ما فعله وائل بالعيانة

بعد انقطاع تلات سنين عن التدوين الكتابة بتبان مستحيلة، خصوصا لو في التلات سنين دول بلاد شالتني وبلاد حطتني... حجرب أدون لقطات بدل ما أنا محتاسة ومش عارفة ابدأ منين.

"كسمك يا محمود يا سيسي" والنقاش حوالين كون وائل غنيم وصل للنرفانا ولا راحت منه خالص كل والتحليلات ومتخافوش على وائل يا جماعة...اجتماع مرض نفسي مهمل علاجه على حبال وسائل التواصل الاجتماعي على اللي جرى لجيلنا في الغربة بعد الهزيمة، هري يستحق جائزة اتعس مشهد في 2019. 

شوفي بقى يا ست الكل لو سبتي دماغك تسيطر عليكي حتطلعي تحلقي راسك لايف وانت بتعيطي وبتشتمي في نفس الوقت. مشاهدة الاضطرابات العقلية مرعبة للي حاسس طول الوقت إنه معرض لها وإن عقله هو أسوأ اعدائه.  مش قادرة اتصور وقع اللي بيعمله على ولاده ايه ولا قادرة افكر لمحات اضطراباتي لو طلعت ممكن تعمل في عيالي ايه. 

نفسي الاقي كلمة عربية دقيقة بتوصف حالة مخ هايج حرفيا واجعني وضاغط على عنيا ورغبة ملحة في الصريخ مع قصر الأنفاس اللي عارفة أخدها... نوبات قلق؟ نوبات هلع؟ والله ما عارفة المهم الشعور دا سيطر عليا وأنا بشوف فيديو "ربنا يحرق قلبك يا انتصار" 

قرار بناء حياة مهنية بعد 10 سنين من التخرج وطفلين بيتنفذ بأصعب طريق ممكن، الدراسة لوحدي أونلاين. لا فيه مجموعة تشجعني ولا محاضر يديني على دماغي... مع نفسي ماشية بنور الله بدعي وأقول يا رب. الدراسة للشغل أصعب من الشغل وأنا لوحدي ومستفرد بيا عقلي ويومي عبارة عن مونولوج طويل مع عقلي بيحاول يفطسني وبحاول اسيطر عليه مع كل صعوبة وبطء وعدم تركيز التعلم جه وائل حط كريزته على جبل الخرا النفسي وقعه.

بصيت للولاد بعد ما ربنا قدرني وعرفت انزل اجيبهم من مدارسهم وقلت في عقل بالي أنتو الأولوية.. أنا مش حسيب عقلي يكسبني ويدمر حياتكم ووقفت مع نفسي وقفة كتبت كل سلوكيات التدمير الذاتي اللي متعلقة بيها وعلى راسها وسائل التواصل الاجتماعي والنقنقة وقررت أمحيها من حياتي تماما. لو حصل حاجة بجد حعرف من الأخبار، غير كدة هري.    

مع نفسي

موسيقى أكوستك حالمة، خريف برليني مشمس، صفاء ذهني نادر الحدوث وإنقطاع تام عن كل وسائل التواصل الاجتماعي خلوني أفكر أرجع أدون من جديد... تلات سنين من الانقطاع التام، حياتي وحياة الأولاد اتغيروا فيها بالكامل... هزيمة ثورية ساحقة وقرار واعي بكوننا عايزين نربي العيال وناكل عيش... عوامل طرد على طراز علاء عبد العظيم أدت للانتقال لبرلين اللي اتولدنا فيها من جديد، الثورة كانت زلزال ... الخلفة زلزال ... والغربة الزلزال التالت فبقيت شخص مختلف عن الشخص المختلف اللي كان مختلف عن ما كان في الجامعة. 

لحد تلات سنين فاتوا كانت هويتي ومدونتي وقصة حياتي عن كوني أم لكوكو، كوكو كبرت وحسن كبر وأنا كبرت وعرفت أني أعمق ولسه عندي أكتر من دور الأم اللي اتحشرت فيه سنين طويلة قبل آواني. أنا معدتش بس أم كوكو ... أنا أم لكوكو وحسن، مغتربة تحلم بالوصول لمعادلة التعايش كأقلية في هدوء وسلام مع أغلبية مختلفة، عائدة من زمن الديناصورات بتحفر في الصخر عشان تلاقي طريق للعالم المهني وبتتعرف على نفسها من جديد بعد ما الغربة فتحت عنيها على حقيقة إن حاجات كتير كانت بتعملها عشان هو كدة. 

