تقوية مناعة الأطفال بطرق طبيعية

أنا بكره الشناء, بارد مفيش شمس موسم المرض وطبقات الهدوم اللي فوق بعضها و احتياطي لبس كوكو واحنا خارجين بدل ما كان فستان كات بقي فانلة وبلوزه و بنطلون و جاكيت ولسه الطبقات حتزيد كل ما نشتي اكثر, فقرة الألعاب المائية في البانيو اتلغت وأسوأ حاجة الشتا دخل علينا بحتة دور برد من أسوأ ما يكون أول مرة كوكو تتبهدل كدة , قطعت في قلبي المجرمة وأسقط في يدي

صحيح كوكو متابعة مع دكتور ممتاز هادي جدا في الأدوية و مابيفتريش زي معظم الدكاترة اللي للأسف دلوقتي بيستسهلوا الأدوية و الأنتيبوتك بشكل مؤذي لمناعة البابي بس انا كنت محتاجة اسمع كلام من أم زيي مرت باللي مريت بيه و عندها خبرة ازاي تساعد ولادها يخفوا اسرع و تقوي مناعتهم بعيدا عن الأدوية.

التدوينة دي و اللي بعدها حنقل لكم خبرة أمهات غيري في كيفية تقوية مناعة البابيهات و الأطفال مع دخول المدارس و بداية الشتاء و ازاي تستخدمي منتجات طبيعية و أعشاب في القضاء علي البرد في أوله أو مساعدة الدواء اللي بياخده ابنك عشان يخف بسرعة

أم أمريكية عندها 7 أولاد مطعمتش حد فيهم للبرد و أعتمدت علي الطرق الطبيعية في تقوية مناعة أولادها, كانت مؤمنة بإن ولادها لازم يتعرضوا للميكروبات عشان جهازهم المناعي يطور و يكون دفاعاته الطبيعية و طبعا كان بيجي لهم برد عادي و يسخنوا زي كل الأطفال لكن كانوا بيخفوا أسرع و من غير مضاعفات

كانت معتمدة في النظام بتاعها علي شوية حاجات منها

1-      الرضاعة الطبيعية:

علي أساس ان لبن الأم أساسي في تكوين الجهاز المناعي للأطفال وغالبا الأطفال اللي رضعوا طبيعي أقل عرضة للعدوي و بياخدوا التغذية المناسبة اللي فيها الأحماض الدهنية الأساسية للجسم

الأمهات اللي مقدروش يرضعوا طبيعي الأم دي بتنصحهم بلبن الأرز البني كبديل غذائي صحي يساعد علي تكوين مناعة طبيعية

2-      وفري نظام تغذية صحي

القاعدة في الأكل اللي بتقدميه لأبنك ان كل ما كان طبيعي أكثر و أقل عرضة للمعالجة وإضافة النكهات له كلما كان صحي و غني بالفيتامينات و المواد الأساسية لبناء جهاز مناعي قوي.. نظام غذائي معتمد علي الفواكة والخضروات والمكسرات والبقوليات والحبوب الكاملة

الأطفال بيتشدوا للوجبات الخفيفة " سناك" اللي بتبقي غالبا مليانة بالسكرو مرت بمعالجات كثيرة افقدتها قيمتها الغذائية , المنع مش الحل السليم و لكن وفري دايما بدائل صحية معمولة في البيت زي العصائر الطبيعية والسموثيز وسلطة الفواكة والمكسرات المحمصة والكيك البيتي

لا يمكن تعودي ولادك علي نظام غذائي و إنت مش ملتزمة به, دايما حطي نفسك كمثال يحتذي به لأولاد

3-      لو ابنك يعاني من حساسية أو اشتباه في حساسية لازم تعيدي النظر في نوع الأكل اللي بتقدميه, الأكل الزيتي والمخبوزات والسكريات و الصودا ممكن يخلوا الأمور أسوأ, برضه لازم تحددي من كميات الفواكه المقدمة له والسلطات ومنتجات القمح والخل والصويا ,مفيد تقدمي له الخضروات الحلوة زي القرع والجزر والكرنب والبصل

