الجمل

١ فبراير ٢٠١٥

زي النهاردة يا اولاد كنت حتجنن.حنسيب المعركة الدايرة و نروح لتيتة و جدو في الإمارات .. يا لهويييي بجد كنت حنهبل ازاي نمشي افرض مبارك مشي و احنا برة أو ممشيش والبلد ولعت .. 

ليلة السفر حصلت موقعة الجمل 

و دي كانت اول مرة امكم تعيط في حدث غير شخصي .. فيه حاجات يا ولادي الظلم فيها بيّن  ، لما تشوفوا دم و يا رب ما تشوفوا ما تقعدوش تجروا ورا تفاصيل وتقولوا اصل دا عمل و دا سوا و دا بينقط المخطط 

أنتم يا ولادي ربنا كرمكم انكم مش في مواقع سلطة متتورطوش في تبرير الدم .. يمكن تقروا الكلام دا و تقولوا ايه الخبل دا و انا ليه اشجع علي القتل و انا مش مستفيد او فين الامتحان الصعب في كدا ..تخيلوا ان فيه جمهور عريض لوي عنق البديهيات وبقي بيشجع و يجوّد من عنده عشان يضرب تعظيم سلام لضرب الناس 

٢٠١١ 

الشباب الطاهر بتاع ٢٥ مش هم اللي نزلوا ف ٢٨ 

٢٠١٢ 

قناع فانديتا و أعداء الشرعية والشريعة 

٢٠١٣ 

الخرفان أتباع المرشد 

٢٠١٤ 

مصر بتحارب الإرهاب 

كلها جمل رددها الناس بحماس لتبرير حبس وقتل ناس كتير منهم مجرمين ومنهم مظاليم 

بتتورطوا في الدم ليه ؟؟؟؟ وتلاقوهم بيدافعوا عن السلطة كأنها بنت أختهم مثلا 

حكومات تخاف متختشيش 

رأي أبوكم في اللي مفترض يبقي علاقة الدولة بالشعب  

٣١ يناير ٢٠١٥ 

قعدنا قعدة حكي عن الثورة وذكريات المعركةالدايرة .. في يوم من الأيام حسجلها بالصوت و أسمعكم عشان تفهموا أمكم ليه منفصلة عن الواقع و في قلبها حزن مع انهاحامدة ربنا علي كرمه الكبير فيكم و في بيتنا بس مش قادرة انسي و مش قادرة اتخطي الحلم و مش راضية ان الرأي العام دلوقتي في سنينا الصعبة بيشكلها أمثال أحمد موسي .. يا رب ما توعوش عليه وعلي أمثاله 

٢٠١١ 

وراح الجمل بما حمل ..و ادي احنا جينا و النصر لينا 

أما الجمل جوا اللُمان اما الجمل جوا اللُمان 

٢٠١٥ 

آل مبارك براءة بحكم محكمة 

عيد الحب ٢٨ يناير :مشروع توثيق الثورة

رقيتي وحسن 

احنا في زمن غرائبي الله أعلم علي ما تعرفوا تستوعبوا الكلام دا و تقروه حتكون البلد وصلت لإيه ..أو احنا بقينا فين 

رقية وحسن 

٢٨ يناير ٢٠١٥ أبوكم كتب انه زي النهاردة من اربع سنين طلع علي الرصيف وبص علي الناس عنيه دمعت و من يومها كل حاجة اتغيرت 

لما تكبروا و تعرفوا أبوكم حتعرفوا قد ايه هو قليل الكلام وقليل الإفصاح عن مشاعره و حتعرفوا قد ايه الثورة هزتنا 

٢٨ يناير ٢٠١١ جمعة الغضب 

الله اعلم التاريخ اللي حتدرسوه حيقول ايه .. التاريخ يكتبه المنتصرون و احنا يا أولادي اتهزمنا بس انا بقولكم قبل ما الناس تنسي 

٢٨ يناير هو يوم ما الناس خرجت تقول احنا مش راضيين عن الداخلية .. احنا مش موافقين علي الظلم .. احنا مش حابين القمع

