فيه أم تزهق من ولادها ؟؟؟

عارفين الصورة الكرتونية للأم اللي بتودع أولادها وهم رايحيين المدرسة وبتضربهم بالشلوت مع جملة حتوحشوني يا حبايبي والباب بيترزع وراهم؟

أنا للأسف بقيت كدة. كوكو ولله الحمد والفضل انتظمت في الحضانة نص الأسبوع فبقي عندي إدمان لصباح ثلاث أيام الحضانة دول, إدمان لكوباية الشاي و أنا قاعدة علي الكرسي اللي قصاد البلكونة والأغاني اللي مفتوحة علي الساوند كلاود وأنا قاعدة أشتغل. خايفة أعمل لنفسي مكتب بجد ومكان عمل لا الإدمان دا يوصلني إني أطرد كوكو من البيت طول أيام الأسبوع. أتاري حياة الكبار الناضجين مش بطالة برضه و أتاري في أصوات في الدنيا غير صوت براعم وماما زمانها جاية وأغاني عفاف راضي. في تطور خطير في شخصيتي ابتديت أسمع الست, بس في الحقيقة مش و أنا بشتغل, بسمعها وأنا واقفة في المطبخ, و لقيت اني مع ألف ليلة و ليلة بطبخ وأروق وأغسل الحوض بمزاج 

أنا أتغيرت أوي, مش موضوع سماعي لأم كلثوم بعد عدائي الشديد لها, أنا فعلاً ابتديت أحس إن الكام ساعة اللي كوكو بتروحهم الحضانة دول حقي وبتضايق جداً في الأيام اللي مفيهاش ساعات الحضانة دي, بتضايق لدرجة مببقاش عارفة أتصرف ازاي معاها.. ما تقومي تسلي نفسك يا كوكو ولا تشوفي لك لعبة تلهيكي 4 ساعات متواصلة كدة محسش بوجودك في البيت, لكن هيهات هاهههههااااي ضحكة ساخرة من أي أم عندها طفل أقل من ثلات أمنياتي الهبلة بتحسسني بالذنب إني برمي حمل تسلية كوكو علي حد غيري عشان أنا مبقاش عندي خُلق لبنتي 

النهاردة كان يوم من أيام اللا حضانة الحزينة, بعد ما فطرنا و روقت الشقة ابتدت تزن وعايزة تتسلي مش عارفة أعملها ايه؟ قلت نطلع البلكونة و اتسلينا شوية في لم الغسيل و تلميع سور البلكونة و اللعب في الشمس وكل دا مفاتش نص ساعة حتي .. هو اليوم بقي طويل كدة ليه؟؟ قلت لما نرتب اللعب بتاعتها ونصنفها ونقعد بلعب جوا الخيمة شوية و الوقت برضه بيعدي براحة أوي .. أمال ياخواتي لما بنزلها الحضانة الساعة 10 ألاقي الساعة جات اتنين هوا ! 

ضيقي من وجود كوكو مضايقني من نفسي, قدامنا لسه يوم طويل بعد الغدا حنعمل فيه ايه دا؟ فكرت إن ليه مابدأش اعمل معاها نشاط بناتي بحت من أنشطة الأم وبنتها؟ النهاردة كان يوم طويل ومتعب في شغل البيت وفقررت أكافئ نفسي وأعمل حمام كريم لشعري وسكرب لجسمي, مش بس كدة دا أنا حعمل لكوكو كمان.. يلا بقي 