4-      اخلقي بيئة غير سامة

تعرض الأطفال للمواد الكيماوية بيدمر جهازهم المناعي, مع ان كل حاجة حوالينا مصنعة من كيماويات يمكنك توفير بيت صحي زي شراء ادوات نطافة غير سامة ومنتجات العناية بالبشرة وألياف طبيعية في المراتب والمفروشات والخضار و الفواكه المزوعة بسماد طبيعي (اورجانيك)

تعليقي أنا أم كوكو : كتير مننا ممكن ميكونش عنده القدرة المادية أو مش متوفر له البدائل دي في مصر بسهولة بس ممكن نحاول نتصرف علي قدر المستطاع علي قد امكانيتنا

5-      تجنبي المضاد الحيوي والتطعيم قدر المستطاع – تعليقي  علي النقطة دي بالذات إن فعلا في تهريج في استخدام المضاد الحيوي ومعظم الدكاترة للأسف بيستسهلوا أما التطعيم فمختلف عليه فيه اراء علمية محترمة بتقول ان مهما طعمتي ضد أمراض مختلفة دا مابيأثرش علي جهاز المناعي للأطفال خصوصا ان في اتجاه في مصر بعدم الالتزام بالتطعيم اللي وزارة الصحة بتقدمه والعيادات الخاصة بتوفر تطعيمات تانية ضد فيروس الروتا و الانفلونزا .. مع اني اكتفيت بتطعيم وزارة الصحة بس مش شايفة ان التطعيمات التانية مضرة

أما رأي الكاتبة ان حقن التطعيمات الكثيرة للأطفال و هم لسه جهازهم المناعي بيتكون بيضغط علي الجهاز المناعي مما قد يؤدي الي خلل وظيفي فيه يعاني منه أطفال كثير

6-      حياة اسرية مستقرة الحب و الاهتمام بيقوا المناعة و الاطفال اللي بينموا في جو أسري مستقر ومحب بيحسوا بالأمان والسعادة و بيبقوا أقل عرضة للأمراض

تعليقي ان أيوة فعلا الزعل بيعي و أنا أول واحدة لما بزعل بعيا علي طول و لازم علي طول يبقي في تلامس بينا و بين ولادنا وأحضان وبوس ولعب حتي لما يكبروا مش و هم أطفال بس

7-      الروتين اليومي جزء من الاستقرار و دا يشمل الوجبات في مواعيد ثابتة, نوم الضهر و بليل و العيلة تاكل كلها مع بعض مهم جدا للأستقرار النفسي –

تعليقي: للأطفال ما قبل المدرسة في مدرستين في التعامل, مدرسة الروتين اليومي و مدرسة حسب الطلب جربت مع كوكو الاتنين و مدرسة الروتين اليومي علي قد ما بتقيدني في الحركة والمواعيد علي قد ما لاحظت ان كوكو نومها و شهيتها بيتظبوا و أنا بحس اني بني أدمة مسيطرة علي حياتي مش تحت رحمة مزاج كائن وزنه مجبش 10 كيلو

8-      النوم طبعا ضروري الطفل ياخد كفايته في النوم و ينام و يصحي في أوقات معقولة و ينصح بتخصيص بعض الوقت لسماع موسيقي هادئة أو أي نشاط هادئ يخفف من التوتر و يساعد علي الاسترخاء

9-      اللعب في أماكن مفتوحة – التعرض للشمس و الطبيعة و اللعب في الرمل والنجيلة عوامل محفزة لبناء مناعة قوية

تعليقي: فعلا العيال اللي بتتخزن في البيوت بتبقي صحتهم ضعيفة لازم يتعرضوا للشمس ولقذارة الشارع عشان عضمهم ينشف

دي نهاية تدوينة الأسبوع دا أما الأسبوع الجاي مع أم تانية حتشرح لنا هو ايه الجهاز المناعي و أزاي الأطفال بيعيوا و ازاي تحولي مطبخك لصيدلية طبيعية تساعدك في مقاومة أشهر الأمراض اللي بتيجي للأطفال

