أين أشيائي : أشياء غير تقليدية لمواجهة كوكو المفترية

في محاولة جادة مني ان ابطل نواح و ابص للموقف ب"منظور ايجابي " علي رأي زوجي حبطل عياط شوية و أكتب عن الحاجات اللي ربنا يسرها لي تساعدني في شيل كوكو و تحمل الموقف ... يلا اهو الواحد بيحاول يكون ايجابي و يشكر ربه علي نعمته علي....

1- iPad

ال  iPad  هو أحسن اختراع بعد الموبايل و الكتاب ...Electronic Book + Internet  بإختصار ال entertainment set  بتاعتي
ميزة ال iPad أنه  خفيف و شاشته باللمس سهل امسكه و انا شايلاها أو برضعها مثلا ...و نفس الوقت حجمه مثالي سواء للقراءة أو لتصفح الاتنرنت ...
معتقدش ان Apple فكروا ان الiPad مثالي للمرضعات خصوصا اللي مش من هواة التليفزيون زي حالاتي بس هو فعلا مناسب جدا للموقف دا ... كوكو كانت تصحي في أي وقت عجيب أخدها في حضني و أنا ماسكاها بإيد و ال  iPad  حبيبي في اليد التانية كدة من غير ما اضطر أقوم من السرير و لا ابقي زهقانة ...

شكرا    Apple  انكم خليتم حياتي ألطف 

2- غطاء الرضاعة Nursing Cover 


أنفع هدية جاءت لي علي الاطلاق ... هي فكرة بسيطة جدا و لكنها تساوي حريتي عبارة عن قماش ساتر لي بعلقها علي رقبتي عشان أقدر ارضع كوكو في الأماكن العامة...

اني اكون مطالبة بالرضاعة كل ساعتين معناه انه لا خروج أو الحبس في الحمام أو أي اوضة ...في الأول كنت بتكسف من المنظر ايه واحدة بترضع دي بس لما لقيت نفسي حاتحبس و اتخنق فكرت هو انا مكسوفة من ايه ؟؟ هو انا كنت حتكسف اني اطلع الببرونة مثلا؟؟ بالعكس أنا المفروض أبقي فخورة بنفسي اني مش بحرم كوكو من الرضاعة الطبيعية و في نفس الوقت عارفة اتحرك (نوعا ما )

غطاء الرضاعة سمح لي بالحركة و بحضور التحمعات العائلية من غير ما اتحبس لوحدي في اوضة و كأني بتعاقب علي أني برضع طبيعي

3- Play Gym 


هدية أخري رائعة جاءت لي هي عبارة عن park  زاهي الألوان بيتعلق منه ألعاب و مراية و عصفور بيقعد يغني

الplay gym  دا كان ممتاز بيسلي كوكو جدا من أول ما بقت شهر و نصف لما كان الرؤية عندها غبر مكتملة النمو الألوان الفاقعة و الزاهية و أصوات الموسيقي كانت بتلفت انتباهها و تسليها شوية بعد الرضاعة...و مخدة التقريع (Burp Pillow)   بتساعدها تتقرع اسرع دا غير مراية مكبرة عشان تعرف تشوف نفسها

و اهو كله بيسليها شوية كدة ... لما تمت الشهر الرابع و بقت بتعرف تمسك بشكل جزئي .. اللعب مصممة علي انها تتمسك بسهولة عشان كوكو تتفاعل معاها ...
فعلا الناس دي مبتهزرش ... واخدين الموضوع جد أوي !

4- بطانية النوم Sleeping Bag

مفيدة جدا البطانية اللي بتتلبس دا في البرد اللي احنا فيه.. لما كوكو تصحي في نص الليل مشيلش من عليها كل الأغطية فتبرد و –الأسوأ- تفوق لي ... البطانية دي بتفضل مدفياها و مخلياها في مود النوم ترضع و تكمل نوم بسهولة ( معظم الوقت !)

5-  النطاطة Jumper
و أخيرا النطاطة اللي استلفتها مؤخرا عشان أجربها مع كوكو ... كوكو و هي داخلة علي شهرها السادس مدركة تماما للحركة و لكن غير قادرة عليها ... و دا بعيد عنكو بينرفزها و بيجب لها اكتئاب ... اشمعني مامي و بابي بيتحركوا و انا راقدة مكانييي ... عاااااا حركوني يا أوباش ... عاااااا
النطاطة لعبة أمنة تسمح لكوكو تتحرك في دايرة محدودة و تطلع كل رغباتها في الحركة .. و نظرا لأنها ماكنتش تحلم بكل التنطيط دا فهي حبيتها أوي و لكن معظم المجربين بيقولوا انها مرحلة مؤقتة مش حتدوم أول ما تدرك انها ممكن تتحرك أكتر من كدة ...
مؤقتة مؤقتة .. خلينا نستمتع باللحظة و بأن كوكو ساكتة و بتلعب 10 دقايق بحالهم ...

