الحمل كل شوية تطلع في المقدمة لما الجسم يعلن عن احتجاجه للمعاملة اللي مش مراعية أي حاجة دي, عايزة أعمل كذا بس جسمي خذلني تقريباً شعار طول فترة حملي, كل شوية أقع و أرجع أضطر أقوم تاني عشان الحياة تستمر من غير اختلاف كبير
دليل أم كوكو للعبور من تسع شهور الحمل بأقل الخسائر الممكنة, أولاً في شغل البيت أحسن حاجة الأول بأول 5 دقايق في 10 دقايق متوزعين أرحم علي جسمي من الوقفة ساعة كاملة عشان أروق كل حاجة مرة واحدة. الخطة اللي نجحت معايا كالآتي, أول ما أصحي من النوم أرتب السرير, وأنا بعمل كوباية الشاي و الفطار أروق المطبخ لو فيه أي حاجة باقية من أمبارح, و أنا بصحي كوكو و بلبسها للحضانة أرتب سريرها و احنا خارجين علي باب البيت أتأكد ان مدخل الشقة مفيش فيه أي كركبة
أرجع من الحضانة اللي في الحوض أول بأول وأنا بطبخ للغدا, و أنا بغرف يكون كل حاجة اتنضفت و المطبخ اتمسح و مفضلش في الحوض غير الأطباق اللي حناكل فيها, بعد الغدا ارش الحمامات والطرقة و مدخل الشقة بريحة عطرية و أنا بغسل ايدي أغسل الحوض بالمرة .. الروايح الحلوة بتفرق في نفسيتي و احتمالي للحر!

كوكو معدتش صغيرة و لازم اشدد علي الترويق طبعاً علي قد سنها بس لو نازلين يبقي تلم علي الأقل لعبة من اللعب اللي كانت بتلعب بيها, تخصيص أماكن محددة للألعاب سهل عليها المهمة, المكعبات في الحتة الفلانية والألوان في الدرج  الفلاني أحسن بكتير من أسلوب كل حاجة في أي حتة دا كان ملخبطها ومش فاهمة تروق ازاي, كمان تحديد سجادة للعب خلت الكركبة محدودة بحدود السجادة, صحيح طبعاً مفيش التزام كامل بالسجادة بس السجادة الخفيفة دي بقت ال default   واللي برة دا استثناء
القاعدة رقم اتنين في الحمل, سواء كنت قاعدة أو واقفة أو حتي نايمة فأنا في الغالب تعبانة و مش مرتاحة, الجوع المستمر والصداع والنفخة البطن مع الضربات من حين لأخر تخلي مفيش وضع مريح ممكن, عشان كدة أحسن لصحتي النفسية اني اتعب وأنا بعمل حاجة بحبها عن اني أتعب و أنا مبعملش حاجة. الأنتخة بلا هدف رقص علي السلم لا مني برتاح ولا مني بحس اني عملت حاجة منعشة لروحي

إلتزماتي العائلية و حضانة كوكو مخليني بنزل من البيت مرتين يومياً, نادراً لما بقضي اليوم من أوله لأخره جوا البيت.. أحسن حل للنزول من غير ما اتفرهض , ممنوع السواقة في الزحمة أركب تاكسيات أحسن لي, معملش أكتر من مشوارين في النزلة الواحدة ودايماً يبقي في شنطتي بسكويت مملح و عصير
و طبعاً مهما كنت ذكية وشاطرة وبدبر حالي الحمل أوي مني وبيعدي عليّ أيام إنهيار جسماني وأيام إنهيار نفسي وعصبي وفي الغالب للأسف بيطلع علي كوكو.. بس هي بصراحة يعني تعصب أبو الهول مش أم مسكينة تعبانة وحامل و متفرهضة من الحر

