حضانة حبي أنا

سجلي يا نفس, في اليوم اللي قررت فيه أتباهي بنجاحي مع كوكو و إني عرفت أخلي الحضانة مكان لطيف بتمضي فيه وقت مع الأطفال واللعب هو هواه نفس اليوم اللي كوكو أول ما شافت الحضانة لأول مرة من ساعة ما روحناها صرخت و قعدت تعيط ! 

أجمل حاجة في الخلفة انها بتكسر تماما خيلاء النفس, لا يمكن تلاقي أم متكبرة أو فرحانة بنفسها, أنت أم إذا أنت حاسة بالتقصير تجاه شئ ما طول الوقت, تيجي تعدليها من ناحية تلاقيها بظت من الناحية التانية. 

ماشي يا ست كوكو أنا مش حتكلم بفخر عن نجاحي بس ممكن أنقل حتي تجربة الحضانة, من أول الصيف كدة جدة كوكو كانت قلقانة جدا عليها و علي تأخرها في الكلام ومصرة إننا لازم نوديها أي حضانة يعلموها الكلام, أنا إكتشفت أيامها ان مش كوكو بس اللي عندها separation anxiety  و مش هي لوحدها اللي عندها مشكلة في الفراق, أنا كمان مش مصدقة ان ممكن حد يعرف يفهمها زيي . أنا إكتشفت ان الشمس بتشرق من الشرق و إن كوكو علي كتفي,دي حقيقة كونية أنا محتاجة علاج نفسي عشان حد يقنعني بغير كدة 

المهم ماطلت في موضوع الحضانة شوية لحد ما مريت بالصدفة علي حضانة فتحتها زميلة لي في الكلية فأعجبت جدا بالنظام اللي هي عاملاه وأكتر حاجة عجبتني انهم بيسيبوا الأم تقعد مع ابنها زي ما هي عايزة لحد ما هم الأتنين يتعودوا علي الوضع الجديد 

أنا قعدت مع كوكو الأسبوع الأول كله واتعملت ألعب بالبازل و في بيت الكور وعلي المراجيح, حاولت أفهمها ان الحضانة دي مكان زيه زي النادي بنروح نعلب فيه ونقضي وقت لطيف, كان يهمني أوي يوصلها وأفضل أنا كمان فاكرة إن الحضانة مش المكان اللي برميها فيه و أروح أشوف مصالحي. 

كوكو أولا... الحضانة ممكن بسهولة تتحول بالنسبة لي إلي الأم البديلة أي وقت عايزة أرمي فيه كوكو هوب علي الحضانة, وتبقي هي دي بداية النهاية. أنا مش حدَعي المثالية طبعا بعد ما اتعالجت نفسيا وصدقت ان كوكو ممكن حد تاني غيري يعرف يلاعبها و يأكلها ويغيرلها وإني مطلعتش حقيقة كونية زي الشمس اكتشفت إمكانيات العالم من غير كوكو علي كتفي. اكتشفت إني ممكن أروح النادي ,ألعب رياضة, أشتغل, أطبخ, أنام  ! أعمل أي حاجة في التو واللحظة من غير ما أبقي مربوطة بكوكو و رجعت أنجز اللي ورايا بسرعة وفاعلية تاني. 

صدقوني الإحساس دي مغري جدا بتكراره, و طبعا الأم اللي محتاجة تودي بنتها الحضانة عشان الشغل بالنسبة لها الضغط والالتزام مضاعف, بس أنا قررت عشان منجرفش بهوي نفسي إني أحط دايما في دماغي ان كوكو أولا  , ماتنسيش يا بت يا أم كوكو ان كوكو راحت الحضانة عشان تنبسط وعشان تتعلم الكلام وعشان تختلط بأطفال في سنها مش عشان انت تلاقي وقت لنفسك. والله لو هي راحت الحضانة وإنسجمت هناك كان بها من حقك تكافئي نفسك ولو محصلش ارجعوا علي البيت أو افضلي معاها في الحضانة متسبيهاش وتمشي 

كل يوم الصبح أفكر نفسي بالكلمتين دول قبل ما دماغي تودي وتجيب بالخطط العظيمة اللي حعملها أول ما كوكو تروح الحضانة وبالهوايل اللي حسويها بمجرد ما أرجع البيت ايدي فاضية. 

