كرنفال الفطام

" ليه الدنيا قاسية علي" كانت نظرة عين كوكو عندما عرضت عليها صدري مغطي بالزنجبيل مع التمهيد ان ماما عندها يععع و كخ. لم تبكي و لم تلومني علي وجود اليع الذي أنفت ان تجربه من رائحته و منظره المقشر علي, لكن نظرة عينيها كسرت قلبي لذا قررت أن أنفذ أسلوب جديد في الفطام و هو أن أجعل أسبوع الفطام كرنفال من المرح والألعاب التي لا تتوقف لأثبت ان الفطام يمكن أن يكون تجربة ظريفة ومتعة لا تتوقف للطفل بدلا من كونه " أول حزن " في حياة البيبي

خطتي كانت معتمدة علي 4 محاور : الانتقال لبيت جدة كوكو – طعام لذيذ – لعب لا يتوقف – فسح ليل نهار

الانتقال لجدة كوكو هو الاجراء المعتاد للفطام لأنك غالبا تحتاجين للمساعدة لكن الأهم من المساعدة وجود أشخاص كوكو تحبهم مثل جدتها و خالتها التي تتبعها من مكان لأخر زي الكلب اللولو

أكل لذيذ لا يعني أكل غير صحي, المرح لا يساوي إفساد لكن بدلا من إطعام كوكو مما نأكله كالمعتاد أعددت لها خصيصا أكلاتها المفضلة و اعتمدت علي ال" Finger Food " مثل كيك الفواكة البيتي – السمبوسك اللحم والجنبة والخضار- ساندويشات الجنبة والفراخ و اللحوم – بودينج الفانيليا – التفاح والموز – ذرة أصفر – خيار و طماطم و جزر مقطع صوابع – عصائر طبيعية

بالنسبة للفسح كوني في طنطا و كوكو برضه صغيرة يجعل الفسح ليست فسح بالمعني المعروف و لكن هي مجرد خروج من البيت من أجل الحد الأقصي من المرح. هي هي نفس الأماكن المعتادة من أسواق و سوبر ماركت و نادي وشوارع و كافيهات و لكن الهدف منها ليس التسوق أو الشراء أو مشروب في كافيه بل الهدف هو الترفيه عن كوكو و اكتشاف كل جديد من أول التسكع في الشوارع و اللعب مع القطط (من بعيد طبعا) و الغرباء و القمر والنجوم و محاسبة التاكسي بنفسها و السوبر ماركت ونقل الخضار من مكان لمكان و تنقية الليمون و إمساكها بكيس من المشتروات ترجع به البيت دا غير طبعا حقيبتها الخاصة التي تحرص علي ان تحتوي علي مشط و 2 جنيه و منديل و بسكوته و النادي والزحليقة و بيت الكور والأطفال الاخرين. كل خطوة و كل مشوار هدفه الاكتشاف والمتعة وتعلم التصرف كالكبار. هناك فرق كبير بين اصطحاب كوكو لفتح الله (دا كارفور طنطا) و أنا في عجلة من أمري و أشتري وأحاسب في سرعة و بين الذهاب إلي نفس المكان لتركب عربة التسوق و تنقي ما يعجبها وتحاسب عليه و تخرج من المكان ممسكة بكيس خاص بها فخورة بنفسها وبإنجازتها الصغيرة

تكريس حياتي للعب مرهق جدا. في الاخر انا أتعامل مع ماكينة لعب لا تتوقف ولا تهدأ .في البيت مئات المرات من الركوب علي ظهر ماما الذي يتحول من حصان لمكتب لتربيزة أكل و مئات المرات من فك و تركيب المكعبات و الحلقات و تمثليات و رسم بالقلم الخشبي و سماع نفس الأغاني المفضلة في تكرار لا ينتهي يطاردني في النوم و لعب البخ و كوكو راحت فين و مسرح العرائس إلخ إلخ إلخ. طبعا لا مانع من استغلال النشاط الزائد في مساعدات منزلية تتحول لألعاب مثل لم مشابك الغسيل أو تلميع الخشب أو لم اللعب المبعثرة

طبعا انا بفيص وبنهار كتير من الإرهاق والمساومات التي لا تنتهي من أجل اللعب و تلبية الطلبات دون إفساد أو كسر للقواعد مع كبسة اللبن علي صدري و مع المهرجان الليلي عند النوم ( أهو دا بقي لحظة الحقيقة المرة ) مع اصراري علي تعليمها كيفية النوم بأسلوب لا يهلكني كل دا كتير كتير لكن بمساعدات جدة كوكو والمدد من الله إن شاء الله أثبت نظرية وأسلوب جديد يجعل الفطام تجربة مفرحة للأطفال ولا يعرف الحزن قلب كوكو

مطبخك صيدلية

التدوينة اللي فاتت نقلت لكم ازاي تقوي عموما مناعة ولادك في الجو المقرف اللي احنا فيه دا, المرة دي الكلام علي عملية الإصابة بالمرض نفسها و ازاي مطبخي يبقي صيدلية طبيعية ... استعنا عالشقي بالله