الشلة

ظهر لكوكو أثناء التحضير لعيد ميلادها تصنيف جديد للناس اللي في حياتها غير ماما وبابا والقرايب وبدأت تتعرف علي مفهوم الأصحاب.. الأصحاب هم أشخاص لا يمتوا لنا بصلة سوا معرفتهم الشخصية بكوكو.. صحيح هي مش دي الحالة بالظبط هم ولاد أصحابي أنا بس أقنعتها بكدة.. عمر ويحيي وفريدة و سلمي أصحاب كوكو جايين عيد الميلاد و حيغنوا "هابي يويو " معاكي. و بدأنا بقي عصر فلان صاحبي (بالباء التقيلة) .
كل حاجة عمر صاحبي . فريدة صاحبي . النونو صاحبي. كوكو جالها هوس بفكرة الأصحاب صاحبي صاحبي كل أطفال الحضانة صاحبي .. أي طفل ماشي في الشارع تسألني ماما دا صاحبي؟ تاني يوم كملنا العيد ميلاد في الحانة وسط أصحابها ويجيي 12 طفل غني لها "هابي يويو" .. خلاص محدش بقي عارف يكلمها. طول النهار ماسكة الموبايل (فوني) و قاعدة تكلم "أصحابها".

كل يوم كوكو بتطالبني أجيب لها أصحابها البيت عشان تلعب معاهم, صحيح انها يوم العيد ميلاد كانت محجزة علي لعبها بجسمها و مش راضية حد يقرب للعبها و كنا كل عشر دقايق بنفض اشتباك شكل بس هي عايزاهم تاني ! تقريباً عايزاهم يقعدوا يتفرجوا عليها و هي بتلعب باللعب بتاعتها و محدش يحاول يلمس اللعب تاعتي أنا
مفهوم المشاركة عند الأطفال من سنة لسنتين تقريباً مستحيل ودايماً يُنصح بفكرة اللعب المتوازي تجنباً للمشاكل والخناق, بمعني ان صحيح الطفلين بيكونوا متواجدين في نفس المكان لكن كل واحد فيهم بيلعب في ملكوت لوحده بلعبه مالوش دعوة بالتاني.

بس كوكو كبرت علي الكلام دا بقي دا عندها "تاتة" زي ما بتعرف نفسها بمنتهي الفخر "أنا توتي و عندي تاتة" . بعد واقعة العيد ميلاد اللي فسرناها بمعلش أصلها لعبها الجديدة ومش عايزة حد يجيي جنبها. لقيتها بتكرر نفس التصرفات بهستريا عند اللعب بمرجيحة واحدة قريبتنا. هي خلاص ركبتها ومش راضية لا تنزل ولا تسيب الدور للنونو اللي بعدها, استقرت في المرجيحة ولقيت بيتها التاني.. فضلنا في محايلات لحد ما جه ميعاد مراوحنا عياط و صريخ و شحتفة علي فراقها للمرجيحة و تنفس بقية الأطفال الصعداء انهم أخيراً حيركبوا

أنا قلت مسافة ما ننزل من العمارة حتنسي, بس ما نسيتش ! و فضلت نفس سرينة الصريخ و احنا في العربية و احنا بنطلع للشقة واحنا بنقلع لبس الخروج و احنا داخلين السرير ننام بكاء ونحيب متواصل من كوني حرمتها من المرجيحة ..يا شيخة ****** دي مرجيحة اللي عليها هذا الكم من الهستريا

اوك خلاص لازم أبدأ أعلم كوكو مفهوم المشاركة والعطاء و أنها تدي الناس حاجاتها وتلعب معاهم. امال هي عايشة في الحضانة ازاي ؟ مش عارفة يمكن اللي في الحضانة أشرس منها. واحدة من التريكات اللي قريتها بتقرب مفهوم المشاركة للطفل بأسرع طريقة ممكنة انه عند مشاركة مجموعة من الأطفال للعبة واحدة نعمل قانون التايمر. بمنبه أو تايمر المطبخ كل طفل له علي اللعبة الفلانية عدد دقايق معين و أو ما التايمر يرن خلاص يسيب الدور للي بعده. أعتقد ان الفكرة دي حتنفع مع كوكو لأنها طفلة قوانين, حط لها قانون و مشيها عليه تعرف حدودها صحيح بتحاول طول الوقت تاخد مساحة أكبر من الحرية و مبتبطلش مقاوحة بس الالتزام بقواعد وقوانين معروفة بتخلي حياتنا أسهل و مقاومتها أقل. الاناركية و شغل بالبركة دي مابينفعش معاها مش عارفة ليه جات عليها وعايزة نظام ,ماهي البلد كلها ماشية بالبركة محدش اعترض .. يا غُلبك يا أم كوكو