إلي يومنا هذا بعد مرور أكتر من 6  شهور كوكو مورتنيش اليوم اللي –بسم الله ما شاء الله – بشوفه في أطفال تانين بمنتهي الهدوء بيودعوا أمهاتهم علي باب الحضانة ويدخلوا يجروا علي المراجيح .. نووو مش كوكو أبدا, كوكو بتحب الحضانة بس برضه بتحب وجود ماما في الحضانة ليه ماما تمشي لما ممكن تقعد معايا هي كمان في الحضانة وراها ايه يعني. يوميا بننفذ خطط جهنمية أنا وصاحبة الحضانة في فصلي عن كوكو بالتي هي أحسن, أقعد معاها ألعب بالبازل وبعدها تقوم مع الأطفال علي المراجيح فأقترح عليها أطلع أشتري لها عصير فتسبني اروح أجيب لها العصير ابعت لها مع الميس العصير بتاع ماما وأفضل أنا برة أتأكد انها معيتطش لو عدت بسلام يبقي إفراج ,لو عياط يبقي أدخلها تاني و ننفذ خطة جهنمية تانية وهكذا... 

لحد ما أعرف ايه اللي عيَطها النهاردة وخلاها تقول لا علي الحضانة, الحمد لله تجربة الحضانة حلوة طالما أصحابها صبورين علي الأطفال وبيتفهموا شخصية كل طفل عندهم, والمكان نضيف ومناسب للأطفال فيه لعب ومساحة يجروا وينطلقوا فيها مش مقعدينهم علي ديسكات زي المدارس, و أهم حاجة ان الطفل يبقي حاسس انه بيروح يلعب مش بيروح يتحرم من أهله أو بيتعاقب بالحضانة. ادعولي بس كوكو ترجع تحب الحضانة تاني أحسن حزعل أوي لو حرنت عليها وقفلنا الصفحة دي من حياتنا 

البومة الصباحية

من كام يوم كدة اتنشرت مقالة في سوبر ماما بقلم هدي الرافعي عن كيفية التحول لشخص صباحي في 7 خطوات، فحبيت انقل لكم تجربتي في التحول من بومة ليلية عاشقة للنوم لكائن صباحي بيمثل انه منتعش. مفيش أي مبالغة في وصفي بالبومة أنا فعلا كنت كائن ليلي بيفوق و يبدأ يومه مع غروب الشمس، من أسباب دهولتي في الكلية اني ماكنتش بعتبها قبل صلاة الضهر. ماكنتش أعرف شكل الدكاترة بتوع محاضرات 8 الصبح إلا أيام أمتحانات الشفوي.

بعد الجواز الموضوع تفاقم خصوصا اني قاعدة في البيت ماإشتغلتش فبقيت بصحي متأفئفة قبل ميعاد رجوع أبو كوكو بساعة أشقلب أي حاجة علي الغدا 

ماليش أنا وكوكو أي مواعيد نوم ولا صحيان ممكن في يوم ننام الفجر و ممكن في يوم ننام 6 و 10 الصبح كمان. لو بتعتبري نفسك عايشة في مسخرة عشان بتصحي واحدة الضهر فأنا كنت بصحي اتنين وتلاتة وممكن أكمل للمغرب كمان. 

هل دي كانت حياة صحية؟

في الحقيقة مش عارفة أنا مش حاسة بتحسن في صحتي، لسه الهالات السودا اللي تحت عيني هي هي ولسه والتعب موجود. بس اللي فرق معايا فعلا صحتي النفسية، لما تحولت لكائن صباحي ليله نوم وسكون و نهاره معاش زي ما ربنا أراد لنا حسيت ببراح في الوقت و قدرة علي اني أعمل حاجة غير اني بكنس و أمسح وأطبخ و أبقي تحت أمر الست. مثلا عشان بصحي بسهولة سابعة الصبح قدرت أواظب في تدريب السباحة و اتعلم أعوم قبل ما ابقي شعري شايب وانا لسه بغرق في شبر مية 