انا مرتابة

من ساعة حادث اسكندرية البشع و انا في دوامة من النقاش الذي لا جدوي منه ما بين ضرورة النظر في الخطاب الديني السائد و اعادة هيبة الأزهر كنموذج للاسلام الوسطي و ما بين اقناع اصدقائي المسحيين انه لا يوجد مسلم مهما كان متشدد و مهما كان رافض لكل ما هو غير اسلامي لا يقبل و لا يقر بما حدث ....ما بين حرقة دمي من سيل الفتاوي من ناس بتيجي علي الهايفة و تتصدر و بين خوفي الحقيقي مما حدث و احساسي انه يمكن ان يحدث لي و لأسرتي في أي لحظة خصوصا اننا نسكن بالقرب من كنيسة كبيرة و بصراحة كدة انا مش عايزة اموت ... انا لسه محققتش اي حاجة و لا بقيت انسانة كويسة تقدر تقابل ربها و هي طمعانة في رحمته

تتكلم كل المصادر الرسمية عن "الجهات الخارجية " و نظرية المؤامرة  و مسخرة ان التفجير استهدف الجامع و الكنيسة معا.... بصراحة انا لا أثق في نظرية المؤامرة لسبب بسيط هو اننا معرة الشعوب و ديل الأمم و اسرائيل لو كانت بتضيع وقت مخابراتها معانا يبقوا بجد اغبياء فنحن حكومة موالية تحلف بحبها لاسرائيل و خدمة مصالحها و شعب فاقد الهمة يولي عليه حثالة الأمة لو لا يعترض مهما نهبوا و سرقوا و ظلموا "كما تكونوا يولي عليكم"

انا شامة ريحة مش كويسة .... و في دماغي مؤامرة من نوع اخر ... لماذا جاء هذا العمل الأرهابي بعد مهزلة انتخابات مجلس الشعب التي لم تنتهي مشاكلها بعد علي غير العادة.. لماذا جاء بعد تصريح جمال مبارك بأن هناك قرارات اقتصادية قادمة "صعبة " و تخيلوا بقي لما جمال مبارك يقول صعبة حيبقي شكلها عامل ازاي !!!.... صحيح القاعدة هددت كنائس مصر ( و ذلك بعد ما عشان واحدة سابت بيت جوزها طلعوا حماة الاسلام اللي بيدافعوا عن دينهم من ان ينقصه او يزيده واحدة و لا يدافعوا عنه في وجه الفساد و التخلف الذي نعيش فيه حتي تطوع بن لادن مشكورا بالدفاع عن المسلمات المختطفات في اقبية الكنائس !!!!!)

و لكن حتي الان لم تعلن القاعدة مسؤليتها و لم تخرج علينا مجوعة من المسلحين الملثمين ليعلنوا ان جماعة السوالف التكفيرية تطالب النصاري الكفرة بالخروج من مصر الاسلامية او بتحرير مساجين الكنيسة أو اي هرتلة اي مطلب يا جدعان ... يعني اللي خطط و نفذ دا مالوش اي مطالب ؟؟؟ تهديد .؟؟؟ اي حاجة ؟؟؟ الصمت دا مش انساني

الي ماذا أرمي ... هناك خبراء تفجير يقسمون بقبور امهاتهم ان احداث 11\9 مؤامرة كبيرة علي الشعب الامريكي ... لا يمكن ان تحدث طائرة الدمار الذي حدث .. بل سلسلة من القنابل الموضوعة داخل المبني بشكل مدروس و منظم ... بس دول 3000 ضحية من المدنيين ! و لكن السؤال هل حياتهم تساوي عند الادارة الامريكية السيطرة علي البترول و خلق عدو حجة لغزو و تدخل في شئون اي دولة في العالم ؟؟؟

السؤال هنا هل حياة 21 مصري يساوي الهاء الناس أما بالعدو المشترك  الا و هو الارهاب و أما بحرب طائفية و بذلك يتم فعل كل شئ بسهوله من اول تمرير قانون الطوارئ في المجلس الجديد مرورا بالسيطرة علي كل اشكال المعارضة بدعوي الحفاظ علي مصر من الفتنة الطائفية لحد انتخابات رئاسية سهلة و سلسة يتم اجهاض فيها اي مشروع ديموقراطي

و في النهاية اقول ... ان بعض الظن اثم ...