مرسال لحبيبتي

**و مين في قلبي غيرك اكتب له مرسالي ؟ بكتب لك يوم ما تميتي سنتك التالتة في الدنيا و حياتي ، جيتي في احداث صاخبة و زيها كنتِ متحدية لكل قدراتي . اخدتيني و عليتي بيا و بقي لحياتي معني . هدفي اخلي دنيتك اجمل

**أما بعد منيش عارف دا جوابي الكام ، معدتش بحسب الصفحات ،معدتش بحسب الاقلام ، معدتش بحسب اللي ضاع من الاوهام

بس بجتهد في كل تصرف بحاول اعمل حساب تأثيره عليكي. انا عارفة انك بتزعلي مني كتير و عارفة اني بحبكها و انه التربية قاتلة للمتعة و النظام حاجة مقرفة و انك مش فاهمة ايه الحكمة من تبريئي لما تكركبي الاوض او نرفزتي لما تغرقي نفسك و السرير بالكريم و تعمليه ساندويشات فينو ، مش قادرة تستوعبي تحكماتي في البيبسي و الشيبسي و اللبان . أنا كمان عارفة اني بزهق و بتنرفز كتير . قالوا تلات حاجات لايمكن يجتمعوا مع بعض، بيت نظيف و أطفال و اعصاب هادية . لازم تختاري اتنين منهم و انا اخترتك انتِ و بعافر في الباقيين ... اعذريني

**...بحبك بس ايدي اقصر كتير مني
و إرادتي و المتاح من اختياراتي و تفكيري. حاولت اخلي البلد انضف عشانك حاولت اعملك وطن يكون العادي فيه الاطفال بتلعب في شوارع نضيفة و آمنة و تعليم حقيقي مش اشتغالة و حياة صحية كلها اجتهادات فردية قاصرة و محدودة التأثير ... أو معدومة اسفة مولدتكيش في زمن أفضل

واعرفي يا بنتي ان الانسانية في الحال دا محنة، متفتكريش إن اكتئابي له علاقة بيكي ، اسفة اني بزهق و بزهقك معايا بس النفس بتغلب و الفصل صعب و اللي بيحصل فوق قدرة تفكيري البسيط و قدرة روحي علي التحمل و النوم الهادئ
أشغل تفكيري عن مستقبلك بيكي، بحاول اغرق نفسي في تفاصيلك عشان أقدر أكمل ... و كتير بفشل

**أنا عايزك تكوني في الوريد دمه و تبقي في عقلي انا همّه
و متفتكريش ان النونو اللي جاي حياخدني منك أوعي تغيري و متخافيش معنديش حتة ولد و بنت أياً كان نوع اللي جاي ، انتو الاتنين حتبقوا أصحاب و سند بعض وحتشطبولي المواعين سوا ... و حتفضلي انتِ الكبيرة فخللي بالك منه

جناين قلبي راح تفضل ولو طال الصريخ فاتحة مع انك بتطلعي عين اللي جابوني الصراحة يعني. مين يصدق ان تحضير عيد ميلادك يا مفعوصة ما ينمنيش تلات ايام . اطبق للصبح في عمل و تعليق الزينة و ادخل المطبخ ساعتين اعملك المافين الملون اللي بتحبيه اطلع الاقي الزينة كلها وقعت و اثبتها من الأول ... مامي الفنانة المكسحة

اومال بس يوم خطوبتك حعمل ايه ؟؟؟

بس كله هان لحظة ما شوفت نظرة عنيكي و هم بيغنولك و حاسة ان الهايلمان دا كله معمول عشانك انت و بس . نجمة الجماهير راضية عن اهتمام الجمهور و اداء ماما.

نصيحة مخلصة الحقي استمتعي بالاهتمام دا و بطلي عياط علي كل حاجة في أي حتة قبل ما تكبري وتلاقي نفسك فهمتي قد ايه الحياة أقسي من كون مجلكيش مرجيحة مع العجلة و العربية و السكوتر

مرسل إلي الساكنة جوا قلبي
رقية عامر

** أغنية مرسال لحبيبتي - مسار اجباري

معندناش بنات تبات برة البيت

لأ طبعاً أنا بهرج بالسلامة يا روح قلب ماما 

بما إني من الصنف الأهبل اللي فضل يتفرج علي كارتون لحد ما خلف ( ووقفته عشان بس أقدر أسيطر علي مقدار الكارتون اللي كوكو بتتلقاه والمحتوي اللي يناسب سنها) فمخزوني من أفلام الكارتون لا ينتهي من أول الأسد الملك لحااااد إنتاج 2009 