من مزايا الصيف الجميل ان عادي تقعدي ولادك مبلولين و قاعدين يلعبوا بالميا في البانيو ومايعيوش, كوكو وطرطشة الميا دو ميكس المهم ما تصبيش ميا علي راسها, أول ما كوكو شافت ان الموضوع فيه رغاوي وصابون و زراويط قلعت البيجاما علي باب الحمام ودخلت تجري وتصرخ في شيطنة, قبل ما أدخلها الحمام عملت حسابي علي كل الحاجات اللي حنحتاجها, فوط .. حمام الكريم .. سكرب طبيعي جبت طريقته من علي النت.. جهاز البخار عشان وشي.. الحجر... الليفة .. الفرشة .. الطبق اللي حنحط فيه رجلينا .. كله كله ميني كوافير ارتجلته في الحمام و كوكو الزقردة حاطة فوطة مبلولة علي راسها بعد ما عملت حمام الكريم ورجليها في الميا بالصابون وماسكة فرشة أسنان قديمة بتدعك بيها ضوافر ايديها. كانت ساعة تموت من الضحك وهي بتحاول تفهم المفروض تعمل ايه وبعدها تزهق وتكب عليَ الميا كلها وبعدها ترجع تعمل نفسها بتعتني ببشرتها زي ماما بالظبط وبعدها تاخد غُطس جوا الطبق اللي المفروض بنحط فيه رجلينا. 

تمت المهمة بنجاح وحمام الكريم هبَط الشوشة اللي في القُصة بس الموضوع قلب غم لما أدركت أنها بعد كل الزراويط دي لازم تستحمي وتغسل راسها كويس كمان.. و رجعنا للزن والعياط والترفيس وأنا بحاول أفهمها يا بنتي لازم تتشطفي كويس لازم نستحمي كويس .. و رجعت أفكر تاني هي الحضانة أمتي بقي هو اليوم مش حيخلص ولا إيه

أشجع بنت في مصر

شغلني التغير الملحوظ في سلوك كوكو الخجول وازاي أستغل بصيص الأمل دا وازقها للمزيد من الشجاعة الاجتماعية. كوكو من زباين الحضانة السواريهاتي علي ما بتصحي وتفطر و تدلع علي ماما و تبوس بابا وتلعب بالنونو آيه وتتفرج علي حلقة توم وجيري والأسد بعد ما فصلت كابل التليفزيون و ريحت دماغي من الخناق علي براعم وتتعطف عليَ و تلبس وتنزل ..بنوصل الحضانة علي 11 الصبح. فقررت في أيام حصة الايروبيكس اللي بتبدأ بدري من 9 و نص مش لازم نعمل روتين الدلع الصباحي عشان تلحق الحصة.

أول يوم أيروبكس كوكو فضلت تعمل لي التمارين يجيي 30 مرة في البيت هوب ني هوب تلات هوب اربعه وكل أنواع وحركات التمارين حفظتها صم وكررتها علي مدار اليوم.

المفاجأة اللي عرفتها من الميس تاني يوم إن كوكو ما لعبتش ! فضلت واقفة تتفرج في صمت علي التمارين والمدربة مرضيتش تضغط عليها ولا تطلعها من الفصل سابتها تقف تتفرج... لما كوكو بتعرف ان بكرة حصة الاروبيكس بتنام محضرة نفسها إن فيه هوب هوب واحد اتنين وتصحي تاني يوم كلها نشاط و حيوية عشان تروح هناك تقف في الأوضة تتفرج عليهم.

مرة جيت أخدها قبل ما يلعبوا لعبة الباسكيت, لعبة عبارة ان الميس بتحدف لكل طفل بالدور كورة معينة و يجري يجيبها ويحدفها في الباسكيت لعبة ظريفة كوكو بتحبها جداً فقعدت لحد ما تخلص. طبعاً أول ما قعدت شبطت في رجلي 5 دقايق كدة عشان تمارس هوايتها المفضلة في مراقبة الأطفال من بعيد وهم بيلعبوا. بعدها الإغراء كان أقوي منها سابتني وبدأت تقف للميس في تأهب عشان تاخد دورها, طبعاً كوكو لازم تاخد الكورة البينك, دا من القوانين الغير مكتوبة في الحضانة أي لعبة بينك تخص كوكو, الميس حدفت لها الكورة وجريت عشان تجيبها قام ولد من المتنمرين خطف الكورة و جري بيها, طبعاً كوكو رجعت لورا فوراً وعملت نفسها إن الكورة دي مش بتاعتها أصلاً. الميس أصررت انها تاخد الكورة وتشدد ان الدور علي كوكو, حدفت لها الكورة فكوكو –اشجع بنت في مصر- بصت للولد تشوف حيجري عليها ولا حيسيبها تاخد الكورة المرة دي. طبعاً الولد جري و هبش الكورة للمرة التانية, فالميس فضلت مصرة ان برضه الدور علي كوكو و اخدتها منه وحدفتها للمرة التالتة بس حدفتها بطريقة تخلي الكورة قريبة من كوكو عن الولد .. في المرة التالتة بس كوكو اتحركت بسرعة وخطفت الكورة قبل ما يوصلها الولد و راحت حدفاها في الباسكيت بمنتهي الفخر و تقول للولد في انتصار "تاعتي"