البداية الجديدة لمدونة أم كوكو حيفضل فيها كوكو وحسن الأولوية لكن معدوش بالعين كياني وهويتي زي الأول... عدنا   

الطفل المعجزة أم الطفل السعيد

تربية طفل معدتش حاجة سهلة أو تُفعل بالسليقة كدة زي زمان، كم المعلومات والاختيارات اللي قصادنا يخبل، كم المسارات اللي ممكن أمشي فيها كأم مع أولادي أثناء تنشئتهم أكبر من قدرتي علي الاستيعاب، هل أنا عايزة طفل متفوق دراسيًا ولا رياضيا ولا مهذب ولا يدخل في المسارات فنية ولا يجيب الدرجات النهائية في الفصل ولا يهتم بالتكنولوجيا ولا يهتم بالطبيعة ولا يهتم بالاجتماعات ولا الأسوأ من كل هذا، يبقي الأشطر والأنجح والأكثر تفوقا في كل المجالات. الفرجة علي فيديوهات لأطفال يتكلمون خمس لغات بطلاقة أو طفل معجزة عزف مقطوعة كلاسيكية في سن السابعة أو طفلة في الثالثة من عمرها تؤدي قسم التايكوندو ثم النظر إلي طفلك والهرجلة بتشر من كل تصرفاته تشعرك بالذنب وأن عليك الضغط عليه حتي يتفوق مثل هؤلاء الأطفال. ثم يأتيني مشاهد كواليس البطولات التي أراها في النادي والضغط المستمر علي الأطفال من أجل الإتقان، هل هذا ما أريده حقًّا لأولادي؟ هل أريد طفل معجزة أم طفل سعيد؟ 

 

نقاش دار بين مجموعة من أمهات أطفال الألعاب الرياضية وكانت بيننا أم هي نفسها كانت بطلة سباحة، النقاش كان يدور حول تفضيل السباحة عن الجمباز للطفل أم العكس، طبعا الأم السبّاحة السابقة كانت ترجح كفة السباحة عن الجمباز لسبب رأيته وجيه للغاية، من واقع تجربتها أن تمرين السباحة يبقي في حدود المعقول فترة طويلة من عمر الطفل قبل أن يبدأ في دورة البطولات والضغط في سن أعتاب المراهقة علي عكس الجمباز دورة البطولات والضغط المستمر في التدريب تكون من عمر الخمس والست سنوات فتجد أطفالًا في رياض أطفال والسنوات الأولي من المرحلة الابتدائية حياتهم معسكر تدريبي متواصل واجتماعياتهم مع اجتماعيات الفريق فقط، لا حياة خارجية ولا مجال للتجارب في أي مجال آخر. هكذا يُصنَع الأبطال ولكن هل هكذا يكون الأطفال؟ 

الجمعة القادمة اختبارات الجمباز لمواليد ٢٠١٠ في النادي وكوكو رفضت بحسم دخول الاختبارات عشان الجمباز بقي بيوجع، أنا محترمة اختيارها تماماً لكن مش قادرة أمنع نفسي من تمني لو كانت دخلت وتفوقت، ثم أري أن اختيارها هو الأفضل و أن إيقاعها في الحياة هو بوصلتي، إحساسها بالملل يعني انها مليئة بطاقة عليّ توجيهها وإحساسها بالإنهاك يعني أن علينا التوقف وإلتقاط الأنفاس حتي تستعيد شغفها. 

التجربة في سن مبكّرة مفيد ولكن الإلتزام الجاد بمواعيد وتمارين وكورسات ومعسكرات لا يناسب بنتي، هل اختياري لمسار تربية قائمة علي التعرض والاكتشاف حيربي إنسانة موسوعية مجربة ولا إنسانة معندهاش قدرة علي الإنضباط والإلتزام زي أمها ؟ تلك هي المسألة 

كن لطيفًا.. محدش ناقصك

كل ما أبص علي كوكو وحسن وافكر نفسي ربنا يوفقني واساعدهم يبقوا ايه.، أول خاطر ييجي في ذهني" كن لطيفًا محدش ناقصاك"، فيه كائنات مهددة بالإنقراض ممكن نحاول نحطها في محمية شفتهم جمعوا بين لطف المعشر مع أهل البيت والذكاء الاجتماعي اللي يخليهم ما يتحولوش للقمة سهلة في مجتمعنا الحاصل علي جائزة أكثر المجتمعات قسوة علي النفس وتدخلا في شئون الآخرين. الحقيقة أنا معرفش ازاي ممكن أعرف أعمل كدة مع تاريخي المشرف في الضرب علي دماغي وغلاستي اللي دايما بتطلع في الوجوه الغلط. فهل فاقد الشئ يعطيه؟