مثلا بصحي أوضب بيتي وأشوف شغلي علي النت و كتاباتي واجهز للغذا  لو كنت حنزل السوق و و و وألاقي لسه الساعة مجاتش واحدة الضهر وممكن لسه أعمل حاجات كتير قدامي، الميزة الأهم والأكبر اني باجي علي 11 ولا 12 بليل ابقي منتهية و أسقط علي السرير مهما كوكو هبدت علي راسي ولا زنت جنبي عشان لسه مش عايزة تنام لأي سبب ببقي وصلت لمرحلة من الارهاق اني فعلا لا سامعاها ولا حاسة بيها من أساسه، مش زي لما كنا ندخل ننام سوا و أنا كابس عليَ النوم بس لسه ممكن أسهر شوية فزنها يصدعني ويتعبني لا خالص مبقتش أصلا أحس بيها.

أما بالنسبة لكوكو فبالتأكيد النوم والصحيان بدري فرق جدا معاها في الشهية وانتظام بطنها و نوعا ما أعتقد انه بيفرق معاها لما تصحي بدري (وهي نايمة كويس طبعا) بتبقي أمورة و لطيفة لمدة 35 ثانية زيادة

طيب عملت كدة ازاي؟

ايه السر؟ أولا بأسلوب حياتي القديمة ماكنتش بشوف أبو كوكو  خالص، أي حد كان بيسألني عليه كنت برد" مش عارفة والله ابقوا سلمولي عليه "ومكنتش بلحق أعمل أي حاجة تستدعي خروج من البيت، وأحلامي المتعلقة بالشغل أو حياة مهنية علي قدها كانت بتصتدم بمشكلة طب بس أصحي من النوم الأول. جات عليَ لحظة كدة انه "فاض الكيل " المشكلة دي لازم تتحل .. بمعني أخر بقي عندي إرادة ! 

ثانيا حاولت كتير في كل طرق النوم والصحيان اني أطبق و إني أنام من بدري و أنا لسه مش كابس عليَ النوم منفعش معايا غير طريقتين.

أولا المنبة كل يوم مضبوط علي الساعة 7 ونص الصبح أيا كان بقي أنا نمت أمتي مع الوقت بقيت بصحي لوحدي حتي لو كنت لسه عايزة أنا بس برضه بقلق. و الحاجة التانية اني بضبط المنبة علي انه يضرب في نهاية الsleep cycle  مش في نصها 

الsleep cycle  أو دورة النوم هي في المعتاد بتبقي 90 دقيقة من فترات نشاط وخمول بتتكرر بشكل دوري، انت ساعات تقومي من نص النوم فايقة جدا و ساعات تقومي دايخة وحتقعي من طولك المسألة مش انك بس أخدتي كفايتك من النوم ولا لأ المسألة متعلقة أكتر بأنك صيحتي في أنهي مرحلة من دورة النوم اللي كنتي فيها، أسهل وقت تصحي فيه هو مضاعفات ال90 دقيقة عن تجربة لو نمت مثلا 4 ساعات بصحي مضروبة ميت جذمة قديمة لكن لو نمت اربع ساعات ونص( 90 دقيقة *3)  صحياني بيبقي أسهل بكتير لأني مقطعتش نومي في نص دورته.

ثالثا كنت بلزم نفسي كل يوم أنزل تراك النادي، بصوا الإنسان دعييف ، اه والله ،أنا مش حترفد من شغل لو مقمتش فجات عليَ أيام كتير بقول فيها "نص ساعة كمان" و أكمل نوم.