ان تكون مجبراً علي الكنبة

دي صورة كوكو مع البرادعي أي نعم مش فوتوشوب والله، كان قادماً الي ابيار بالغربية مسقط رأسه و نظراً أن أبو كوكو من قيادي حملة دعم البرادعي في طنطا والبرادعي نفسه كان معزوماً علي الغذاء في بيت نسايب اهل ابي فقد تمت دعوتي (بالمرة) للغذاء الريفي العامر 

غادرت كنبتي التي صرت احبها من طول العشرة و ذهبت لعل و عسي أظفر بصورة لكوكو مع البرادعي من يدري قد يكسب في الانتخابات لتتفشخر كوكو انها كانت جزءاً من كتابة تاريخ مصر الجديدة 

طوال ال ١٨ يوم لم أغادر منزلي إلي فيما ندر لا لأني لا سمح الله كنت من فريق كفاية بقي حتخربوا البلد أو لأني لا قدر الله كنت خائفة من الانفلات الامني بل ان السبب هو ولا مؤاخذة لم يوافق أي حد علي رعاية كوكو لأنزل انا... زوجي اختي أمي حتي ابي عاد بالصدفة من السعودية يوم ٢٦ و شارك و تركوني وحدي علي الكنبة مع كوكو من غير اتصالات و لا انترنت أجري وراء الجزيرة من تردد الي أخر

محسوبة انا علي حزب الكنبة الذي نصحني أعضاءه مراراً ان أكف عن مشاهدة الجزيرة اللي مولعاها و اتفرج علي القنوات الحيادية التي تعرض الحقيقة مثل المحور و الحياة .. اه والله قالولي كدة ليرتفع ضغط دمي و أتمتم في سري "بألفاص بسيئة" تعلمتها مؤخراً من زوجي مع زيادة جرعة كم المتنطعين ولحاسين الجذم المطلين علينا في شاشات التليفزيون نحن الآمنين في بيوتنا و علي كنبنا 

مصابة بعقدة نقص يزيد من حدتها نشطاء تويتر قل فيهم ما شئت و لكن علي الأقل هم هزوا الكريمة وتحركوا من علي كنبهم ليغيروا ما يروه خطأً ... قد يكون منهم من هو حنجوري او ثوري اكثر من ما تحتمله الثورة او حمار مش فاهم حاجة او عميل بأجندة و لكنهم يتحركوا و ينزلوا و بيتبهدلوا 

مصابة بعقدة نقص تزيد من حدتها الحراك الأجتماعي و السياسي الذي تشهده كل العاملين من الطبقة الوسطي حولي ... أمي مشاركة في إضراب أعضاء هيئة التدريس في حال لم يتم إقالة رؤساء الجامعات، زوجي قيادي في حملة دعم البرادعي و قد يكون الآن يساهم في كتابة تاريخ مصر، أختي متطوعة في نفس الحملة، صديقتي الثورية تشارك في نشر الوعي السياسي مع فريق قبيلة تي في، و أنا بين مطرقة هؤلاء و سندان حزب الكنبة المحسوبة انا عليه بتوع كفاية بقي الناس دي عايزة إيه جماعة الآمر بالإحباط مفيش فائدة البلد خربت 

في إيه لا بجد فيه إيه ؟ بلد إيه اللي خربت دا مصر دي كانت تواليت كبير أوي عاملين يعملوا علينا بي بي ... استقرار إيه اللي جايين تتكلموا عليه ... دا اسمه استيكرار مش استقرار 

الاستيكرار هو ان رب الأسرة يربط في ساقية لا فكاك منها إلا يوم الممات كي يوفر الملبس و السكن و الطعام وجواز البنات ويعمل حساب المرض اللي لا قدر الله لو طلع مكلف يبقي مهدد بشكل كبير انه مش بس لا يعالج بل و يتشرد هو و أهله 

هؤلاء المنادين بالإستيكرار بيوتهم من زجاج و لكنهم لا يعلمون ضربة واحدة بطوبة ثقيلة نوعاً ما تهد البيت علي دماغ اللي جابوهم ورغم ذلك تجدهم يفسروا اذا انهار الإستيكرار المزعوم ان المؤمن مصاب