كوبري قصر النيل الساعة ٢ الضهر (لو ذاكرتي مخانتنيش) 

مجموعة من الناس اللي قرروا يتحدوا المدرعات و يوصلوا التحرير بس خايفين يموتوا فوقفوا يصلوا وهم مفتوح عليهم خراطيم الميا عشان محدش يرجع 

 

يا أولادي الشجاعة مش انك متخافش من الموت .. الشجاعة انك تثبت مع انك خايف تموت

الساعة ٢:٣٠ الضهر -طنطا 

أنا كنت لوحدي في البيت من غير شبكة ولا اتصالات ولا إنترنت كل حاجة اليوم دا اتقطعت .. ايوة قطعوا علينا الموبايلات و الانترنت في حركة متعملهاش حكومات بلاد الموز خلت كل الناس تنزل الشارع عشان تتفرج طالما مش لاقيين حاجة يعملوها 

بس أنا منزلتش.. قعدت في البيت لوحدي عشانك يا رقية كنت لسه ٥ شهور و محدش عارف مصير النزول ايه وقعدت اجري ورا ترددات الجزيرة واقنع جدتك ان مصطفي في النادي ليقابل أصحابه 

بيتشمسوا في جمعة الغضب :) 

الجزيرة جابت كل حاجة بث مباشر  .. شفت كوبري قصر النيل شفت رجل المدرعة والعربية الدبلوماسية شفت فتح السجون والحارس اللي عمال يصرخ بلاش المساجين يهربوا المواشي شفت انهيار الداخلية وهروب ظباطها بالملكي في الشارع

بالحب اتجمعنا 

كله الا اللحمة 

مرسي و أسطورة هاتف الثريا 

و شفت التلفزيون المصري جايب كاميرا من ماسبيرو علي زاوية رومانسية مع إضاءته حالمة للنيل كدليل علي عدم وجود أي نوع من المظاهرات 

الدرس التاني يا حبايب إعلام السلطان في بلاد زي بلادنا خالع برقع الحيا ..

أكذب الكذبة كبيرة و بلا تردد الناس تصدقها علي طول. 

٢٥ أبوكم راح التحرير بالصدفة .. بس ٢٨ أنا و أبوكم رحنا الثورة و معرفناش نرجع 

٢٨ يناير ٢٠١٥ -طنطا 

كنت شايلاك في الشارع يا حسن و كابحة جماح نفسي اني اجري ورا فوج المدرعات اللي ماشي في ش سعيد اغني لهم أغاني الالتراس واهتف مش ناسيين يا (شتيمة) ٢٨ يا (شتيمة برضه ) 

أمك بتشتم يا حسن في مخها بس :) وحخرب بيتك لو سمعتك بتشتم يا حب  

وللتاريخ بقية 

كيدزانيا

و أخيرا رحنا كيدزانيا المشروع المؤجل من السنة اللي فاتت لخوفي اني أدفع فلوس كتير و كوكو متنبسطش .. الصراحة حلوة :) 

رحت و كلي مشاعر عدائية تجاه المكان اللي دفعني تذكرة ٨٥ ج لمجرد اصطحاب البنت طب كوكو ١٣٠ ج عشان يوم كامل انا ادفع ٨٥ بتاع ايه ؟؟و اداني في المقابل كوبون ب ٢٠ ج جبت بيهم كوباية شاي .. اه و ممنوع الاكل والشنط بتتفتش و الاكل بيتاخد بالعافية فوت أكل و كام علبة عصير لحسن. 

ما علينا نسيبنا من الماديات أول ما دخلت المكان قعدت  فترة علي ما عيني أخدت علي الإضاءة الحقيقة كانت خافتة بشكل مزعج و المزيكا اللي شغالة بصوت عالي أغاني مبهجة مستمرة بشكل لا ينقطع. نوعية أغاني الحلم الأمريكي اللي ترجمها طارق نور في إعلانات شكولاتة جيرسي و دريم لاند بتجيب لي صداع فوري و احساس بإصطناع السعادة المدبلجة. 

