ماما ... كلمة واسعة علي أوي ... حصل لي موقف أكد لي إن شخصيتي –و لا مؤاخذة- مش " كوية " طلبت ساندويش من ولعتين ( محل سندويشات) و جالي ساندويش تاني غلط فكلمت المحل عشان يبعت لي واحد بالساندويش اللي طلبته ... فوجئت بالرجل بيقول لي "طب كلي دا و المرة الجاية حنبقي نهتم اكتر من كدة" !!!! و الله العظيم جات له الجرأة يقول لي كدة !!!! فشخط فيه "ان لا طبعا انا عايزة الساندويش اللي طلبته " ... بس واضح ان الرجل فهمني علي طول و عرف ان البقين دول مالهومش أي قيمة و لا حعمل له حاجة لو مجاش ... الظاهر ان صوتي كان باين عليه ان كان قلبي بيدق بسرعة و انا بزعق و اني مش متعودة علي الشخط ... من الاخر يعني بت هفأ مش مهم يدوني حقي لأن مفيش خطر مني....
طيبة ... غلبانة ... المرادفات المؤدبة اللي بيقولها الناس علي الشخصية العبيطة اللي بتتسك علي قفاها كل قلم أوحش من اللي قبله ...صحيح ان الشخصية دي بتبقي مريحة في التعامل و مش بتاعة مشاكل ... و لكن هل دي شخصية تصلح لتربية طفل ؟
أربي كوكو ازاي و انا اذا بعت خسرت و إذا اشتريت إضحك علي ... لو رحت السوق انا الزبونة اللي بيدوها البواقي و يحسبوها بالغالي ... دلوقت انا ماشية و الكتاب " What To Expect : The first Year" في ايدي بيقول لي اتصرف ازاي في أي موقف يحصل لكوكو شهر ب شهر ... طب لما تتم السنة ؟ لما تدخل المدرسة ؟ ازاي حربيها تبقي الشخصية القويمة التي لا تظلم و لا تظلم ؟ ازاي تبقي مؤدبة و نفس الوقت لو حد غلس عليها ازاي ترد و تدافع عن نفسها .. اذا كنت انا شخصيا مش بعرف ارد و لا ادافع عن نفسي ... ماهو فاقد الشي لا يعطيه
ماما التي تعرف كل شئ ... اللقب اللي أمي اخدته عن جدارة ... عارفة كل حاجة من اول مقاس لبسنا اللي بتجيبه بالنظر لحد طبق الاكل اللي اتدلق و مسحناه قبل ما تيجي .. عارفة السر اللي مخبينه عنها و الحاجة الغلط اللي بنعملها من وراها و لو معرفتش تلاقيها لسبب مجهول بتعاملنا بشك و ارتياب و شوية عدائية ... بإختصار قلب المؤمن دليله
مقدرتش اكل الساندويش و لا قدرت ارميه ... فضلت حطاه قدامي كدة رمز لشخصيتي الضعيفة ....رمز لفشلي في تربية كوكو ... ... لحد ما جه ابو كوكو من برة و اكله بالهنا و الشفا و ريحني من عذابي