لا يا سادة ليس المؤمن مصاباً بقدر ما انه لا يوجد اصلاً استيكرار و لا توجد دولة تقدم لكم ادني الخدمات التي ليس عليك ان تحمل همها مثل التعليم و الصحة 

فكيف نطلب من رب البيت الإبداع والتفاني في العمل إذا كان عليه ان يأتي بأكبر قدر من المال الذي يضمن له الي حد ما مع ستر ربنا الإستيكرار.. البحث العلمي مثلاً من سيتفرغ له و هو مطالب بإحضار المم لأهل بيته؟

حركتني العقدة المذكورة بأن ابدأ في عمل أي شئ تطوعي من علي الكنبة المجبرة عليها حالياً و بما أني من مدرسة من يفعلوا شيئاً بالكتاب by the book قررت مع نفسي ترجمة مقالات التربية التي اقرأها حتي أنشر الفائدة، التقط عملي القائمين علي موقع سوبر ماما لأبدأ معهم علي نطاق أوسع و ليس بشكل فردي كما منت أفعل 

رغم أني مدركة تماماً أني بالنسبة لهم ترس في ماكينة كبيرة هم لا يدركوا ان هذا العمل هو محور حياتي و رسالتي و هدفي في الحياة .. هدفي أن أربي من سيتولون تربية هذا الجيل الذي سيبني البلد.. إذا استطعت ان انشر أفكار متعددة في اساليب التربية فقط لتشغل كل أم تفكيرها بما هو انسب لها في تربية أولادها و تتعلم ان هناك اختلاف و مدارس متعددة و تجتهد و تخطئ و لا تفعل من منطلق "قالواله " بل من منطلق قرأت و فهمت ... عندها فقط يمكن ان تخرج هذه الأم جيلاً قادراً علي بناء البلد حتي يستمتع أحفادنا بثمرة ما زرعناه و لا يدعوا علينا اننا كسلنا نقوم من كنبنا لنصلح في المعمورة 

المسئولية التاريخية علي جيلنا هذا أكبر من الللازم أثقل من اللازم و لكني أعرف انه في يوم من الأيام سيخلد التاريخ اسامي كل من قام من علي كنبته بحروف من نور ... شي لله يا أم النور يا عدرا  

ليلة بلا كوكو

و هكذا سقطت أم كوكو، بين التمريض والاكتئاب وشوية أحداث أثرت في نفسيتي أوي عييت وهجم البرد عليّ. رحمةً بيا و خوفاً علي كوكو من العيا تاني (كدة مش حنخلص) قررت جدة كوكو في لحظة تضحية بالنفس ثورية إن كوكو تبات عندها.

ان ان ااااان .... بصراحة كنت من فترة نفسي أعمل كدة بس كل مرة حاجة تحصل تعطل المشروع الثوري دا خصوصاً أني مصممة أفطمها من الرضاعة الليلية. جات الفرصة و مع العيا بقي هو دا التصرف العاقل والسليم

· أول مرة من ١٤ شهر يكبس علي النوم فأدخل أنام بالبساطة دي
· أول مرة من ١٤ شهر مصحاش في النص علي صوت عياط
· أول مرة من ١٤ شهر أنام في سريري و اصحي في سريري برضه
· أول مرة من ١٤ شهر البيت يبقي بيبرق و الحلل في مكانها و الخزين مترماش في الطرقة و الشباشب و الجذم في مكانهم الطبيعي في الجذامة

هدوووووء هدووووووء هدووووووء لدرجة أني سامعة صوت الجيران والناس في الشارع

· بس بصراحة وهي نازلة فكرت كتير ألغي الموضوع و اتحجج بأي حاجة غير أني مش هاين عليّ تسيبني
· بصراحة برضه فضلت قاعدة جنب التليفون ماسكة نفسي أني اكلمهم كل ١٠ دقايق اطمن عليها
· وبصراحة اكتر بقي فضلت قلقانة طول الليل أنام واصحي أسأل هي مبتعيطش ليه اقوم أطمن عليها و افتكر انها مش هنا
· أول ما قمت من النوم لبست و نزلت أجيبها و أنا بدعي يا رب يا رب ماتكونش صحيت عشان تصحبها انا و تضحك لي بابتسامتها الساحرة أول ما بتقوم من النوم.
ضحكة مشرقة و حضن طويل طويل عرفت ليه نناه الله يرحمها لما كانت تشوف أختي وهي صغيرة الصبح (اللي باالمناسبة شبة كوكو بالحتة) كانت تقولها " صباح شريف حبيب قلب"
وحشتيني يا مضروبة