الدور لف و رجع علي كوكو تاني بفضل صبر الميس بقت كوكو لما تسمع اسمها تدخل في دايرة الأطفال و تزاحم عشان توصل لكورتها, كوكو أخدت ثقة في نفسها أنها مش لقمة سهلة حتي انه في دور نفس الولد أخد الكورة تاني منها قامت رايحاله بقي و شدت الكورة من ايديه بمنتهي الحزم فالحمد لله الميس لحقته قبل ما يمد ايده عليها أو يحاول ياخد الكورة تاني بالعافية .. محدش عارف لو دا حصل ممكن نقعد نعالج تبعات الحادثة الأليمة دي قد ايه !

أنا طبعاً فرحت جداً باللي شوفته يومها, لما عملت أبحاثي عن الموقف أشوف هو أنا و الميس اتصرفنا صح ولا كانت ضربة حظ ولا ايه بالظبط لقيت اننا بالفطرة كدة الحمد لله اتصرفنا صح. من أساليب التعامل مع الطفل الخجول في تجمعات اللعب مع الأطفال.

أولاً كأم ادي لها فرصه تدافع عن نفسها ودا اللي أنا عملته و ما اتدخلتش خالص سبتهم يتصرفوا مع بعض. ثانياً لو بان إن الطفل مش حيدافع عن نفسه وحيعمل نفسه مش واخد باله –زي ما كوكو عملت أول مرة – يُفضل ان حد ذو سلطة غير الأم هو اللي يفض الاشتباك ويجيب حق الطفلة و دا اللي الميس عملته, أصرت ان فيه دور و الدور علي كوكو ثالثاً تعلم الطفلة ازاي تقف لحقها , كوكو ماكنتش عارفة هي المفروض تعمل ايه لما تلاقي حد بياخد كورتها, لما الميس طلبت منها تروح تاخدها أكتر من مرة و أنا اشجعها ويلا يا كوكو والأطفال صقفوا لها لما أخدتها و حدفتها عرفت هي المفروض تعمل ايه.

الأضافة الأخيرة اللي المفروض أعملها اني أدربها علي المواقف دي, ألعب معاها و امثل دور اللي بيخطف اللعب منها وأعلمها تتعامل مع الموقف ازاي. صحيح كوكو أصلا مش محتاجة تدرب عليَ لأنها واخدة حقها مني تالت و متلت بالعكس أنا عايزاها تخاف مني حبة بقي ,الهانم عملالي فيها "أسدٌ عليَ و في الحروب نعامةٌ"

المدام حامل

من أول لحظة وأنا حاسة ان فيه شئ مش مظبوط, أيوة أنا عارفة الكلام دا, الفيلم دا شوفته قبل كدة بس مش راضية أصدق وعاملة نفسي مش واخدة بالي. عادي لما أصحي دايخة بإستمرار ماهو المجهود اللي ببذله مع كوكو مش قليل برضه, ريحة المية اللي بتنزل من الحنفية بتقلب لي بطني معايا حق ماهي دي لا يمكن تكون مية شرب دي أخرها مية صرف صحي, مقريفة عادي يعني من امتي و أنا كائن مفرفش دانا بومة, وهكذا اقنعت نفسي ان كل شئ في مجاراه الطبيعي لحد ما جالي دور اللوز