الواحدة مننا بتقوم من نومها كدة عالصبح عشان تضمن ان أولادها يشبعوا ويدفوا ويكبروا و مع إن دي أكثر حاجة بتوجع القلب واجب علي العيال انهم يعيوا ويتعبوا عشان مناعتهم تتطور وتقوي

المناعة أثناء الطفولة بتبدأ تتعرف علي ايه هو "نفسها" و ايه "اجسام غريبة" وتتعلم ازاي تدافع عن الجسم ضد الكائنات المسببة للمرض. معظم أدوار البرد تأتي في الخريف والشتاء بسبب حبسة الأطفال معظم الوقت في أماكن مقفولة ومع دخول المدارس بالإضافة الي ان الفيروسات تكبر في الرطوبة المنخفضة , الهواء الجاف في الشتاء يجعل القنوات الأنفية انشف و أكثر عرضة للاصابة

ليه كوكو بتعيي أصلا

الجماعة بتوع علمي علوم غالبا عارفين أما علمي رياضة زيي ولا أدبي معندهمش فكرة ليه أصلا ابنها بيلقط البرد. بالمختصر كدة البرد سببه فيروس بيصيب الجهاز التنفسي أو القناة الهضمية أو العين أو البشرة و بيتنقل عن طريق اليد أو النفس أو الملابس , الفيروس أول ما يدخل يثقب الغشاء المخاطي في العين أو الأنف أو الحنجرة و يستعمل خلايا الجسم للتكاثر فينادي الجسم علي خلايا الدم البيضاء للمنطقة المصابة للتخلص من الفيروس فتسبب احتقان وافراز سوائل ( مناخير سايبة) و ممكن تسبب في الكحة, احتقان اللوز و الحرارة ( أعراض البرد)

و لأني متابعة مع دكتور هادي جدا في الأدوية و بيدي لمناعة كوكو فرصتها مع أول علامات البرد بحول مطبخي لصيدليه و تلاقيني بحضر في مشاريب و سوايل ( زي الساحرات الشريرات في أفلام اللي بيقعدوا يقلبوا في سوائل و يضحكوا نياهاهاهاها)

· عامة كدة في البرد بعملها أكل فيه ثوم (الثوم دا لوحده مضاد حيوي) و زعتر و بصل. طبعا مش كله مع بعضه احنا عايزينهم يخفوا مش نقضي عليهم, بس مثلا كوكو بتحب البطاطس البوريه احط فيها فص ثوم مفروم كدة يعني

· دايما أقرا ان المفروض تقللي منتجات الألبان والسكر والقمح عشان بيزودوا من انتاج المخاط بس أنا بصراحة عمري ما عرفت أنفذ الكلام دا لأن كل الحاجات دي اساسية في أكل كوكو

· معلقة عسل علي ليمون بحبة البركة علي الريق من الحاجات اللي اتربيت عليها و ناوية أنفذها علي كوكو لما تكبر ان شاء الله

· طبعا البرتقال و الليمون دول اساسي مع نقط سي فيت للرضع مع اني قريت في كذا حتة ان الحمضيات مش كويسة في البرد !!!!!! و ان مصدر أحسن للفيتامين سي هو التوت و بروكلي و برد عليهم انه عند أمه يا أدهم , مش معقولين الأجانب دول نجيب أحنا التوت منين و البروكلي دا مين الطفل الطبيعي اللي يرضي ياكله !

ليه كوكو بتكح

الكحة هي أصلا رد فعل الجسم لطرد البلغم, ساعات كبت الكحة بيبقي مضر مش مفيد لأن في الأخر احنا عايزين البلغم يطلع من الجسم بس اللي بعمله لها مشروبات طبيعية تهدئ حدة الكحة عشان تعرف تنام ( الساحرة و قدر السوائل العجيب نياهاهاهاها)

هي المكونات كالآتي بخلطهم بقي علي بعض علي حسب مزاج كوكو و متقبله طعم ايه ( ما هو مزاجها دا شئ متغير في الزمن والكتلة والفراغ!)

· الميرامية

· الزعتر والينسون مع بعض بيساعدوا علي طرد البلغم

زنجبيل بالقرقة ( دا أنا شخصيا لما بتعب بشربه )

و لو يا عيني رجعت بشربها نعناع وينسون وأمنع الزنجيبل لأنه حريف شوية

برضه كنت قريت عن القرنفل بعصير التفاح بس عمري ما جربته صراحة لأني مش بعرف أعمل عصير تفاخ بس هو التفاح فعلا أساسي في أيام البرد و تقوية المناعة لأني بفتكر جدتي لما كانت دايما تقول One Apple per day keeps the Doctor away

مرطب الجو air humidifier دا أساسي عند الأجانب في أدوار البرد بصراحة أنا مش عارفة ايه دا أصلا ولا شكله عامل ازاي ولا أروح أسأل عليه فين بس هم في كلامهم بيحسسوني ان ازاي في بني أدمين طبعيين عايشين من غيره ؟؟ دا يعني ماء , كهرباء , مرطب جو ! بس فلو واحدة عندها فكرة ايه دا يا ريت تقولي