القراءة للجميع

جربتي تشتري لأولادك كتب أطفال وقصص؟ أنا جربت.. أخدتني الحماسة لما كوكو تمت سنة و نزلت بمنتهي الأناقة لBookShop من الحلوين دول اللي فيهم قعدة وتكييف وإضاءة مريحة للأعصاب وكعيت المبلغ المحترم في كتب من طراز "أول قصة" , الكلمات الأولي , أسامي الحيوانات والخضار.. كوكو فرحت أوي بالكتب وشافت إن الورق المقوي تحدي مناسب لقدراتها التدميرية بعد ما زهقت من سهولة تقطيع كشاكيلي وأجندات باباها ذات الأوراق العادية 

مقدرتش أحافظ غير علي كتيب صغير للخضروات أنبهرت بيه وبصور الطماطم والخيار والكوسة والبطاطس فيه زي اللي في مطبخ ماما بالظبط. انا أُحبطت جداً هي كوكو مش مبتحبش الكتب بالعكس بتحب القراية جداً (أقصد الفرجة علي الصور يعني) بس هي بتحب ما ما تقرا و تملي عنيها من الصورة وأول ما تخلص الكتاب تقطعه وراها عشان العلم اللي انتفعت بيه ميوصلش لحد بعدها. 

برضه ما يئستش, في زيارة للمنصورة دخلت مكتبة كبيرة وافتكرت كوكو بقصة من نوعية " حياتنا اليومية " اللي فيها النوم والفطار والساعة والكمبيوتر واللعب.. ايوة بقي الكتاب دا معمول من نوعية من الفوم كدة لا يمكن تعرف تقطعه.. وقد كان بعد ما خليتني أحكي لها القصة اتنين واربعين ألف مرة معرفتش تقطعها , بس شخبطت علي النونو وعملت شنب للقطة وفصلت كل صفحة لوحدها فبقي كل حدث وفعل في القصة مستقل بذاته 

قلت خلاص توبة توبة حرام قصص الأطفال مش رخيصة وبعدين أصلا الواحد علي ما بيلاقي قصة عربية بمحتوي مناسب لسن كوكو أو محتوي مناسب أصلاً بيدوخ. أنا يمكن محبكاها حبتين بس أنا أحب ان كوكو أول ما تتعرف علي صور وشكل لغة تكون عربية المحتوي والمضمون. صحيح في النهاية بضطر ساعات أجيب كتب بالانجليزي لأن للأسف المحتوي العربي الموجه للسن الصغير دا قليل جداً والواحد بيدوخ علي ما يلاقيه ولكن ادينا بنجتهد. 

من شهر جبت لها قصة لطيفة المحتوي عن حياة قطة من خامة لا يمكن تدميرها أو فصلها عن بعضها باليد المجردة وفعلاً ماعرفتش تعمل فيها حاجة .. لالا دي أصلاً محاولتش تدمرها ! بالعكس حبيتها أوي و سميتها "توتة توتة " ودا اللي لقطته من الديباجة الطويلة بتاعة كان يا ما كان يا سعد يا إكرام ختاماً بتوتة توتة فرغت الحدوتة .. المهم كوكو لأول مرة في تاريخ كتبها تعامل كتاب بإحترام وحب في نفس الوقت. اتشجعت أكتر لما عرفنا ان الهيئة المصرية العامة للكتاب عاملة في فروعها خصم ل40% علي كتب سعرها في الأساس منخفضة جداً مقارنةً بالسوق 

نزلنا أنا وكوكو وأبوها كأسرة مصرية مثقفة نشتري لكوكو كتب وكانت أول مرة كوكو اللي تنقي قصصها بنفسها, ذات مومنت لما تلاقي الكتاب بعد الخصم بيوقف عليك باتنين جنيه إلا ربع تحس ان الحياة حلوة والدنيا لسه بخير. بس برضه اللحظة اللي بعدها لما تلاقي كتاب بيعلم الأطفال المأكولات نوعية المأكولات اللي فيه الحلويات والهامبرجر والجاتوه تحس انه من أنتم ؟؟؟ أنا أدفع فلوس عشان أعلم البنت الفساد اللي بحارب الكون كله عشان امنعه عنها ؟! بس الواحد لازم يعترف الغنيمة كانت حلوة ومثمرة تجربة لطيفة أشبه بمعرض كتاب مصغر بما إني معرفتش أروح معرض الكتاب ولا مرة من ساعة ما ولدت. احساس كوكو بالإمتلاك انها نزلت نقت الكتب بنفسها و حطيتهم في الكيس و شالته لحد ما رجعت البيت. أما بقي لما رجعنا البيت القردة غيرت هدومها وقعدت في مكان القراية بتاع باباها و فتحت الاباجورة والكيس وطلعت منه الكتب وعملت نفسها قال إيه بتقرا ! 