لا مفيش نص ساعة قومي إلبسي و أنزلي أجري شوية ولا انزلي هاتي فطار وعيش صابح من الفرن ولا أعملي حاجة في البيت مضطرة تقعدي لها لحد ما يبقي جسمك متعود انه لو نام بعد الساعة تسعة يحس ان كدة بقي حاجة غريبة جدا و انه راحت عليه نومة 

دي كانت حكايتي مع التحول من بومة ليلية لكائن صباحي، لسه صحيح ساعات بنهار و أنام لحد عشرة الصبح بس أعتقد ان بعد اللي حكيته دا كدة يعتبر إنجاز كبير، وانتم ؟؟ حد قدر يتحول ويبطل سهر قدام التليفزيون و اللابتوب، لو لسه جربوا طريقتي و حتدعولي  

البي بي في أسبوع

دوينة السبع أيام (انه زمن التواليت) 

اليوم الأول:

كتبوا كتير ازاي تعرفي ان بنتك مستعدة لخطوة جديدة في مراحل تطورها وتخليها عن البامبرز بس محدش جاب سيرة ازاي الأم تستعد نفسيا و تتقبل فكرة انها ياما حتمسح في بي بي

كوكو رجعت من الحضانة و كالعادة بمجرد ما رجلها خطت عتبة البيت قلعت البامبزر و انطقلت يا مولاي كما خلقتني, أبوها علق مش يلا بقي احنا مستنين ايه الشتا قرب.

أتحرري من كل الزيف. كوكو فاهمة كويسة انها بتعمل بيبي و بمجرد ما تعمله في البامبرز بتقلعه أما البوبو فتاخد جنب بعيد ومتسمحش لحد يقرب لها ساعتها و بتعرف تمسك نفسها وبتقول انها عملت, سو.. واضح جدا انها علي الأقل جسديا قادرة علي التحكم في نفسها ونفسيا مستعدة للتخلي عن البامبرز أو تعرف مكان بديل 

سيبتها من غيره و قلت لها انت بنتوتة كبيرة زي ماما و عرفتها علي التواليت انه دا المكان اللي حنعمل فيه البيبي بعد كدة, استنينا ست ساعات كدة و جربنا كتير نقعد علي التواليت في الأخر عملت ورا الكنبة

اليوم الثاني

تعلم التواليت كتعلم المشي محدش بيضرب ابنه عشان وقع علي الأرض بالعكس دايما بتمد له ايد تطبطب عليه وتاخد بإيده ... الصبر من عندك يا رب 

نفس الوضع بتقعد علي التواليت وتقوم تعمل علي الأرض, بدأت عملية البحث المكوكي علي جوجل عن تشجيع الأطفال علي التواليت فتحنا فيديوهات اتفرجنا علي توم وجيري و أكلنا شكولاتة وعصير  نزلتها تنقي بنفسها قاعدة تواليت جديدة هي اللي تختارها عشان اللي كنا جايبنها لسبب مجهول كانت بتخاف منها وبرضه لا حياة لمن تنادي

اليوم الثالث

 فلا نزل القطر 

كوكو قررت انها مش حتعمل بيبي خالص خلاص بتحظر نفسها بال12 وال13 ساعة شوفت علي النت كتب للأطفال عن تعليم البوتي أشهرهم everybody poop  فأوحي لي بفكرة أغنية ألفتها لها  "كل الناس بتعمل بي بي في التواليت " بأكد لها فيها ان كل المعارف والأقارب والأصحاب والحيوانات وأي كائن حي متحرك تعرفه بيعمل بي بي في التواليت.. بتحب تسمعها أوي وبتطلب أسامي معينة تسمعها ههه يا تري الجيران بيقولوا عليَ ايه دلوقتي ؟

ًاليوم الرابع صباحا

Basically actually it is like you know انا مش عارفة أعمل ايه شكلنا كدة حنموت منفجرين  

نفس الوضع مفيش بيبي  خالص من أمبارح بليل أنا مش عارفة أعمل ايه, علي الساعة ثلاثة البنت كانت بتصرخ و من ألم ما كتر ما حظرت نفسها و هستريا عياط ورفض لأي مكان تسيب فيه نفسها غير البامبرز. أبوها لازم يجيي حالا يشوف أنا خلاص حوقف البنت مش مستعدة نفسيا لسه كدة تعذيب  

يا كوكو كُل منْ في حِماكَ يهواك لَكنْ أنا وحدي بكُل منْ في حِماك

بنتي في خطر! حيجري لها حاجة لازم أتصرف, دخلت بيها الحمام وقفلت علينا احنا الاتنين ومطلعناش من جوا إلا والمهمة أنجزت. أما عن طريقة انجازها فدا سر محدش حيعرفه غيري أنا وهي ومن يعلم السر وما أخفي