الجرثومة الصغيرة

أسوأ وقت ممكن كوكو تعيا لنا فيه، دور برد عادي مع تقليب الجو بس جاي و إحنا في سيرك التدريب علي النوم اللي طوّل أوي لحد ما دخل في وقت اضطرتنا نسافر لظروف عائلية.

·            لما كوكو بتعيي بتعامل معاها علي أنها سلاح بيولوجي و بلبس الكمامة اللي كنا بنشوف سكان جنوب شرق آسيا لابسنها أيام هوجة السارس

·            لما كوكو بتعيي تلاقي قطارة فيتامين سي (سي فيت) و ليمون متقطع لنصفين في كل ركن في الشقة

·            لما كوكو بتعيي بخفي المناديل تماماً لأن غالباً اللي بيحصل أنها بتاكل المنديل بالنفافة اللي فيه

·            لما كوكو بتعيي بمسح تحت مناخيرها بالمياه بس و بحط لها فازلين عشان ما تلتهبش

·            لما كوكو بتعيي برفع لها رأسها و هي نائمة بمخدة كبيرة ( المخدة بتاعتي مش مخدات الأطفال ) عشان مناخيرها ما تتسدش  

·            لما كوكو بتعيي لازم البسها طبقة زيادة علي لبسها الهدف منها أني أدفي بطنها

·            لما كوكو بتعيي مش بحاول أديها غير الأكل اللي بتحبه هي اصلاً بتبقي مقريفة ومش طالبة كمان عكننة الأكل

·            لما كوكو بتعيي بنمر ب٣ مراحل : مرحلة كوكو الضعيف و دي بتبقي ساكتة مسكينة خالص لا حول لها و لا قوة ابص لها و أقول يا عيني عالحلو لما تبهدله الأيام - مرحلة كوكو الزنان و دي المرحلة اللي بتبقي خفت جزئياً بس لسه في حاجة مضايقاها و في المرحلة دي أفكار الانتحار بتراودني بشكل خاص - مرحلة كوكو المفترية و دي لما الحمد لله بتخف و ترجع تستقوي علينا و تطلع عين اللي جابوني و تنسي أنها كانت من يومين من المستضعفين في الأرض

بعد ما كوكو بتعيي غالباً أبو كوكو بيلقط منها الدور (عشان مابيلبسش الكمامة) و نبقي مش فاهمين أزاي الجرثومة الصغيرة دي تعمل في أبوها كل دا ، يوضع سره في أضعف خلقه يا أخي !

نسألكم الدعاء بالشفاء لكوكو وأبوها و الرحمة لأمها و ربنا ما يعيي عيل يا رب لأن امه اللي بتمرمط جنبه

سبع ليالٍ سود

الخميس اللي فات قررت إني أكسر عادة نوم كوكو علي صدري. القرار الثوري دا أنا نفسي أخده بجدية من زمان واحدة زيي النوم أساسي وبيفرق فعلاً في حالتي النفسية والعصبية عارفة إلى حد ما اضبط لكوكو كل حاجة إلا النوم، سخرية القدر معرفش بس أنا شايفاه ابتلاء حقيقي ... المشكلة مش بس في إنها مش بتعرف تنام غير على صدري المشكلة الحقيقية إنها لحد دلوقتي بتصحى مرتين وثلاثة بالليل متعرفش بقي السبب إنها بتقلق ومش بتعرف تروح في النوم تاني ولا إنها بتقلق عشان عارفة إنها حترضع ... الموضوع عامل زي دائرة بنلف فيها أنا وهي وأبوها (اللي كل يوم بيصحى يلاقيني ضاربة له البوز الصباحي وقاعدة اسمعه كورس الشكوي اليومي)، اللي شجعني كمان قريت تعليق أم لثلاث أولاد بتتكلم عن إزاي دربت أولادها علي النوم لوحدهم من غير الروتين اليومي من الهز والرضاعة وبتقول في الآخر "بحكم خبرتي مع أولادي الثلاثة إنتِ محتاجة ٣ أيام لتخلقي عادة جديدة وثلاث أيام لتكسري عادة قديمة.