مش غريبة إني لما بشوف كوكو سواء في موقف كوميدي أو إنساني بفتكر لقطة من كارتون, هي أصلاً كائن خرافي عايش علي سماع الحواديت وقطف الورد فطبعاً شخصية كارتونية جداً. علي مسافة أسبوع من إتمامها السنة التالتة براقب في كوكو التطورات اللي بستني مفاجأتها كل ست شهور. افتكرت فيلم مولان لما مولان فشلت بفضيحة في اختبار الخاطبة اللي بيؤهلها للزواج وكانت حزينة وأهلها شايلين هم انها "متأخرة" عن أقرانها , أبوها للتسرية عن حزنها علق علي جمال الورد وأضاف في تلميح أن أجملهم دوماً هي اللي بتفتح في الاخر بعد الباقيين 

الأسطورة تقول ان أي حد صيني دا حكيم حكمة السنين و بيلعب كونج فو أو بيطير ومن ثَم أنا علي ثقة ان تأخر كوكو في تطورات معينة حتؤدي لاحقاً لتميزها فيها طالما احنا واخدين بالنا بنتعامل بهدوء لكن من غير اهمال. فيها ايه لما أغنية ماما زمانها جاية تتحول ل " ماما وسا ساية واط واط واط " عادي جداً المهم بقينا مش بنستسهل السكوت و الاشارة والاعتماد علي ان ماما فاهمة. زمايلها في الحضانة بيحفظوا قرآن ربنا يبارك لهم و خليكي كوول يا أم كوكو وافتكري ان البرعم المتأخر ممكن يبقي من حفظة القرآن كمان كام سنة 

حكمة أبو مولان الصيني بدأت بشايرها تبان لما كوكو فجأتني بالتطور المذهل في شخصيتها لما طلبت طواعيةً وبدون أي سبب انها تبات عند جدتها لوحدها .... سجل يا تاريخ.. و ترقرقت عيناي بالدموع .. و انضمت أم كوكو لمنتخب الساجدين .. واشتغل جوا دماغي أغاني يا حبيبتي يا مصر يا مصر والله وعملوها الرجالة والحياة حلوة بس نفهمها. 

مبالغتي في السعادة مش من كون كوكو باتت برة البيت احنا عملناها قبل كدة في حالات الطوارئ من مرضي الشديد أو سفر فرهضة علي كوكو, الفرحة جاية من كونها عاوزة كدة ,من كون دي أول مرة أسيبها و أنا مش حاسة بالذنب اني أم بتدلع أو تبص لي بصة تكسر لي قلبي .. طبعاً كأم بفرح بالتطورات اللي بشوفها في كوكو كل شوية بس لما تطور مهم يُترجم في شكل راحة فورية لشخصي المسحول يااااااه يا عبد الصمد الواحد عايز من الدنيا ايه اكتر من كدة ؟؟؟

من ست شهور تقريباً عديت بكوكو من باب الفضول علي مركز متخصص للأستشارات النفسية وتنمية مواهب الأطفال, حبيت أعرف العالم بيقول ايه وأشوف هل انا علي الطريق السليم ولا حودت بعيد بنظرياتي المكلكعة, بعد جلسة مراقبة لردود أفعال كوكو وسماعي كان رأي المتخصص ان البنت عادية جداً و إني اللي مستعجلة جداً !!! تحديداً في موضوع اختلاطها بالعالم . المتخصص من أنصار مدرسة الطفل مالوش غير حضن أمه و ايه أمهات اليومين دول اللي عايزين يخلفوا و يقلبوا العيل علي أقرب جليس أو حضانة. الطفل من حقه تلات سنين كاملة خالصة ملتصقة في حضن أمه . بعدها يبدأ سن مواجهة العالم المحيط بيه لوحده مع جدة أو جيسة أو مدرسة 