اليوم الرابع مساءً

الحمد لله الذي هدانا وما كنا لنهتدي لولا ان هدانا الله

كنت بحكَي مع جدي عن كوكو وإني يأست ومستنية باباها يرجع عشان نوقف التدريب و ما نحاولش بقي قبل الربيع الجاي فكرني بفيلم Look who is talking اللي كان فيه البطل وراوي الفيلم طفل أقل من سنتين مابيتكلمش, جدي لفت انتباهه لما كان الطفل (بطل الفيلم) بيقول علي البي بي بتاعه انه جزء منه ازاي بيطالبوه يرميه في المكان المخيف دا (التواليت) ويروح بعيد عنه  

أنا عارفة ان مشكلة كوكو نفسية وانها متحكمة تماما (بشكل اوفر) في مثانتها الفكرة في عدم تقبلها انها تسيب نفسها في التواليت, ماشي خلينا نمشي ورا كلام الفيلم و أشرح لها ميكازم الإخراج بشكل مبسط . 

عملت لها عروسة مرتجلة خرمتها من بقها ومن تحت ودخلت فيها شاليموه وبسرنجة قعدت أفهمها ان لما بناكل أو بنشرب المياة دي بتدخل جسمنا و بعدين بتعوز تطلع تروح باي في التواليت 

فننزلها و نقولها باي باي مع السلامة ونشد السيفون و نلزق ستيكر علي ضهر التواليت, 

تنويه واعتراف: أنا نهي الجندي أم المدعوة كوكو بقدم خالص اعتذاري لكل الحملات السياسية اللي تعبوا نفسهم ووزعوا علينا ملصقات كان مصيرها النهائي انها اتلزقت علي ضهر التواليت ارضاءا لست كوكو هانم  

 اليوم الخامس

إن الله مع الصابرين ... إذا صبروا 

كوكو استجمت من فكرة الستكر و كل شوية تاخد العروسة تخليها تعمل بي بي بس برضه بتمسك نفسها بساعات طويلة جدا، كلمت الدكتور أسأله ان كان فيه ضرر كدة عليها قال لي أسيبها تاخد وقتها براحتها تماما ان شاء الله ماتعملش يومين ورا بعض المهم انها نفسيا تستريح و ماتعملش حاجة مغصوبة عليها .. الصبر من عندك يا رب 

اليوم السادس: 

What happens in Vegas stays in Vegas 

تجمع عائلي كبير فيه كل الناس اللي كوكو متعودة عليهم وبتحبهم اليوم دا حصل فيه فضائح لا داعي لذكرها بس النتيجة النهائية انها عرفت ان فعلا كل الناس بتعمل بي بي في التواليت 

بليل صحت نفسها عشان تدخل الحمام في النص ... أنا مبسوطة 

اليوم السابع:

ثوار أحرار حنكمل المشوار

خلاص كدة الحمدلله الأمور استقرت. طبعا أنا متوقعة حوادث، كوكو حتزهق من لعبة الاستيكرز أو حتندمج و هي راكبة الفيل بتاعها فحتكسل تقول أو حنبقي في الشارع والأماكن العامة مش حتسعفني أو الدنيا برد و حيبقي صعب عليها أو أو أو احتمالات الحوادث كتيرة ومتنوعة بس أنا نفسيا بقيت متقبلاها أنا حاسة بإنتصار كبير، الأيام اللي فاتت دي من أصعب الأيام اللي عدت عليَ في حياتي ورأيي الخاص ان تدريب التواليت أصعب بمراحل من الفطام بس الحمدلله اللي جبر بخاطري ونجحني بالمدد والهداية منه سبحانه .. الحمد لله