قل لن يصيبنا إلا ما كتب الله لنا, بغض النظر اني في السن دا ولسه بسنن وبيجي لي اللوز بس اضطريت اسفةً متأسفةً اعترف بالحقيقة المرة و أفوض أمري إلي الله وأواجه اللي بقالي شهور بهرب منه, أم كوكو متعلمتش من غلطتها, محرمتش, غاوية تعب وشقا وبهدلة وكل دا ليييييه لييييييييه, قال ايه عشان البت تتخاوي ما ان شاالله ما عنها إتخاوت, هو قلبي الضعيف الرهيف اللي موديني ورا الشمس حاسة بالوحدة بكرة تصاحب, زهقانة من قعدة البيت بكرة تتعود, بتبص للأخوات و هم ماسكين ايدين بعض ما أمسك ايديها انا ماما و انا بابا وأنا الكل في الكل. بس نقول ايه هي الأمومة كدة
وترقرقت عيناي بالدموع وأنا بزف الخبر اللطشيف جداً لأبوها فبرق لي "بقولك ايييييييه هو انت مش اللي كنتِ عايزة كدة " مع تحذير شديد اللهجة بعدم تكرار اكتئاب الحمل اللي فات محناش ناقصين غم. هو الحمل بترجيعه بقرفه بغباوته نفس العلقة اللي فاتت نسخة طبق الأصل لا زاد قلم ولا نقص قلم. لا لا ثانية واحدة زاد ان ضروسي انهارت وبعمل حشوعصب علي الصاحي في اربع ضروس مرة واحدة ... قد ايه أنا بحب أولادي

بس الحق يُقال يعني أنا اللي رد فعلي اختلف ,هناك فرق طبعاً والبركة في كوكو, يعني بعيط أقل عشان كوكو مابتخلنيش ألحق أستفرد بنفسي, راحة أقل عشان كوكو كائن يعيش علي التمثيل الضوئي من ناحية الأكل والنوم, تركيز أقل في أعراض الحمل الحمل اللي فات كنت بقعد أعمل مناحة قبل كل ترجيعة ساعتين عشان بطني وجعاني وبعدها ساعتين رثاءاً لنفسي , دلوقتي أرجع وأكمل غسيل المواعيين قبل ما كوكو تزهق من اللعبة اللي في ايديها

الحمد لله صامدين مكملين و بدأت رحلة الانتفاخ, أنا مش تخينة دا مش كرش, أو يمكن يكون كرش فعلاً من مارثون الأكل اللي بيحصل لي كل حمل. انا مبيجليش وحم انا بيجي لي فجع. أحلامي كلها تتمحور حوالين أكلة لذيذة شهية, بتخيل المعجنات اللي طالعة من الفرن وحلل محشي ورق العنب وصواني الرقاق والفطير المشلتت والباستا بصوص الكريمة والكبة باللبنة والبيتزا بالببروني و علي قد ما بقدر اكبح جماح نفسي و اقعد أكل في خيار و جزر خيار وجزر خيار وجزر بس برضه لا ببطل أكل ولا ببطل جوع

الخلاصة أنا مرهقة جسمانيا, بتحول لفيل صغنن, برجع كنوع من النشاط الرياضي, بحشي ضروس عالصاحي, باكل و أجوع و كل دا عشان خاطر الست كوكو هانم تنبسط.. ابقي افتكري الجمايل دي

عبارات مش حقولها لكوكو أبتاً

ماشي أنا ظبط نفسي بقول لكوكو يا غبية, هي كوكو طفلة ذكية جداً بس في فردة شبشب شمال في دماغها في ساعات بتطلع ويخليها تتعامل باللا منطق, ودا بيوترني أنا متعودة ان كوكو طفلة منطقية لما بتقفش في حاجات مستحيل تحقيقها بالعقل خُلقي بيضيق واتنفرز بقولي لها "إنتِ غبية؟"