في السنة الثانية مدارس بدأ يتضح لي المقلب المغري اللي حنعيش فيه اربعة عشر سنة قادمة من عمرنا، سنوات التمهيدي هزار واخر فرفشة ولكن... هستريا جروب الفصل المولولة علي كل تفصيلة، كم الكلمات اللا منطقي اللي البنت مش لاحقة تستوعبه وأهداف المنهج الخيالية واستجابة إدارة المدرسة للملاحظات الفردية للأطفال، تفاصيل صراع الأمهات والمدرسات والتكتلات والشلل الحزبية المتكونة مخوفاني.. محسساني بالتقصير ..وبأني مش شايفة شغلي كأم محنكة في العملية  التعليمية. ثم يأتينا مركز مصر قبل الأخير علي العالم، فأقرر أني لن أهين ولا أجهد ولا أحرق أعصاب أولادي علي تعليم بالمستوي المذكور. 

 لو ربنا وفقني عايزاهم ياخدوا من التعليم القدرة علي الإلتزام والقدرة علي البحث، التفكير والتجربة. عايزاهم يعرفوا أننا عايشين في مجتمع ضيق أوي .. أوي والعالم برة واسع أوي أوي برضه.. عايزاهم يجربوا وميقعوش في فخ هذا ما ألفنا عليه آبائنا، وكمان مهم أوي الله يكرمكم يا عيال ما تفرحوش بالتجربة وما تفتكروش أنكم عملتم اللي متعملش بلاش إدعاء عمق عشان ماما مرارتها مبقتش بتستحمل./، جربوا حبوا تجاربكم بس ما تنبهروش بيها وافتكروا إن برة فيه بشر مكرسين حياتهم لتصوير الدببة في القطب الشمالي فعادي يعني. 

أتمني أعرف أوصل لمنهج علوم قابل للتطبيق المنزلي يعلي مستواهم في التفكير العقلي والنقدي، وححاول أتعلم وأعلمهم لغات كتير يعرفوا يتواصلوا بيهم مع العالم ويتعلمواعربي كويس ويعرفوا يتذوقوها ويكتبوا صح من غير غلطات إملائية من نوعية "هاذا" و"مشاء الله". 

يقدروا الفنون والمزيكا يحسوا بجمالها ويتختطفوا بس يعرفوا يرجعوا تاني ويعرفوا يوصلوا لصيغة متصالحة بين جنون الفن والدين، مايخافوش ومايشطحوش

لست عليهم بمسيطر. يا رب جنبني الأمل وخيبته، حببني في أولادي زي ما هم مش زي ما أتمناهم، ساعدني أعدي بيهم في هزات الإيمان وخبطات المجتمع اللي كله أمراض، مش عارفة أزاي اخليهم يندمجوا فيه من غير ما يتلطوا بأمراضه، ما أنا كلي أمراض وغضب وتساؤلات. يا رب أوصل لقناعات قابلة للتطبيق قبل ما يوصل لهم حيرتي وغضبي، يا رب مش عايزة أعك.

هواجسي كتيرة وبلاقي نفسي في وسط المعمعة بحاول أفهم حماس أم الرهيب في محاولتها لإقناعي أن مديرة المدرسة دي اللي أصلا حتمشي السنة الجاية ما ينفعش تقعد شهر كمان في المدرسة. مش عارفة أحس بقضية حياتها .. احنا في *** ولا شم ورد ؟

لون فرحة

بيقولوا ان الانسان اللي مبيشتكيش كتير في عموم حياته أسعد و أقوي وبينشر طاقة إيجابية علي عكس الشكايين اللي تهرب بحياتك منهم بالمشوار ... إحمممممم..... لحد ما ربنا يكرمني وأبقي من الناس دي خليني أحاول أمسك في لحظات البهجة اللي مريت بيها اليومين دول عشان تتحط في صندوق ذكرياتي مع لحظات التكدير والنكد لحد ما تغلبها 

