بصوا بقي يا جماعة ... أنا حيجرالي حاجة ... اي واحد معدي بيقول انه راح التحرير ... مليش دعوة بقي أشمعني أنا هو أنا تف علي الكلب يعني أنا عايزة انزل مظاهرة ...كل اهلي نزلوا جوزي اختي ماما حتي بابا رجع من السعودية و نزل مظاهرات و أنا كنت بقعد لوحدي اكلم نفسي في البيت من غير لا نت و لا موبايلات و لا تليفزيون ( ايام ما كانوا موقعين الجزيرة و بنجري وراها في الترددات) بوزي في بوز كوكو .... ماشي يا كوكو انت السبب و ديني ما حنسهالك .... ييجوا دلوقت يقولوا علي هبلة عشان قفشت معايا انزل التحرير ... يا جماعة أنا عايزة اقول رأيي عايزة صوتي يوصل عايزة اروح التحرير اللي خللاني الغي قرار الهجرة ....
يا ناس هو كتير علي اروح اقول للمجلس الاعلي بحبك بس واخدة علي خاطري منك .... ليه سايب الأوباش و الارزقية و شوية الناس المعترضة علي طول هم اللي يطلعوا في التليفزيون ليل نهار يقرفونا ؟؟؟ أكيد الناس دي عملت حاجات غلط كتير ما تحمر لهم عنيك شوية و تقولهم لموا الدور و لا بلاش التهديد مش أخلاقنا طلع الناس المحترمة اللي ليها موقف حتي لو بزقة منك مش عيب والله بس أنا حاسة ان أخرتها كدة الناس حيجبولنا عمرو موسي و لا الاراجوز التاني ايمن نور عشان شايفين ان البرادعي غلس و مجوز بنته يهودي و خائفين من الاخوان
ليه يا مجلس سايب شوية المأجورين اللي كل واحد فيهم مربي لي دقنه و كتب علي وشه أنا سلفي ماشيين يقطعوا في ودان الناس و يهدوا الكنايس و الأضرحة و يا عيني مبهدل السلفيين الحقيقين معاه ... و الله صعبانين علي و بدافع عنهم صحيح كل ما يتكلموا يسدوا لي نفسي بس والله عذراهم و متأكدة ان اللي بيحصل بأسمهم دا مش مسئولين عنه و أنا عارفة و انت عارف يا مجلس مين المسؤول عنه
و كمان عايزة اكلم عصام شرف ... عايزة اقول له أني بحبه ... اه و الله ... كفاية ان لما بسمع اقتراح وجيه في التليفزيون و لا الجرائد علي طول بلاقيه اتنفذ ... مش متخيل يا شرف الموضوع دا مأثر في قد إيه ... أنا واحدة وعيت علي الدنيا لقيت سياسة " قول اللي انت عايزه و إحنا حنعمل اللي إحنا عايزينه " لما الاقي واحد فعلا ليسمع لنا و بينفذ الاقتراحات اللي في مصلحة البلد أطير من الفرحة و لا مطيرش ؟؟؟ لما يبقي أخيرا المصري برة له منظر و لما يتمسك الدنيا تقوم لحد ما يرجع مش يتقتل و يتصلب علي عواميد النور و خارجيتنا عادي بيس
بحبك و الله و عشان بحبك عايزه أقولك علي كام حاجة كدة ... سرع شوية في التحقيقات ... اقتراح يعني أكيد أكيد فيه ملايين من الناس متورطين في فساد النظام السابق ... مش حنعلقلهم المشانق كدة حنقتل و نسجن تلات اربع البلد ..ليه منعملش حاجة زي فلوسك مقابل حريتك بالذات الحزب الوطني و المجالس المحلية و الداخلية .. كل الناس دي معكوكة بس مش كلهم مجرمين و كلهم دلوقت مرعوبين ليه منستغلش الرعب دا .. هات الفلوس اللي سرقتها في شكل تبرعات و تنمية اقتصادية و يبقي شكلك شيك .... سلم لي الرؤوس الكبيرة اديني ملفات فساد و ادانة و تعذيب أنا مش عايزاك انت يا حمار ... أنا عايز اللي فوقك و بكدة نضمن سرعة في السيطرة علي الفساد
كمان حاجة يا دكتور معلش استحملني ...أنا عارفة كويس أوي ان لا يمكن تقدر تشيل كل القيادات مرة واحدة ... محافظون .. رؤساء جامعات .. محليات ... مفهوم مفهوم ... لازم التأني علي الاقل لحد ماتعرف مين يصلح يمسك بعدهم و تعرف تجيب منهم اللي اخدوه و الله فاهماك ... بس عشان بس الناس أعصابها تهدي اعلن عن اليات تنفيذ ... يعني مثلا اول ما الترم التاني يخلص حنغير كل العمداء ... قبل السنة الدراسية الجديدة حنظبط قانون الجامعات ونجري انتخابات لرؤساء الجامعات ...يعني دا مثال اي حاجة صعب تنفيذ فوري ليها حط خطة زمنية محكمة تقوم الناس تتهد شوية و الإشاعات تقل ... و معلش برضه اقرص علي البوليس ينزل عادي ما هم ياما قرصوا علي الناس محصلش حاجة ...
أنا عارفة انه حمل تقيل ربنا يكون في العون بس بدل الحوار الوطني اللي جايبلنا فيه تهاني الجبالي و ناس حفظناهم و حفظنا آرائهم اعملوا حوار وطني للتنمية هاتوا الناس اللي محدش عارفهم ولا عارف افكارهم للتنمية الاقتصادية و الزراعية ... أنا شايفة ان دا يمكن يكون اهم كمان من السياسة ... حط حجر الأساس للحكومة اللي بعدك .. حتي عشان الناس لما تعرف ان البلد ممكن التعليم فيها ينصلح بكذا و كذا و منستوردش القمح في خلال كام سنة و الميا و الكهرباء و الاقتصاد و الصناعة الخ الخ يعرفوا ينقوا رئيس ببرنامج انتخابي مش علي اساس ان له كاريزما و لا بيتكلم انخليزي كويس و لا بيقول انتخابي واجب شرعي
كل دا و كلام غيره كتير عايزه اقوله .. بذمتكوا بقي مش لي حق اقول ودوني التحرير ؟؟؟؟
ليست هناك تعليقات:
إرسال تعليق