أسوأ فترة ممكن تعدي
علي علاقتي بكوكو لما أكون أنا وهي عيانين وقاعدين لوحدنا في البيت. بنبقي علي شفا
الطلاق (لو كان شئ زي دا ممكن!). أنا عييت وأنا مش المفروض أعيي، لأن العقد بيقول
غير اني 20 ساعة صاحية أنا مش مسموح لي بأجازات مرضية! مفيش
call for sick ، لا وانت عيانة انت
بتطبخي وبتنضفي وبتخدمي علي بنتك العيانة زيك.
كوكو عيانة، و زي كل
مرة لما بتعيي قلبي بيتوجع مع كل كحة ببلغم وبحس بالفشل كأم معرفتش تحمي بنتها من
المرض مع كل مرة بترجع فيها، أنا كمان عيانة وانت كنت مسمحتش لنفسي أول
يومين اني استسلم للحقيقة دي، حتي الكحة كنت بكتمها، مفيش وقت فيه بنت
تعبانة و مقريفة في البيت ،نفسها مسدودة و عنيها مدعبلة (زي ما جدتها بتقول).
وكان بشر ! علي اليوم
التالت من غير ما ارتاح لقيت نفسي ابتدت أزهق.. اوي ! و صوت زنَها بيَتك علي
أعصابي بزيادة وطلباتها اللي بتضمن اني أقوم اعملها حاجة كل 3 دقايق وأنا شايلاها
ضغطت عليَ جدا. ابتديت افقد أعصابي بسهولة، ابتديت أصرخ، صداع متواصل، الدوا مش
بيعملي حاجة عايزة افرد جسمي حرام كدة بقي
اضطرينا نبدأ مضاد حيوي
لكوكو، ربنا يجازي الشركة اللي عملته طعمه شيطاني أنا نفسي لما دقته قعدت ادبدب في
الأرض من مرارته، الدوا دا المفروض ناخده 3 مرات في اليوم، كوكو أصلا طفلة مرعبة
بتحب الأدوية جدا وكانت بتعيط بالدموع لو شافت انتينال أو سيتال ومرضاش ادي لها
منهم، عشان كدة أول 3 جرعات عدت بسلام كل مرة كانت بتفتكره من الأدوية الحلوة اللي
بتحبها، لحد ما حفظت شكله وابديت أضطر اكتفها. الجرعة الليلة قبل النوم كنت أنا
وصلت لقمة تعبي وكل جسمي وجعني جدا، جيت أكتفها مكنتش بالقوة الكافية اني اسيطر
عليها وتفت الدوا 4مرات
مكرهتش نفسي قبل كدة قد
النهاردة، فقدت اعصابي تماما، فقدت تحكمي في نفسي مش قادرة أستحمل أكتر من كدة.
اللي عملته معتقدش اني حقدر أسامح نفسي عليه بسهولة، في النهاية البنت رجعت
ونامت وقطعت قلبي مع كل طبطبة علي ضهرها تتنفض وتعيط
قضيت ساعتين وهي نايمة
بعيَط جنبها، حسيت اني وحشة اوي.. اوي ،البنت ذبنها ايه الدوا فعلا لا يطاق ولسه
هي مش في السن انها تفهم ضرورة انها تاخده وأكلمها بالمنطق. دورت علي طرق بديلة
لأخد الدوا والأمهات بيعملوا ايه،بعد سؤال جوجل وقرايبي لقيت الآتي:
• معلقة عسل – مصاصة – ايس كريم قبل الدوا
مباشرة عشان ميحسش بطعمه علي لسانه
• بتنفخ في وشه عشان يبلع
( بتقول انها حركة اتعلمتها من المستشفي)
• تشجيع وتصقيف وتهليل مع
كل جرعة دواء
• بيتحط الدوا في قلب
عصير ( جربتها الحركة دي بس طعم الدوا بوظ العصير كله بقولكم والله شيطاني ، دا
غير نصحتني دكتورة في العيلة ان تأثير الدواء كدة بيقل و مش بيبقي بنفس الفعالية )
• بسرنجة في جنب بقها و
اضرب الجرعة مرة واحدة
وكان الاقتراح الأكثر
واقعية اني أدور علي نفس المادة الفعالة دي في أي شركة تانية يكون طعم دواها أفضل،
قررت ساعتها بعد تجربة فلومكس المريرة اني حفتح ملف كتابة علي جوجل واسجل تاريخ
كوكو المرضي والأدوية اللي جابت نتيجة سريعة معاها والأدوية اللي فشلت معاها. أكيد
أنا لا يمكن أنسي ان الفلومكس دا طلع أسوأ ما فيَ بس ممكن أنسي ان البديل له بنفس
المادة الفعالة وله طعم الفراولة اسمه سيكلور وانسي ان البلغم ما اتحسنش غير لما جبت
لها لبوس من مكونات طبيعية طارد للبلغم اسمه كوف سيد.
بس برضه انا مش عارفة
أسامح نفسي ازاي.. بجد مش عارفة !
ليست هناك تعليقات:
إرسال تعليق