كيدزانيا كلها مدبلجة بالكامل. مفيش اي مجهود اتبذل في تمصير المدينة حتي فونت الخط العربي المستخدم في اللوح الإرشادية ويفط الوظائف ضعيف و صغير جنب الانجليزي .. أنا قريت كل التعليمات بالإنجليزي الاول قبل ما ألاحظ اللغة العربية 

فيه طبعا وظائف مظهرها عالمي وموحد زي الدكتور و رجل المطافئ و عامل البنزين وعامل السوبر ماركت مش محتاج تمصير لكن رجل البوليس في كيدزانيا مشهد متاخد من CSI  مالوش اي علاقة بالواقع المصري .. زي أمريكي و فريق بحث جنائي لابسين بلاطي بيضاء لول يمكن دا من حسن حظ الولاد انهم ما يشوفوش طرق البحث الجنائي المصرية بس الخلاصة كوكو مفهمتش هي بتشتغل ايه أصلا.  

انا مش من نوعية الناس اللي لهم آراء قوية و واضحة مع أو ضد القضايا الفكرية بخصوص نمط الحياة أو التربية لكن فيه حاجة ما مخلتنيش مرتاحة في تجربة كيدزانيا مش قادرة أمسكها بوضوح بس هو شئ متعلق بفكرة كسب/صرف الفلوس -البراندات سواء في الوظيفة او المنتج  - طريقة اليوم الواحد الطويل اللي خلانا في الاخر مرهقين كلنا و العيال بتزن و بتشبط في أي لعبة قدامها. 

كوكو تاني يوم وقفت علي باب المطبخ بتربيزة و كرسي عشان تلم من اللي داخل فلوس .. يا بنت اللذينا حطبخ لكم و ادفع كمان ؟؟؟ 

نهي الجندي ٢٠٠٨ في سنة تالتة هندسة متدربة في فودافون مصر وعايشة الحلم الأمريكي للمرأة الناجحة ... هو دا مكاني

نهي الجندي ٢٠١٥ أم لطفلين و ربة منزل تكره المطبخ و تحاول تعلم الكروشيه .أنا بنت جيل الشغل من ٩-٥ و المولات و حياة الطبقة المتوسطة اللي بتقيس نجاحها برقم مرتبها و قدرتها علي اقتناء اكبر قدر من البراندات وبعاني بشدة في كسر مفهومي عن نمط الحياة الناجحة 

بعد اربع سنوات من كتابة الهواة كان ليا الشرف بنشر كتاباتي في أكبر دار نشر في مصر و مع ذلك انا من جوايا حاسة بالفشل وعدم التحقق عشان مش قادرة أعيد تعريفي عن الحياة الناجحة 

الدخل الثابت يا عزيزي ... 

بعد خمس سنين من التخرج و الاجتهاد في تقبل دوري في الحياة قدرت اقتنع انه أهمية العمل تتمثل في القيمة اللي بيضيفها العمل دا في المجتمع. 

القيمة المضافة هي حاليا مقياسي الجديد للعمل والحياة الناجحة وبحاول جاهدة اقنع نفسي انه ممكن يكون العمل دا له عدة أشكال غير الشكل التقليدي اللي اتشكل وعيي عليه 

كيدزانيا شفتها بترسخ النمط اللي بسببه اتعذبت نفسيا وكرهت دوري وبيتي واتحرمت من التمتع بالأمومة في أول سنتين منها في حياتي و مكنتش مرتاحة ان كوكو تتأثر بيها نفس تأثري باللي كان في جيلنا من أفلام المرأة الناجحة وتحقيق الذات. 

لكن طبعا في النهاية العيال انبسطوا جداً جداً جداً و رجعوا مهدودين و قعدت تهبل شوية و تعيط من التعب قبل ما تنام واللي بقي من اليوم لما صحيت الصبح انبهارها بالتجربة وفرحتها بالمنتجات اللي حضرت صناعتها هناك.