   

النور قطع

من المفرادات العادية لجيل كوكو اللي لسه بيتعلموا الكلام "النور قطع" و" النورجه" بعد ما كنا بنتناقش في حق المواطن في انترنت سريع و مجاني وانه بقي ضرورة من ضروريات الحياة زي الماء والهواء كدة تقلص طموحنا في تمني تيار كهربي ثابت. 

بس فرحة كوكو بالكهرباء لما ترجع بتوريني الجانب المضئ من الأمر, كوكو وجيلها مش حياخدوا الأشياء كحق مسلم به, النور نفسه غير مضمون, كأم نفسي أعمل لبنتي كل حاجة دا عيب لكن كتربية ممكن نعتبرها ميزة, تربية الطفل علي  ان في الحياة مفيش حاجة مضمون استمرار وجودها و النعم ممكن تزول بتساعده علي تقدير المتاح وتحمل الظروف الصعبة .

تنطيط كوكو وفرحتها بالنور اللي جه وتقديرها لوجود تيار كهربي ثابت حيخليها تحس وتطالب بحقوق بالطبقات الأفقر والشعوب اللي ظروفهم المعيشية أصعب وحياتهم مش متوفر فيها أبسط الحقوق الأدمية. فين أطفال بلدنا من أطفال أوروبا وأمريكا اللي واخدين الكهرباء والتدفئة وحقوق الإنسان كأمور مسلم بها, عيال فرافير صحيح. السنة اللي فاتت ألمانيا احتفلت بمرور 50 سنة من غير ولا مرة  انقطاع التيار. طب ما ذنب الأطفال المحرومين من نطة النور جه النور جه؟؟ .. دي بهجة محرومين منها و لا يمكن طفل ألماني يطلع مقدر نعمة ان بيته منور 

بعد ما تغلبت كوكو علي هلعها الهستيري من توقف  شفاط المطبخ عن الدوران لما النور يقطع (الموضوع دا كان بالنسبة لها مرعب زي رعبنا من توقف الأجرام السماوية عن الدوران فتقع فوق دماغنا كدة) بدأت تاخد من  "النور قطع" حجة لتنفيذ مطالبها.. مش عايزة تروح الحضانة فتقنعني انه مينفعش عشان النور قطع هناك ! كلموها في الموبايل البلاستك قالولها قولي لماما خالتي حموءة بتسلم عليكي وبتقولك النور قطع في الحضانة. عايزة تنزل من البيت اصل النور قطع, عايزة عصير عشان النور قطع عايزة تتفرج علي توم و جيري عشان النور قطع ,كل رغبة ممنوعة سببها في الحياة عند كوكو ان النور قطع. 

لحد ما دخلنا في الموضه الجديدة. مش عايزة تنزل الشارع بليل عشان "النور قطع" في السما أحاول أحايل و أدادي و أقنع ان الشمس روحت و القمر جه و اسمها الدنيا ضلمت مش النور قطع زي ما أقول أنا بكلم نفسي تفضل بصالي بتركيز شديد جداً لحد ما أخلص شرح وبعدها ترد عليَ "لااااااااااا نهي النور قطع" ,أنا بتحول بشكل مستمر من كوني"ماما" لكوني "نهي" في حالة اني حمارة مش فاهمة أو مطلوب مني تنفيذ أمر معين غير قابل للنقاش  

خالة كوكو في طفولتها كانت بتعاني من مشكلة عدم فهم هو الجبال والبحار بتروح فين بليل, كنت فاكرة كوكو حتتسائل نفس الأسئلة الوجودية بس القردة مستوعبة إنهم موجودين بس "النور قطع"! وهكذا تحول النور قطع لتفسير كل الظواهر الكونية الغامضة مستعصية الفهم علي كوكو ومهما فسرت وقلت وعدت وزدت وخبطت راسي في الحيطة تبقي بس الأجابة الوحيدة المقنعة بالنسبة لها ... النور قطع !   