إنذار .. إنذار لو انزلقت في مستنقع انت غبية , مابتفهميش, حمارة, بلوة , وكل الشتايم المغري جداً استخدامها حيبقي اسلوب حياة. دا احنا لسه مدخلناش المدرسة لسه عصر الثبات الانفعالي مبدأش وبناءاً عليه حضرت قائمة بالكلمات اللي بوعد كوكو وأخد علي نفسي عهد إن عمري ما اقولها لها
يا غبية أو عامةً كلمات النرفزة لما تعمل حركة من الحركات اللي تشل أو تقفش علي شئ مستحيل حدوثه, اخر مرة اتنرفزت عليها كانت قافشة انها تكسرر المصاصة بأسنانها ومش عايزة تمصها, حاولت افهمها مراراً و تكراراً ان دا مش حينفع, مش حتعرف, لقيت نفسي بدادي طفلة بتعيط بحرقة انها عايزة تقرقش المصاصة ما تمصهاش و أنا أصلا مش موافقة علي الحلويات وعاصرة علي نفسي لمونة تقوم تاكل حلويات وتزن !!!!! ثباتي الانفعالي لا يحتمل

لما أوعد انفذ في الحقيقة الحمد لله مش فاكرة اني وعدت كوكو بحاجة ومنفذتهاش, مش من نوعية يلا نمشي من النادي وحنيجي بكرة بتاعة بكرة الذي لا يجيئ, أنا عايزة كوكو تاخد كلامي جد. مع اني عمري ما ضحكت عليها بس برضه كتير مش بتصدقني! مش عارفة بقي دا سوء حظ ولا غباء من الاخرين ههه

عملتي كدة ليه ؟ فيه معركة يومية مستمرة علي أرض المطبخ بيني وبين كوكو حوالين امكانية رميها لخزين الرز والمكرونة علي الأرض و شهوتها في فرفطتهم حباية حباية وتضحك. ما بين ليه كدة يا كوكو و ححطك علي كرسي العقاب مش نافع معاها لا رجاء ولا تهديد. سو النصيحة اللي ححاول اتبعها اني أحط قانون واضح للي مسموح نلعب بيه في المطبخ من حلل وأنا بطبخ و اللي ممنوع عقاب فوري بدل من التهديد به مع تكرار تفهيمها أنا ليه بعمل كدة وليه مينفعش نلعب بالأكل

الرشوة, بصراحة هي كوكو اللي قفلت علينا قصة الرشوة, حاولت اخليها انسان فاسد في المجتمع متعملش حاجة بلا مقابل زي أي أم بتستسهل عدم الدخول في الجدل بس كوكو ابهرتني انها بتصمم تاخد الرشوة و ماتفهمش انها مقابل شئ. يعني لو قلت لها لمي لعبك وأنا حديكي البونبونة بتخطف البونبونة وماتلمش اللعب. مش فاهمة ايه علاقة بدا! بس لو قلت لها لمي اللعب عشان احنا نازلين باي بتلمها عشان اتعودت تشوفني قبل ما بننزل لازم ماما بتروق.

ماتعيطيش, فيه فرق بين عياط الحزن والزن. وكوكو استاذة في الزن بس أنا بقيت بعرف افرق بين زن الغتاتة اللي لازم نخليها تبطله و بين العياط اللي بجد عشان زعلانة. العياط اللي بجد بتعامل معاه بهدوء و اديها مساحة للحزن في حضني. أما الزن والعياط والدبدبة علي الارض لو الاحتواء منفعش بقولها من فضلك ادخلي في الاوضة دي عيطي هنا ما تطبتليش عياط. في الحقيقة أنا كنت قريت العقاب الجهنمي دا ان بدل ما ازعق علي نوبة الزن أقولها انت متعاقبة انك تعيطي 10 دقايق في الأوضة لوحدك!!. قتل للمتعة اللي في الموضوع تماماً يعني مش عارفة انهي أم بعقلية شرعبقرية اللي طلعت بالفكرة دي

