من ساعة ما بصحي من النوم لحد ما بنام بليل و انا في حالة طوارئ ...في لحظات الهدوء النادرة لكوكو اقوم بسرعة اطبخ حاجة .. اشطب مطبخ .. انشر غسيل ... اكوي قميص ... الحاجة اللي بتاخد مني 10 دقايق في عملها بقت بتاخد ساعات و ساعات لأن في النص فيه شيل و حط و هز و رضاعة و تغيير ..
انجاز اللاشئ .. في كفاح دائم لمجرد بس اخلي البيت ادمي و المطبخ نضيف .. تعب و انهاك و سباق الزمن لأعود الي نقطة الصفر و بكرة اعيده من الاول.. تمر علي الأيام و الشهور و لا افعل شئ ذو قيمة و لا أبني مستقبل و لا حتي اهتم بنفسي ...كل ما افعله طبخة و تشطيب الحوض ... هباءا منثورا مثلي مثل سزيف اللي بيتعب و يكافح عشان يطلع الصخرة لقمة الجبل ثم تقع من جديد
"دي اخرتها" ... كلمة اراها في عيون كل من حولي .. كل من يتساءلون عن مهنتي ليجدوا اني قاعدة في البيت .. كل من ينتظرون مني حاجة و يلاقوني ولا حاجة ... و الاسوأ اني بشوفها باستمرار في عيني أنا و أنا شايفة نفسي فشلت و كل ما افعله مجرد محاولات يائسة بلا قيمة حقيقية و مش حتوصلني لحاجة .. فرد غير فعال و لامنتج في المجتمع اتساءل دوما عن سبب القاء محبتي في قلوب من حولي و انا لست الصخرة التي يرتكز عليها البيت و نجاح زواجي ليس بفضلي و اهلي لا يعتمدون علي في شئ و مش بجيب فلوس و لا الطباخة البريمو و لا العاملة الناجحة و لا بيتي اية في النظافة ولا رمز الاناقة ... بلا ميزة و لا يرجي مني شئ
بلايين من النساء خلفوا و ربوا و منهن كثيرات عملوا حاجة تانية بخلاف الطبيخ و الغسيل ... هو العيب في انا و لاطموحي أكبر من مجهوداتي و امكانياتي ؟؟؟ و لا الفشل و الندم و الحسرة هي جزاء ربنا العادل علي الوقت اللي ضيعته و انا في بيت اهلي و كل مسؤلياتي اصحي نفسي و اروح الكلية ... مش عارفة
" اللهم اني أعوذ بك من الهم و الحزن وأعوذ بك من العجز و الكسل وأعوذ بك من الجبن و البخل وأعوذ بك من غلبة الدين و قهر الرجال"
يا نهى انت بتنجزى بالفعل مهمة عظيمة جدا ياحبيبتى ألا وهى احياء نفس بشرية . ربنا سبحانه بيقول: ومن أحياها فكأنما أحيا الناس جميعا. أرجوك لا تتعجلى الانجاز فى الهندسة بكرة ييجى ان شاء الله بسهولة ويسر وانت سعيدة أما الان المهمة التى اختارها لك رب العالمين هى تربية كوكو حنى يشتد عودها ومن الأدب مع الله أن نرضى بما قسم و بالمهمة التى أوكلها الينا ,مهمتك عظيمة ومقدرة من الله رب العالمين وهو الأهم:"أن اشكر لى ولوالديك" " الجنة تحت أقدام الأمهات" و" أمك ثم أمك ثم أمك ثم أبوك" وأيضا مهمتك مقدرة منا جميعا وان كنا لسنا بمهمين. وانه ليحزننى أن تشعرى بعدم الانجاز . دة انت بفضل الله بتنجزى حاجة عظيمة قوى. حاولى أن تتأقلمى مع الوضع الحالى وتسعدى نفسك بالمتاح. أما الانجاز فى العمل والهندسة جاى ان شاء الله , كله بأوانه وربنا يرزقنا جميعا رضاه ويرضينا. لا اله الا أنت سبحانك انى كنت من الظالمين
ردحذفنهى..
ردحذفالفترة اللي إنتي فيها دي مؤقتة.. إنتي لسه مخلفة وبنتك عندها 4 شهور.. معتقدة إيه ؟ إن كل الستات اللي بتتكلمي عنهم أنجزوا إنجازات فظيعة وولادهم عندهم 4 شهور ؟!
دي فترة مؤقتة يا نهى.. وبعدين مين قال إن البيت مش قايم عليكي .. طب جربي كده تسيبي كوكو لمصطفى.. ولما نشوف هيعمل إيه !
كلا منكما بيعمل حاجة .. وبكرة تشتغلي..
ماما مثلًا ما هي أستاذة في الجامعة وفي الفيزيا مش في أي حاجة بس أكيد خدت أجازة لما حملت وخلفت.. أمال كانت بترمينا نعيط ونروح الشغل ؟
ما تحكميش من دلوقتي.. إحباط إيه ياللي عند 23 سنة.. أغلب الناس اللي قدك حياتهم العملية ما بدأتش أصلًا أو بدأت بكتيره من سنة.. !
وبعدين إنتي رمز الأناقة,, وطباخة شاطرة ودي شهادة من واحدة ما يعجبهاش العجب :D
هتبقي حاجة كبيرة أوي وهيبقى ليكي كاريير تحفة.. بس مش قبل سنة ونص عمال ما كوكو تكبر.. وتدريجيًا هتهدا وهتديكي فرصة تذاكري إستعدادًا لده..
ماحدش بيبصلك على فكرة إن "دي آخرتها" كل الناس بيبصولك إنك ذكية وقمر وإتجوزتي حد كويس أوي وعندك بنت قمر وكله بيحسدك أصلًا.. أنا مش بأألف الكلام ده.. أنا بأروح النادي وبأزور ناس كتير وبأسمع زاي بتتجاب سيرتك حتى لو مش قدامي..
صدقيني أنا مش بأرفع من معنوياتك.. دي الحقيقة..