الصيف قادم .. موتوا بغيظكم

من فترة كدة كتبت علي الفيس بوك لأصحابي الشتويين " الصيف قادم .. موتوا بغيظكم" وانهالت عليَ اللعنات والاستنكار والغضب من كوني فرحانة في الكائنات الشتوية اللي بتتفرهض من الحر بسرعة.

ماذا رأيتم من الصيف حتي تكرهوه؟ أنا مش فاهمة والله الناس دي بتحب الشتا ليه. آه صحيح ماهم معندوهمش أطفال ومش عارفين يعني ايه أصحي في عز البرد ارضع ولا أغير ولا أعمل حساب الخمسة وتلاتين طبقة هدوم وأنا بتحرك برة البيت, مش عارفين وجع القلب مع أدوار البرد والتهاب اللوز ولا عارفين احتياطات الاستحمام لا تستهوي ولا مضطرين يقنعوا طفلة انها ما ينفعش تشرب حاجة ساقعة من التلاجة قبل ما تهدي ولا بيجروا وراها بعد ما قلعت الشراب للمرة الخمسين ومشيت علي السراميك حافية. أنا أحب الصيف وافتخر, كل ما قربت من حالة يا مولاي كما خلقتني بحس بالتحرر أكتر, البلوفرات بتخنقني وشكل كوكو وهي برص مسلوع في فستان كات أجمل غير النفخة الكدابة بتاعة السويترات.

بقالي أكتر من أسبوع بخطط ماذا نحن فاعلون في الصيف الجميل ,للأسف النادي صدمني بعدم وجود أي انشطة رياضية لسن كوكو, لسه سنة كمان و أنا اللي كنت عاملة حسابي ان زعبولة حتلعب جمباز وتلبس الجيبة التُل الواقفة دي. كنت مخططة في الصيف نستعيد نشاطنا الرياضي ونكبَره بدل ما يبقي في البيت يتحول لتدريب علي لعبة بس واضح اني حضطر أبقي المدرب رشدان بتاع كوكو سنة كمان. 

أفكار فنية واعمال يدوية قاعدة بجمع فيها من علي Pinterest  عشان أبدأ في تنفيذ مشروعي المؤجل "مشروع الجمعة" كل جمعة قبل الصلاة أعمل مع كوكو عمل فني يدوي من خامات بيتي, عارفين انتم نوعية الأعمال اللي بتكلف اللاشئ دي. نفسي جداً الموضوع دا يكبر معانا ويبقي في زحمة الدنيا والشغل والمدارس حاجة مقدسة كدة أم وابنتها كوالتي تايم قبل طبعاً ما تدور الأيام وكوكو تبقي مراهقة وتكتشف ان ماما دي من العصر الحجري ومش فاهماها و أصحابها هم البشر الوحيدين اللي بيقولوا كلام يستحق الاهتمام 

قررنا مندخلش كوكو المدرسة السنة دي وهو قرار بأثر رجعي لأننا كأباء وأمهات جداد سذج وعلي نياتنا اكتشفت ان ميعاد التقديم للمدارس فات خلاص وباب التقديم بيقفل في شهر اتنين أصلاً فعملنا نفسنا احنا أصلاً مكوناش عايزين ندخلها بيبي كلاس, بس معني كدة ان كوكو لازم تنتظم في الحضانة أكتر من كدة وتتعود إن فيه جزء من اليوم من غير ماما دا شئ طبيعي الحياة بيستمر عادي من غير انهيار في منظومة الأفلاك الكونية . فيه قدامي شغل كتير علي نفسية كوكو وتقبلها للحياة من غيري وتقبلها ليا أنا شخصياً .. كوكو أنا بحذرك بطلي تدبدبي لي علي الأرض انا انسانة عصبية جداً وانت بتلعبي في منطقة خطر 

بالنسبة لي بقي لو بطلنا نحلم نموت .. بحلم بعودة فتاة الالومبياد من بياتها الشتوي وبحلم بإنتظام عملي أكتر من كدة.. بحلم أكَبر قصاري الورد اللي عندي في البلكونة و أصحي كل يوم أسقيها و أنا بشرب الشاي الصبح .. بحلم بأزاير المياة المتلجة والبطيخة الساقعة بعد الغدا بحلم النور ما يتقطعش أكتر من مرة في اليوم (كدة الموضوع تحول لخيال علمي مش أحلام) , كل صيف و انتم طيبين بوست مبتهج بمناسبة الصيف وكل واحدة تكتب لي بتحلم بإيه تعمله الصيف دا ونتقابل في أكتوبر الجاي نشوف عملنا ايه من اللي خططنا له  في تدوينة كئيبة عنوانها "الشتا قادم يا نهنوش موتي بغيظك"