زهرة الحائط

بعد اكتر من سنة من محاولاتي المستميتة لجعل كوكو اكتر جرأة اجتماعياً و اكتر اندماجاً في مجتمعات الأطفال قررت مضغطش عليها اكتر من كدة و أسيب الطبيعة تقوم بدورها.
ياما حاولت اقناعها باللعب الجماعية أو ان حتي في لعب فردية يمكن لأكتر من طفل استخدامها في نفس ذات الوقت، زي الزحليقة في النادي مثلاً! فمفيهاش أي حاجة لما تطلع ورا طفل او هو يطلع وراها سلالم الزحليقة طالما كل واحد محترم دوره لكن عند كوكو لا و ألف لااا هيهات يا رعاع اشارككم ألعابكم و تفضل تستني لحد ما اللعبة اللي هي عايزاها تفضي و ياريت بقي كمان يطلعوهم من جنينة الأطفال عشان تبقي مبسوطة اوي يعني

كوكو تحب مراقبة الأطفال من سنها من بعيد لبعيد و فضلت فترة طويلة مقتنعة ان دا في حد ذاته لعب، حاولت معاها كتير ،انا اجتماعية جداً و يحز في نفسي ان بنتي عندها بتواجه صعوبة في تكوين صداقات. مفهومي عن الأطفال ان هم دول اللي بيصاحبوا أي كلب معدي في الشارع دون تمييز و يجروا علي بعض و ربع ساعة من اللعب في المراجيح كفيلة انهم يتحولوا لأصدقاء العمر ، انتقاء كوكو الأوفر لصداقتها و معاملتها قلقني، حضانة ونادي ومفيش تحسن ملحوظ شايفاه لحد ما قررت ان انا مبربيش نهي اخري و ان طالما انا موفرة لها مجتمع اطفالي من سنها علي قد ما أقدر ف Don't push يا أم كوكو

السلام الروحي دا طبعاً جه بعد صراعات من تأزيم النفسي حيث ان كل واحد فينا جواه ديكتاتور صغنن نفسه يفرض سيطرته علي أي حد ،أي حد يا خوانا نمارس عليه عقدنا النفسية و تطلعاتنا السلطوية ونخليه صورة تلك الأصل مننا. كلنا عندنا النزعة دي و لو انت مش ظابط بوليس او شغلك لا يسمح بالتسلط فغالباً بتطلعيه في عيالك مع ان الواحد المفروض بيربي عشان يطلع شخصية قويمة مش شخصية متطابقة لشخصيتي

المهم بعد استسلامي و عدم ابداء اهتمام بمسألة الاختلاط الاجتماعي طالما هي مبسوطة و محدش بيأذيها خلاص بقي أكمل قراية روايتي في هدوء و هي بتتمرجح لوحدها علي مرجيحة من ست كراسي

في مرة و أنا بقرا لقيت بنت و اخوها طلعوا اتمرجحوا جنب كوكو، علمت علي الصفحة اللي انا فيها استعداداً اني اسمع احتجاج كوكو علي انتهاك الدايرة اللي رسمتها لنفسهاو مانعة حد يدخل فيها واستنيت ٣٠ ثانية ، دقيقة ... ١٠ دقايق كاملة وكوكو معترضتش ان فيه شخصين ركبوا معاها المرجيحة !
مكنتش دي الحادثة الأولي من نوعها، مرة جيت اخدها من الحضانة لقيتها بتلعب مع بنت هناك فتحي ياوردة و مرة في عزومة لعبت مع قريبها اللي اكبر منها سنة و فضلوا طول القعدة ماسكين ايد بعض !!!!!
دي ظواهر كونية تُدرس و تخليني أقتنع ان مهما كنت فاكرة نفسي فاهمة بنتي كويس فهي لسه عندها أكتر، المهم الظاهرة الكونية دي اتكررت بقي لحد ما لقيتها بتجري علي زحليقة فيها أطفال و بتاخد دورها عادي كدة مع عامةً الشعب و تحت منها راس عيل و فوق منها رجل عيل تاني و لقيت نفسي انا اللي حموت من القلق لأحسن تتخبط و لا حد يشدها ، الظاهر من ضمن امراضي النفسية الكتيرة مرض الأم المتسلطة