ماشي واضح إن الأم دي محظوظة جداً لأن أنا أهو بدوّن في الليلة السابعة ومازالنا مستمرين في الشو الليلي المرح لا العادة تكونت ولا نيلة، نفس مقاومة كل ليلة نفس العياط نفس الصريخ بيقولوا الفطام هو أول حزن عرف قلب العيل لو اعتبرنا إن دي تجربة مصغرة علي الفطام فأنا متوقعة ليالي مرحة أيام الفطام.

أنا كمان قدمت على خطوة صعبة من غير تخطيط محكم، يعني أنا جيت سألت أبو كوكو عن ظروف شغله الأيام دي عشان توقعت أني هحتاج مساعدة ونبطشيات ولسبب مجهول فهمت إجابته “الرافضة إنه مشغول جداً اليومين دول وأحسن لي أأجلها” بإجابة تانية خالص “ماشي أنا معاكي” ، مش عارفة إزاي بجد أنا توهمت إنه قال لي ماشي وعشان المنحوس منحوس جدة كوكو كمان طلعت مشغولة جداً وغير متاحة إطلاقاً، من غير ما أدوشكوا بالتفاصيل .. أنا وحدي وحدي يا ليالي

الظاهر إن الحشيش اللي بيشربه غفير الخرابة اللي ورانا كان مأثر عليّ يوم الخطة اللي متخرش المية اللي حاطيتها، مش عارفة أعمل إيه دلوقت مع الكم المهول من العياط ومقاومة النوم مع أني بقعد بالساعتين مخفضة النور خالص وحمام دافي أكلة مشبعة ولعب هادي وقصص قبل النوم ومئات المرات من أغنية يا رب كوكو تنام وادبح لها جوز حمام وبرضه مفيش فائدة.

بدفع تمن سوء تنسيقي مع أبو كوكو وجدتها مر ومفيش مجال للرجعة يا إلا ببقي كدة بوصل لكوكو رسالة واضحة بإنها بس تركز في الزن والعياط وإن شاء الله ربنا حيكرمها وكل طلباتها متبقي مجابة، دا غير إن أنا فعلاً مقتنعة إن الأطفال بيمشوا علي حسب ما تعوديهم بدليل إن بعد ١٣ شهر كوكو بتشوفني أنا و أبوها بنعمل نفس الفعل ٥ مرات في اليوم دلوقتي أول ما تقوليلها " الله أكبر" تلاقيها سجدت علي طول ... هييه صبرني يا رب و ما نقعدش ١٣ شهر زيهم عشان لما أقولها نامي تنام