لأ دي بتاعتي : قواعد الملكية

1. لو عجبتني تبقي بتاعتي

2. لو مسكتها في ايدي بقت خلاص بتاعتي 

3. لو أقدر اخدها منك تبقي بتاعتي 

4. لو كنت ماسكها من شوية بقت خلاص بتاعتي

5. لو هي بتاعتي يبقي أياك تقرب منها 

6. لو بعمل أي حاجة أو بركب المكعبات يبقي كل القطع بتاعتي

7. لو اللعبة بتاعتك شبه اللعبة بتاعتي . تبقي بتاعتي 

8. لو شفتها الأول تبقي بتاعتي

9. لو كنت بتلعب بحاجة و سبتها،خلاص بشكل اوتماتيكي بقت بتاعتي

10 لو الحاجة دي اتكسرت خلاص بقت بتاعتك 

كاتبة مجهولة ارست القواعد العشرة في قاموس تعامل الأطفال في سن ما قبل دخول المدرسة، قواعد حقيقية بشكل مخيف ومثيرة للشفقة علي الأمهات اللي بيضطروا يوميا التعامل مع القواعد الغير عادلة دي وفض الإشتباك والفصل بين قوات المعركة

محاولات لاتنتهي لإقناع كوكو إن الفيل اللي معروض علي باب المحل مش هو الفيل بتاعها اللي في البيت , لا الراجل راضي يدخل الفيل جوا المحل ولا كوكو راضية تقتنع ان الفيل دا مش بتاعها اللي في البيت! 

المشكلة –لو اعتبرناها مشكلة- عند كوكو مش في – الاحتكار- اي عدم الرغبة في المشاركة زي ما هو معتاد عند الأطفال اللي في سنها. القضية هي إثبات حق الملكية، بمعني إن حاجة ماما بتاعة ماما بس و حاجات بابا بتاعة بابا بس وحاجات كوكو بتاعة كوكو بس

مش مسموح لبابا يمسك فرشة الشعر بتاعة ماما أو غير مقبول بتاتا ان ماما تشرب في فنجان القهوة اللي بابا معتاد يشرب فيه و لو جرؤت علي فعلة شنيعة زي دي تصرخ بإحتجاج "بابا بابا" و تشاور ان "الفنجان دا بتاع بابا انت اتجننتي ولا ايه" لو جاريتها و سبت الفنجان تهز في راسها و تقعد تكلم نفسها بلغتها الخاصة انه "أيوة كدة انت تلتزمي بمطرحك و هو ملتزم بمطرحه و كلنا نلتزم بمطارحنا والله الموفق والمستعان".

لكن لو مطاوعتهاش وفهمتها ان مفيهاش حاجة لأن ماما مستأذنة بابا انها تستعمل الكوباية بتاعته تفضل تبرطم وتصب عليَ اللعنات بوقوع الأجرام السماوية فوق دماغي نتيجة لإستهتاري بالقواعد اللي هي قررت تحطها  

 لكن طبعا كوكو مسموح لها تمسك حاجتنا كلنا لكن بطريقة مصاصي الدماء اللي مايدخلوش مكان اللي بدعوة هي برضه ما تعتبرش الحاجة بتاعتي بتاعتها أو حق مكتسب من حقوقها إلا لو أنا غلطت وسمحت لها  في الأول، حاليا موبايلي دا ممكن تعتبروه بوتاجاز أو نملية أو أي شئ مشاع غير كونه موبايل علي عكس  موبايل بابا دا حلم بعيد المنال بالنسبة لها   

حضرت في الحضانة عشرات الخناقات علي دي بتاعتي لا دي بتاعتي، الشد والجذب والعياط والمحايلات شئ متوقع تماما طالما انت في مكان فيه أطفال ولعب.

كوكو بقي رد فعلها تجاه الحاجات دي مختلف نوعا ما، مثلا هي بتلعب بازل فتيجي بنت أكبر منها تركب قطعة أو قطعتين لأن كوكو بالنسبة لها بطيئة والبنت عرفت الحل و ايدها بتاكلها مش قادرة تمسك نفسه، رد كوكو يبقي بمنتهي الهدوء والإصرار انها تفك القطتعين اللي اتركبوا و تعيد من الأول, مهما الأطفال حاولوا يشاركوها البازل كل قطعة اتركبت بإيد غير إيدها تشيلها و تركبها هي بنفسها لحد ما اللوحة بحمد الله تكتمل خلاص بقي كدة تسيبها وعلي وشها نظرة " تقدروا تتفضلوا تلعبوا بعيد عني يا غجر"