-١- 

أول مرة أروح حفلة بالعيال و انبسط ودا معناه أنها الحفلة الأولي من ٥ سنين اللي انبسط فيها، منساش لما قعدت اعيط من غُلبي ونكد العيال والظروف في حفلات أهم زي سعاد ماسي والمشروع المصري من كتر زن العيال و فركهم و بهدلتي بيهم ، المرة دي عملوا نفس الأفلام بس أنا اللي عرفت انبسط عرفت أرقص وأنا قاعدة علي الكرسي وعلي حجري طفلين ما بيبطلوش شكوي وطلبات عرفت أصقف مع كل سولو  عزفها أوسو بالجيتار وعرفت أصرخ و استمتع بهاني الدقاق وهو بيغني مرسال لحبيبتي و عرفت أغني أغاني نغم مصري السياسية و عرفت انبسط بالعيال :) 

-٢-

 بأي حال عدت يا عيد .. عاد بالكحك والفرح

ممتنة لكوباية الشاي اللي حشربها في أي وقت وممتنة إن كوكو السنة دي استوعبت وحست بروح العيد. ممتنة لجدتها اللي نقشت معاها الكحك وعجنت القراقيش في الوقفة ورشوا السكر ودخلت معايا استحمت ولبست فستان العيد ونزلنا نصلي بالفقاقيع والبلالين وتكبيرات العيد.... الفرحة في عينيها  واستيعاب البهجة غير كل سنة إحساسي إني بشكل وجدانها ووعيها وبعرفها حب الدين وحب البلد وبربطها بالشعائر ما يتقدرش بتمن. 

-٣-

ممتنة أني بدأت أتصالح مع روحي واهتم بنفسي جبت روچ ومانكير وقلم عنين في حركة دلع معملتهاش من قرن فات.. مخوفتش وجبت مناكير أحمر و حطيته وعلي ضوافري المقصوصة قصة الأطفال مهمنيش ومهمنيش إن نصه طلع برة وشكله طفولي وغير منسق، حطيت الروچ ونمت ليلة العيد وأنا حاسة إني مدلعة نفسي واهتميت بيها ١٠ دقايق. 

-٤- 

قاعدة مستنية الفرج ان العيال تنام ونعدل النظام بعد رمضان جنب زرعة مسك الليل صغيرة حطاها جوا مناخيري مطلعة ريحة مهونة عليّ السهر ومحاولات السيطرة علي العيال عشان ميصحوش البيت كله. ممتنة لماما اللي قطفتها وحطيتهالي في البلكونة 

أهي المقالة بتاعة بطلوا شكوي يا عالم يا نكدية :D 

http://www.ahaparenting.com/blog/Want_to_add_years_to_your_life_Stop_complaining  

الشيخ حسني

قول ورايا يا حسن تاااا 

ااااه -

تييي -

ايييي -

توووووو -

اوووو -

كوكو بتعلم بتعلم حسن حرف الكاف 

في تقييم الترم الأول مدرسة القرآن قالت لي في انهيار يا فندم دي بتقول القاف تاء ..تخيلي المعوذتين يا مدام 

ف بناءا علي طلب قسم التربوي في المدرسة رحنا لدكتور تخاطب تستشير هل كونها بتقول بمنتهي الثقة تُي أعوذ بيّب الفلت دي حاجة تستدعي تدخل ولا عادي 

في الأول طنشت بس للأسف شفت بعيني أصحابها بتريقوا علي نطقها .. 

-مش حتلعبي معانا غير لما تقولي خلاويص 

-لاءاااااا اسمها هلاويييييص 

-خلاوييييص 

-هلاويييييص 

تدخلت صديقة تالتة طب انا بقي حقولها تلاويص و كله يقول زيي 

قاضي العيال شنق روحه 

مواويل التخاطب و تعديل السلوك رحت و أنا قلبي مقبوض جداً كلي أمل ان الدكتور يقول لي مش محتاجة حاجة سبيها حتتصلح لوحدها بس ازاااااي ازاااااي هيهات يعني 

البنت ما شاء الله ضربت رقم قياسي ٧ لدغات و٤ حروف إضغامهم مش مظبوط 

الدكتورة اللي تابعنا معاها بعد ما جربت معاها كل الحروف بكل أشكالها فهمتني الفرق بين اللدغة و النطق الغلط. 