كوكو لا تأكل البيض

مفيش مشكلة موجودة في كتاب إلا وكوكو لازم تمر بيها. ماشاء الله عليها مذاكره كويس أوي يعني الفترة اللي تمت فيها سنه أنا كنت مجهزة نفسي انها تمر بفترة فقدان شهية وكنت مستعدة حعمل إيه معاها.ما بحاولش في الأيام اللي نفسها مقفولة فيها ابقي طماعة لو طبق مهلبية وطبق مكرونة اسباجتي باللحمة المفرومة وجزراية مطبوخة مكعبات  وحتتين جبنة نستو مع شريحة طماطم يبقي ألف حمد وشكر ليك يا رب مجييش بقي اعملها خضار ولا سمك واتضايق إنها مابتاكلش وبرضه ما اعملهاش بطاطس محمرة  ولا بسكوت وأتضايق إنها ما بتاكلش حاجة مفيدة.هي اللي نجحت معايا بالتجربة عرفت إن كوكو أول ما بتصحي من النوم مبيبقاش لها نفس تأكل. أسرح لها وأغير لها وأسيبها تلعب شوية وبعد كدة أخدها معايا المطبخ أحضر لها الفطار. متعب موضوع تحضير الأكل وهي معايا دا بس لاحظت إن عملية تحضير الأكل دي بتجري ريقها وبتبقي عايزة تجرب الأكل دا .فطار خفيف وبعدها بساعة ونص سناك خفيفة وهكذا في كل الوجبات أحسن طريقة بالنسبة لواحدة زي كوكو مش بتستحمل تقعد أكتر من ٥ دقايق على بعض في حتة.سياسة التجويع نفعت معايا في الفترات اللي بتبقي فيها متقلبة ومش مفهوم لها حال لكن في الأيام العادية. بلاحظ إنها بتفضل الروتين وإنها تبقي عارفة ومتوقعة حتاكل إمتيتخصيص مكانين معينين للأكل كرسي وتربيزة هم دول بس بتوع الأكل ولو مش عاجبك مفيش أكل خالص أنهي المسخرة اللي كانت بتحصل كل وجبة تقعد تجري وأنا أجري وراها بالطبق، صحيح الحزم في إن “الأكل هنا وإلا مفيش” كان نتيجته يومين من غير أكل تقريباً لكن في الآخر استسلمت لنداء البطون وعرفت إن لو هي عايزة تأكل يبقي لازم تستحمل تقعد ربع ساعة في مكان معين لحد ما تشبع وبعدها نقدر نكمل لعب.محاولة الأكل وكوكو مودها مقريف أو دخلت في طور الزن بتاع النوم ضرب ممن الخيال والتهريج على شوية عك وأكل مهروس في الأرض، الحل الوحيد هو أني أرضعها وأسيبها يا تنام يا تفوق وتفرفش وبعدها أحاول تاني. طبعاً لو دا حصل قبل النوم وماكلتش ودخلنا في القريفة قبل العشا يبقي أنا كدة ليلتي بخ.. إتضربت.. ماليش حل غير إني أدوب شوية بسكويت في لبن في ببرونة وأنا وحظي بقي.فيه أمهات خارقات بيعرفوا يأكلوا ولادهم علي حجرهم وبيعرفوا يأكلوهم بيض. مش دول اللي بوجه لهم الكلام دول قدارتهم عالية أوي أنا بوجه كلامي للغلابة اللي زي حالاتي اللي ياما اتف علي وشوشهم واتهرس في شعرهم البيض سواء كان أومليت أو مسلوق أو أياً كان.كوكو لا تأكل البيض دي حقيقة كونية أقوي مني ومنك، لحد ما لقيت الوصفة السحرية دي اللي خلقتها تاخد احتياجها اليومي من البيض في شكل سناك خفيفة مشبعة... هم في الحقيقة وصفتين توست بالموز وخبز بالبيض خطيرة مفيش طفل بيقول عليها لاء طبعاً إنتي لو شطورة في المطبخ تقدري تزودي وتخترعي وصفات بنفس الطريقة ... أما بقي لو ابنك مرضيش ياكل إلا التوست بالموز فمعلش دا مش طفل طبيعي لك الله يا بنتي