بصراحة مقتنعتش بكلامه و حسيت ان تطبيقه مشروع طفل انطوائي, تلات سنين دا في أوساط كتير سن دخول المدرسة ازاي يتنقل النقلة الكبيرة دي مرة واحدة ؟ بس بغض النظر عن هل كون مجتمعنا هو اللي مش بديي فرصة للإشباع العاطفي للأطفال بإقحام المدارس أو شغل الأم ولا تلات سنين دا كتير أوي أوي والبديهي انه يبقي بالكتير سنتين زي الفطام من الصدر بس كلامه كان صح علي الأقل في كوكو من ناحية انفتاحها علي العالم من غير ما أزوقها في الشهرين الاخريين و توجتها بطلبها الأسطوري بالبيات في بيت نينا من غيري .. طلعت بتفهم يا دوك .. أحمدك يا رب أهو أشوف لي شهرين دلع قبل ما العفكروش التاني يشرف و نعيده من الأول 

مفيش ريف عالزراعي

سفر الويك اند بالنسبة لسكان الأقاليم أمثالي أسلوب حياة خصوصاً لما يبقي معظم قرايبهم في القاهرة و فسحهم في اسكندرية واخدين الطريق الزراعي قياس بالعداد
أنا مش عايزة ابقي بومة في كل سفرية بس كوكو كدة اوفر أوفر أوفر لما أبقي في السابع و كوكو بتنطط علي معدتي طول السكة اللي تتراوح من ساعتين لثلاث ساعات و نص علي حسب التساهيل

فكرة ان كوكو تقعد محترمة في الكار سيت ورا و أنا و باباها قدام دي ضرب من الخيال العلمي. فضلت تقعد علي حجري -مع علمي التام ان دا غلط و خطر جداً عارفة عارفة - لحد ما بقي في الشهور الوسطي من الحمل وضع مستحيل فيزيائياً. بقيت انا و هي بنرجع ورا عالكنبة وكانت النتيجة انه علي نص السكة بتكون فركت و حركت لحد ما استقرت علي حجري برضه متجاهلة محاولاتي المستميتة في إني أخليها قاعدة جنبي مش عليّ

هنا أنا قدامي اختيارين أمر من بعض . إما اني اسيبها تنام و بكدة يبقي قدامي لما اوصل وجهتي ليلة سودا، وإما اني استحمل الفرك و الحرك والفرهضة و اهو ساعتين يفوتوا بالطول او بالعرض

حاولت ادور و ابتكر حلول تسليها طول السكة زي اننا نقعد نغني ، نطلع لعب ، ناكل ممنوعات زي الشيبسي ، بس في النهاية الأغاني بتزهق من تكرارها بالكتير نص ساعة و كيس الممنوعات بيتنسف في ١٥ دقيقة علي الأكثر، أما اللعب ففشلت مع كوكو يمكن انا مش بنقي لعب صح بس لو جبت لها عروسة بتزهق منها من غير الادوات بتاعتها و لو جبت الأدوات و الرفايع بتضيع في العربية و لو جبت لعبة من نوعية التليفون اللي بيغني أنا سبونج بوب كل اللي في عريبة بيزعقولي انيمها حالاً و ان شالله ما عنها نامت بليل

قريت عن لعبة مستوحاه من الطريق، يعني نفضل نخمن و نعرف اسامي الحاجات اللي بتقابلنا طول الطريق . استبشرت خير من الفكرة دي كوكو عندها حالة من النهم المعرفي و عايزة تتعلم كل حاجة ... حتهتم باللعبة دي

بس للأسف الطريق مخيب جداً لآمالي ..، فين الريف المصري .فين الجواميس و البقر و المعيز و ابو قردان و الفلاحين اللي بيزعوا الارض ؟ .. معقولة عالزراعي كله اشوف النيل مرة واحدة و مرة ترعة و جاموستين و خيال مآته واحد بس ! علي إمتداد ١٥٠ كيلو مفيش غير زرع قصير أو بيوت و مطبات ؟ اللعنة علي الزحف العمراني اللي حرم كوكو من مشاهدة مسلية لسكة سفرها و صداع دماغي اللي حتتفرتك من سؤالها المستمر فين عمو الفلاح زي اللي في البازل ؟ انا حاولت اجتهد علي قد ما أقدر في ابتكار مشاهد مسلية بس للأسف أسلاك التليفونات وقضيب القطر و الشجر اللي كله شبه بعضه مطلعتش حاجات مسلية بما فيه الكفاية فكوكو قررت تسلي نفسها بإنها تعمل قطة عايزة تنام مع النونو اللي جوا بطن ماما تحت البلوزة
آه ياني يامّا يا غُلبك يا أم كوكو علي كل مطب و مطب راسها تغرز في بطني ... امتي بقي يا كوكو يبقي ليكي خواطرك الخاصة اللي تسرحي فيها في هدوء و انت شايفة قدامك ملكوت الله ... بس اهم حاجة ماتناميش