     

الفرح

الموضوع بقي استهبال رسمي, لما طقم فرح لكوكو عشان أجيبه شيك شوية يكلفني ما يقرب من تكلفة طقم سواريه لي أنا شخصياً كدة بجد حرام ! طب أنا بطلع عين السواريهات بتاعتي من إعادة لبس وإعادة تدوير وإعادة اختراع حركات في موديل الفستان تغير من شكله, فبشكل أو أخر بحلل تمنه لكن ليه لبس أطفال حيتلبس بالكتير أوي تلات مرات كمان و يصغر عليها أو يتبهدل من شقاوتها يكلف التكلفة دي ؟ حتي في لبس الخروج العادي, ليه جاكيت لكوكو تمنه قريب من تمن جاكيت لي؟ طب فين فرق تكلفة القماش طيب ؟ دا الجاكيت بتاعها مايجييش كله علي بعضه كم عندي 

حيث توجد النصاحة تختفي أم كوكو, أيوة أنا بعترف أنا مش ناصحة خالص , من نوعية الأمهات الهبل اللي بيخشوا يكعوا دم قلبهم و يجيبوا حاجات بأضعاف أضعاف سعرها الأصلي, بس عارفة اني بتسرق خصوصاً لما بيُتاح لي السفر برة و أدخل نفس المحلات و نفس الماركات وألاقي السعر حاجة تانية خالص شئ مختلف تماماً عن التهريج اللي عندنا في مصر, طب أفهم ليه؟ هم فاكرين اننا بنلاقي فلوسنا دي مرمية في الشارع ؟ 

واحدة صاحبتي من الناصحات أكدت علي كلامي بملاحظتها ان معظم محلات الملابس دلوقتي حولت نشاطها لملابس أطفال أو علي الأقل فتحت قسم للأطفال, الموضوع مربح أرباح فلكية, نصيحتي لأي ماما عندها أمكانية تشتري كميات ملابس من برة تشتري وتيجي تبيعهم هنا, مش ضروري كمية منتظمة وكبيرة تسمح بفتح محل , اليوم المفتوح في أي نادي أو في مجتمع أمهات حيدر عليكي دخل شهري معقول جداً, من تجربة واحدة صاحبتي بتسافر فرنسا بإنتظام بتشتري من هناك و ترجع تبيع في اليوم المفتوح بسعر أرخص من السوق المصري بمراحل و برضه بتكسب والأمهات زباينها بيحسوا بالانجاز انهم اشتروا حاجة اسمها فرنساوي وتُعتبر أرخص من السوق المحلي(عشان يبقي عندك تخيل الربح في الملابس و السرقة اللي بنتسرقها قد ايه)

طب دلوقتي كوكو لأنها بتطول بس ما بتتخنش ممكن اللبس يقعد معاها موسم ونص, لكن في السنة الأولي أيام ما كان اللبس بيتغير كل تلات شهور الواحد كان بيضرب كف علي كف, يعني فستان مثلاً ب200 جنية لما تيجي تحسبي عدد مرات اللي اتلبس وعدد مرات اللي تضطري تغسليه فيفقد رونقه تلاقي ان اللبسة الواحدة واقفة عليكي بمبلغ والبقعة واقفة عليكي بخسارة محترمة 

كسوة الصيف داخلة علينا أهو والواحد لسه مفاقش من صدمة الفستان السواريه بتاع الهانم وأنا قاعدة افكر في حلول, طب اتعلم الخياطة مثلا بس انا أصلا مبعرفش اثبت زرار وقع من قميص أبوها, اعتراف مخجل أنا عمري ما حعتبر نفسي أم ناجحة لحد ما أبقي من هؤلاء اللي بيخبزوا معجنات بيتي وبيعيدوا تدوير ملابس ولادهم في ملابس أو اكسسوارات هاند ميد , بس بما إن كُتب عليَ الفشل في المواضيع دي الواحد مش عارف يعمل ايه في السرقة اللي بيتسرقها دي و اديني بدفع و ابرطم و أبو كوكو يعبر لي عن انبهاره بمستوي الصرف اللي بصرفه.. آه ياني