تزغيط الكوكو

مفيش حاجة حاولت اعملها صح زي تأكيل كوكو ، دائماً بحاول  أأكلها صح أخد بالي يكون الأكل صحي وأعودها علي عادات سليمة وصحية ... طبعاً أي متابع لي عارف إن مفيش حاجة عند كوكو بتمشي بسهولة كدة مش حقولها خدي بسلة ورز يا حبيبتي تقولي حاضر يا مامادا سيرك حقيقي ،مارثون سباق مين فينا أذكي وأقوي ... ماشي ممكن تكون هي غالباني في حاجات كتير (زي النوم مثلاً ) بس المرة دي انا غالباها تثبيت أكتاف نياهاهاهاالموضوع اصله عندي هوس شخصي، أنا عندي عقدة تجاه الحياة الغير صحية وعادات أكلنا الزفت و أعتقد ان كل واحدة فينا يبقي عندها حاجة كدة بتاعتها اللي ممشياها مثالية نتيجة لهوس شخصي و الباقي ممكن تماين عليه و تعمل نفسها مش واخدة بالها المسألة من الاخر أولويات (بتهيألي يعني)هو صحيح المفروض إن كل حاجة تبقي مثالية مش الأكل بس أو النوم بس بس سيبكوا أنتو من كلام الخبراء اللي ايده في مية باردة مش زي اللي مفتوح عليه النار من كل ناحية .. كله ضرب ضربعن نفسي التكنيك اللي بمشي عليه أني بدرب القرد علي حاجة حاجة .. يعني لو بظبط عادات سليمة للأكل خلاص يبقي هو دا هدف الأسبوع لو بدربها علي الاستحمام مثلا واعودها علي المياه خلاص يبقي هي دي الحاجة الجديدة و بس ، اصل بعيد عنكو كوكو حساسة ومتستحملش الضغط العصبي و النفسي الزيادة (مسم)بالنسبة للأكل بقي انا كنت ماكنتش مستعجلة عليه خالص يعني علي ٤ شهور كدة بس عرفتها ان المعلقة دي حاجة الناس بتآكل بيها .. معلقة زبادي هنا علي معلقة سيرلاك رز هناك لحد ما تمت ٦ شهور ابتديت معاها براحة كدة اعملها بطاطس وجزر وفراخ والزبادي و السيرلاك وصفار البيض و الفواكهمشكلة السن دا انك بتبقي مقيدة جداً في الانواع والإضافات اللي ممكن تحطيها علي الأكل عشان يبقي طعمه حلو، طبعاً الملح و السكر والعسل ممنوعين من مطبخي فكنت ببتكر طرق تخلي الأكل له طعم من غير ملحفيعني مثلا انك تشوحي الخضار والفراخ قبل ما تسلقيهم في بصلة مبشورة أو توم بمعلقة شاي زيت درة أو زيتون تدي الأكل طعم .. الكمون والزعتر وتوابل كتيرة مسموحة لما قبل سنةلازم كل فترة كانت كوكو تمر بمرحلة الأكلة الواحدة .. الزبادي إذاً فهو الزبادي و لا شئ غير الزبادي ، خلاص يا باشا حط كل حاجة جوا كوباية الزبادي بس افرميها بالكبة عشان تبقي ناعمة و"تتزلط" في قلب الزبادي أيام التسنين قرف علي دماغنا طبعا غير الزن والقريفة والسخونية بتبقي ايام مفيش أكل فيها، اخر مرة تسنين لكوكو اخدت بالي انها مش طايقةا لأكل عشان دافي لما بطلعه من الثلاجة بتاكله و طبعاً اكلها المفضل بيبقي السوائل الباردة والفواكه وسلطة خضرا (بالذات الخيار)بعملها برضه الشنينة (اختراع سوري كدة زبادي مضروب ب مية و شوية ملح ) مع عدم اضافة الملح طبعا و اشربها في الببرونة و كنت كل العصاير في مرحلة ما قبل اللبن البقري بعملها بالزبادي المخفف بالميه موز بقي وجوافة وفراولةكوكو عمرها ما رضيت تشرب شوربة خضار بس شوفت أمهات بيهرسوا الخضار ويحطوه بالشوربة في ببرونة (حلمتها مقصوصة طبعاً)عمري ما عرفت أاكل كوكو وهي علي حجري (الأمهات اللي بيعرفوا يكتفوا ولادهم دول بالنسبة لي خارقين) جبت لها مشاية استخدمتها كرسي اكل بس النتيجة انها كرهت المشاية و اول ما عرفت تطلع منها طلعت (و دا درس مفيد انك متخليش حاجة واحدة لها كذا استخدام خصوصاً لو واحد منهم مش لطيف بالنسبة للأطفال المشاية مكان للأكل أو السرير مكان للعقاب )بعد كدة علي سن سنة جبت لها كرسي الأكل العالي و لأن دوام الحال محال اتغير كل الكلام دا لما تمت سنة و بقي فيه حمادة تاني خالص