ضحكات شريرة متقطعة

علاقتي بكوكو تتلخص في جملة واحدة حكمة عبقرية "اعرف صاحبك و علم عليه" ... سيبكوا بقي من جو الأمومة والحنان وست الحبايب يا حبيبة دا مش عندي خالص إطلاقاً .. ابسولتليالمتابعين لكارتون "فاميلي جاي" حيفهموا أنا أقصد إيه .. كوكو دي مش طفلة بريئة هطلة بتآكل وتلعب وتريل وخلاص .. دي كائن شرير ذكي يسعي لتدميري -بنجاح- بدليل إن من ساعة ما جت بقيت بكلم نفسي -أكثر من المعتاد- و بقيت بشوف حاجات وأشخاص مش موجودين .. هاه عايزين دليل كمان ؟؟؟عشان كدة مفهوم إن لما بعلمها تعمل حاجة جديدة أو أعودها علي حاجة بعتبرها لحظة إنتصار بتلذذ بيها واضحك ضحكة شريرة متقطعة

الضحكة الشريرة الأولي: لما كوكو بتحرن علي الأكل وتعلق علي صنف واحد بأكلها كل حاجة في قلب الصنف دا .. لما بتحب الزبادي بحط كل حاجة في قلب الزبادي من أول البسكوت لحد الكوسة .. الخدعة إن طعم الزبادي اللي يفضل باين .. دا مرة أكلتها فراخ في قلب البطيخ .. اه والله !

الضحكة الشريرة التانية: لحد دلوقتي معودتش كوكو أنها تعرف تنام لوحدها .. لازم ترضع عشان تنام .. مفيش مشكلة عندي ( مع إن طبعا الأحسن ان اعودها علي روتين يومي للنوم بس عمري ما نفذت الموضوع بجدية ) اقعد بالنص ساعة ارضع فيها علي ما تنام واصحي مرة و اتنين وتلاتة عشان قلقت و لا جاعت ماااااااااااشي .... لكن إني اتحول لتتينة أدمية لَا بقي كدة اوفر! سوري معطلكيش أنا لي حياتي مشترتنيش من سوق النخاسة .. كنت كل ما أحس إنها خلاص نامت وأشيلها من علي صدري تصحي و تصرخ  فين وفين لما اكتشفت الخدعة .. إنها هي اللي تسيبني .. حتسألوني أقنعها تسيبني ازاي ... ها ها ها سذج ... اقفل مناخيرها طبعا مش محتاجة تفكير يعني نيايهاهاها

الضحكة الشريرة الثالثة: أول ما عرفتها علي المعلقة ماكنتش متقبلاها خالص ومش فاهمة إن دا أكل تفتح له بقها .. كنت شوفت ببرونة بحلمة علي شكل معلقة .. مقتنعتش بيها أني أجيبها بس ادتلي فكرة شريرة نفذتها بقيت كل ما أكلها أقرب ببرونة المياة من بقها تفتحه علي الآخر أقوم هووووب مدخلة المعلقة .. نياهاهاهاهاالضحكة الشريرة الرابعة: فيه مأساه إغريقية بتحصلي كل يوم لما آجي أحط كوكو في كرسي العربية المخصص للأطفال .. يا لهويييييي علي الصريخ و لعياط اللي بيحصل ولا كأننا في فيلم محرقة الهولوكوست .. هوووووف كرهتني في السواقة والخروج من أصله .. و بعد محاولات كتير عرفت المشكلة عندها اللي بيحز في نفسها أني بشيل ذراعها من علي رقبتي و أنزلها .. لا لازم هي اللي تنزل بمزاجها و دا اللي بنعمله بفضل الله و بباكو بسكوت ماري تقعد تقرقض فيه وتعتقني لوجه اللهو تتوالي الضحكات ... و ساعات بتقلب بغم طبعا وهي اللي بتبطحني ارضاً .. وأهو علي رأي المثل كل قرد و له تنطيطه

Ain't No Mountain High Enough

اخد مني سنة و نص عشان افهم الحقيقة دي ..ان ب عيلتي Ain't No Mountain High Enough ... كوكو اللي كنت معتبراها السبب الرئيسي في انهيار مستقبلي المهني هي دلوقتي السبب الرئيسئ و المباشر في بدء حياتي العملية

!! Horrraaaaay

لولاها مكنتش اهتميت اصلا بال Parenting و تربية الاطفال و مكنتش فتحت صفحة  ام كوكو علي الفيسبوك و مكنتش لفت انتباه مؤسسي سايت Super Mama  اللي طلعوا من احسن اربع مشاريع في مسابقة ITNEXTGEN  القائمة تحت اشراف السفارة الدنماركية في مصر 2011

كأم عاملة فخور اخدت كوكو في الشيالة و طلعت علي الماريوت اقابل زينب و ياسمين اللي لقيتهم بنات لطاف جدا عايزين يعملوا حاجة مختلفة مش مجرد موقع تقليدي عندهم خطة واضحة و طموح اتمني اتعلمه منهم ان شاء الله و الاهم لقيتهم web designers تاداااااا ...زينب اشتغلت Drupal 5 سنين قلت لها علمني الكتاكيت :D   انا اكتب لكم المحتوي الامهاتي و انتو تعلموني يا حلوين .. كان واضح عليهم انهم من هواة ال multi tasking و اني وقعت في الفخ :D (تمام تمام .. ودعه يا لمبي )

تاني يوم بعد اعلان النتيجة و فوزهم في المسابقة ( وش كوكو عليهم :D ) ابو كوكو اخدنا العشاء الختامي اقابل بقي رجال الاعمال الامريكان و الدنمركيين المهمين .. اللي بسطني أوي ان كل "ستات" الاعمال اللي بالمناسبة ناجحين جدا في الاصل امهات و انخرطوا معايا في نقاش مهم عن دور ولادهم في حياتهم و ان المهم اكون حاطة خطة واضحة حتي لو كانت بطيئة الخطوات في السنين الاولي من عمر كوكو

الظريف ان انا كنت بحاول ارسم الاهمية و المهنية الفظيعة قدامهم و تقولش واخدة ال Female  entrepreneur of the year في مصر هههههه كنت حاسة اني عاملة زي دوري في البحث عن نيمو في اجتماع سمك القرش عمالة أقول السمك صحاب مش طواجن بس الظاهر اني نجحت و الله أعلم لدرجة ان ال CEO of The Marketing Zen Group  شاما  و هي بتتكلم عن تجربتها في مصر جابت سيرتي يا حالولي يا حالولي :D 

المشوار لسه قدامي طويل انا بس بسملت و لسه حشمر دراعي و ابتدي بس عايزة اقول ان طول المشوار دا من أول ديسمبر 2009 لما عرفت اني حامل و عيط لما عنيا ورمت مرورا بأغسطس  2010 لما ولدت لحد يناير 2011 لما الثورة قامت و فوقتني استحملتني و استحملت نكدي و نوبات عياطي و اكتئابي ... ربنا يخليك ليا :)))) و اوعدك أول قبض "للسولاري" حعزمك علي  أكلة سمك محترمة :))))))

شـــــــــــــــــــــــــــــــــــــــــــــــــــــــــــــــــــــــــــــــــــــــكراٌ