الأم أصلها كائن نكدي

قريت ذات مرة عن كون تصرفات الأمهات تجاه أولادهم هي تصرفات أنثي تحافظ علي نسلها لا تصرفات بني ادم بغض النظر عن نوعه، الأم عادةً تري ان كل اختيارات ابنائها التي لا تضمن مجرد الجلوس و تلقي الأكل بالمعلقة في صمت هي اختيارات حمقاء هوجاء قد تؤدي إلي فناءه التي بُعثت خصيصاً للعمل علي عكس ذلك ، منحتك الحياة أيها الوغد فكف عن الحركة و حافظ علي حياتك 

هنا انتهي مضمون الكلام اللي للأسف مش فاكرة قريته لمين ولا فين لكن فسر لي سلوك الأم اللي دايماً يميل للشك و الندب و الرفض والنكد لكل طلبات و تصرفات أولادها 

الست النكدية المكشرة الزهقانة من عيالها و عمايلهم السودا جوا كل واحدة فينا بدرجات مختلفة .

من أول ما بصرخ في كوكو عشان تبطل لعب و طرطشة بالميا و الخروج في المروحة لحد تأفأفي من الحلويات اللي حتجيب لها إسهال/ إمساك / تصد نفسها 

"ماما دي "Fun killer الجملة الاساسية اللي ابو كوكو بيرددها كل ما أتذمر من متعة مفسدة لكوكو من اكل بونبوني او سهر او اي حاجة تخرج برة الإطار الدقيق اللي رسماه لحياة كوكو

لستِ وحدك يا حياتي، في يوم من الأيام اللي كانت عصيبة علي البلد هربت بكوكو للساحل و في محاولاتي لهدوء الأعصاب عشان مأثرش علي كوكو بتوتري طلعت بيها علي البحر وقت الغروب. كوكو ما بتحاولش تطلب انها تنزل ميا البحر عارفة قدراتها و شايفة انه كتر خيرها انها بطلت تعيط و تبص الناحية التانية هرباً من صوته المخيف ، بس لقت نفسها في نشاط تاني وهو دفني و رشي بجردل الرمل. 

و كوكو مستمرة في عملية رشي بالرمل و أنا مستمرة في تأملاتي متظاهرة بالحكمة قدام مشهد الغروب في مشهد كلاشيهي اوي يعني شوفت بنوتة صغيرة تطلع ١٠ سنين كدة طلعت من البحر بناءاً علي أوامر أمها عشان "كفاية كدة حتبردي " و بدأت في عمل مجموعة من حركات الجمباز البديعة علي الرمل المبلول و شلقبات في الهوا تخليها تضرب بإيديها و رجليها في الموج اللي بيروح و ييجي تحتها 

"أنا بتنفس حرية " جملة fake اوي مكتوبة علي شنط خروج جديدة بس البنت دي فعلاً حسيتها بتتنفس حرية ما شاء الله عليها و هي  خفيفة بتتشقلب علي موج البحر في بتتنفس هوا مفيش انقي من كدة 

المشهد الآخذ للأنفاس بالنسبة لي كان حتة من الجحيم بالنسبة لأمها اللي قعدت تصرخ كفاية "حتبردي" "حتتكعبلي" "رجلك حتنكسر" "يلا " "تعالي هنا حالاً كلامي يتسمع" و فضلت الأم تصرخ و تبص للبنت نظرات تنبأ بقدوم علقة سخنة بس لما تروح البيت علي استهتار البنت و الهبل اللي مالوش لازمة اللي عملته دا ، نظرة إعجاب مشفقة مني علي مصير الغلبانة اللي في أحسن الأحوال حتتقرص قرصة تخلي دراعها ازرق خصوصاً لما البنت ادركت قد ايه أمها غضبانة و عنيها كلها وعيد فلمت الدور و راحت لها في استسلام.. مقدرتش امسك نفسي و صقفت لها و أنا بقول " عقبال الأولمبياد " 

طبعاً أمها بصت لي بصة مرعبة سحبت بيها كل تشجيعي و أقوالي في التو و اللحظة