لو الحرف في كل مواضع الكلام بكل أشكاله أيا كان وضعه في أول أو وسط أو أخر الكلمة ما بيطلعش يبقي كدة دي لدغة 

كوكو لدغتها جات في مجموعتين صوتيتين غير معتادين شوية 

مجموعة القاف /كاف / جيم و مجموعة الخاء / غين 

بدأنا بالكاف

كوكو مدركة مشكلتها كويس ودا مساعد الدكتورة بس كوكو طالعة لأمها و نفسها قصير بتزهق 

ماما بصي احنا نروح ناخد التوفي و نروح-

أول خطوة في حل مشكلة التخاطب هي ادراك الطفل سماعيا انه بينطق غلط، فيه أطفال بيبقوا سامعين /فاكرين انهم بينطقوا صح  

الخطوة دي كوكو بالفعل متخطياها من فترة 

-انا لعبت النهاردة مع صاحبة جديدة في الفصل 

- اسمها ايه ؟ 

- لوتي

-لوتي؟ 

- لا لوتييييييي التاف بتاعتت 

-لوچي ؟ 

ايواااااة 

تاني حاجة المثابرة و التكرار ثم التكرار ثم التكرار 

حرف الكاف بيطلع من اعلي الحلق مع تثبيت طرف اللسان و دا بيحتاج تثبيت اللسان بعصا خشب 

كاااا - اععع   كااا - تااا  كااا  لاااا 

وهكذا موضوع مرهق و يزهق ومملل 

 و كوكو ملولة بطبعها دي زهقانة من المستوي التاني من السباحة وعايزة تطلع المستوي التالت عشان تعمل ضربات رجلين 

المهم فكرت ف لعبة لحد دلوقتي بسطاها .. ان هي تعمل انها الدكتورة و احنا اللي بنتعلم حرف الكاف 

وهي بتوريني حرف الكاف بيطلع ازاي عشان أفادها بقت هي اللي بتدرب المدة اللي الدكتورة طالباها 

يا رب الصبر من عندك انا كبرت علي ان يتحط في بُقي عصيان خشب لا و كوكو ما تتوصاش بتدخل العصايا لحد زوري 

- واجب يوم الخميس : ارسم المهنة المستقبلية التي تتمناها 

كوكو : انا عايزة ابقي الراجل بتاع السمك ض

الجمل

١ فبراير ٢٠١٥

زي النهاردة يا اولاد كنت حتجنن.حنسيب المعركة الدايرة و نروح لتيتة و جدو في الإمارات .. يا لهويييي بجد كنت حنهبل ازاي نمشي افرض مبارك مشي و احنا برة أو ممشيش والبلد ولعت .. 

ليلة السفر حصلت موقعة الجمل 

و دي كانت اول مرة امكم تعيط في حدث غير شخصي .. فيه حاجات يا ولادي الظلم فيها بيّن  ، لما تشوفوا دم و يا رب ما تشوفوا ما تقعدوش تجروا ورا تفاصيل وتقولوا اصل دا عمل و دا سوا و دا بينقط المخطط 

أنتم يا ولادي ربنا كرمكم انكم مش في مواقع سلطة متتورطوش في تبرير الدم .. يمكن تقروا الكلام دا و تقولوا ايه الخبل دا و انا ليه اشجع علي القتل و انا مش مستفيد او فين الامتحان الصعب في كدا ..تخيلوا ان فيه جمهور عريض لوي عنق البديهيات وبقي بيشجع و يجوّد من عنده عشان يضرب تعظيم سلام لضرب الناس 

٢٠١١ 

الشباب الطاهر بتاع ٢٥ مش هم اللي نزلوا ف ٢٨ 

٢٠١٢ 

قناع فانديتا و أعداء الشرعية والشريعة 

٢٠١٣ 

الخرفان أتباع المرشد 

٢٠١٤ 

مصر بتحارب الإرهاب 

كلها جمل رددها الناس بحماس لتبرير حبس وقتل ناس كتير منهم مجرمين ومنهم مظاليم 

بتتورطوا في الدم ليه ؟؟؟؟ وتلاقوهم بيدافعوا عن السلطة كأنها بنت أختهم مثلا 

حكومات تخاف متختشيش 

رأي أبوكم في اللي مفترض يبقي علاقة الدولة بالشعب  

٣١ يناير ٢٠١٥ 

قعدنا قعدة حكي عن الثورة وذكريات المعركةالدايرة .. في يوم من الأيام حسجلها بالصوت و أسمعكم عشان تفهموا أمكم ليه منفصلة عن الواقع و في قلبها حزن مع انهاحامدة ربنا علي كرمه الكبير فيكم و في بيتنا بس مش قادرة انسي و مش قادرة اتخطي الحلم و مش راضية ان الرأي العام دلوقتي في سنينا الصعبة بيشكلها أمثال أحمد موسي .. يا رب ما توعوش عليه وعلي أمثاله 

٢٠١١ 

وراح الجمل بما حمل ..و ادي احنا جينا و النصر لينا 

أما الجمل جوا اللُمان اما الجمل جوا اللُمان 

٢٠١٥ 

آل مبارك براءة بحكم محكمة