اكتئاب ما بعد الولادة و الوش العكر

حسبي الله و نعم الوكيل في اللي عمل المرايات في اوضة النوم كيبرة و في وش السرير ... الواحد لا بيه و لا عليه كدة و تلاقي عنيه خبطت في المرايا و شاف وشه العكر الناحية التانية
 شعر متكوش ...وش اصفر.. بطن لسه كبيرة.. لبس مبهدل.. سهم يشاور علي " هنا ترقد مكتئبة" .. ... يعني زي ما الكتاب بيقول و المرايا اللي في وشي كمان مع اضاءة النيون مش مدياني فرصة انسي ان شكلي عجز و جسمي باظ
 
-----------------------------------------------------------------------------------------------------------
 
  70-80% من الأمهات يصبن باكتئاب ما بعد الولادة و يستمر لثلاث أسابيع و 20% يتحول لديهن الي اكتئاب مرضي يحتاج الي تدخل علاجي إذا لم يتم التعامل معه بشكل صحيح.
و اعراض اكتئاب ما بعد الولادة (Baby Blues) :
•    بكاء
•    مشاكل في النوم ( أرق أو نوم زائد)
•    فقدان  شهية أو شره زائد
•    شعور متواصل بالحزن
•    عدم الرغبة و القدرة علي الاهتمام بالمولود 
•    مخاوف مبالغ فيها بالنسبة للمولود
------------------------------------------------------------------------------------------------------------
المشكلة مش في الاكتئاب نفسه ... المشكلة في طريقة تعاملنا معاه ... حبس النفساء في البيت و منعها من الخروج لحد ما تربعن اكيد مش حيساعدها علي الاكتئاب يروح.. ناهيك عن الهجوم التتري اللي بيحصل علي البيت عشان الناس تبارك .. طبعا فيه ناس الواحد بينبسط و نفسيته بتتحسن لما يشوفهم لكن خلينا صرحيين مع بعض .. أكيد انا مش حرقص طربا عشان بنت عم جوز ابن خالة ابويا جات تزوني و بتطالبني اني اقوم البس و اقعد معاها علي الاقل نص ساعة عشان مابقاش قليلة الذوق..
ولا كابوس كل يوم ... لازم اكل فرخة ... فرخة بلدي كاملة !!!!! يالهويييييي دا غير الاختراع المؤذي اللي اسمه المغات ...مشروب له نفس لون و كثافتة و قوام الطين و رشين عليه شوية سمسم اعوذ بالله التضحيات لها حدود ... لو اللبن مجاش يبقي البيبي نصيبه كدة

------------------------------------------------------------------------------------------------------------
 

لمقاومة الاكتئاب يجب الخروج أو حتي الجلوس في الشمس سواء مع المولود او تركه مع احد الاقارب كل يوم.و أيضا الحفاظ علي الأقل علي ساعة  في اليوم خاصة بالأم يؤخذ منها المولود لمنحها بعض الوقت لنفسها تفعل فيه ما تريد

-----------------------------------------------------------------------------------------------------------
 
عن نفسي انا اتمردت علي قوانين الحبس و خرجت و سافرت بمجرد ما اتحسنت صحيح كنت مرهقة بس احسن مليون مرة من لما الايام كلها تبقي شكل بعضها .... و ابقي اللي بنام فيه بصبح فيه ... و وشي يفضل عكر....
 

اكتئاب ما بعد الولادة و الوش العكر ...coming soon

 بعد ما كتبت التدوينة اللاب فصل و اتمسح الكلام :S
بكرة بقي ابقي اعيدها ان شاء الله ...
انتظرونا....

قبل ما نبتدي ....

قبل ما نقول بسم الله الرحمن الرحيم و نبتدي تدوين أحب اوضح انا عملت المدونة دي ليه... الناس اللي عارفاني عارفين كويس ان وقت هوجة انشاء المدونات لحد ما بقي فيه مدونة لكل مواطن لم انساق وراء القطيع و حافظت علي كوني "Blog-Free" فماذا جد؟؟
اللي جد هو مجيء كوكو و شقلبة حياتي رأسا علي عقب.....

مولودة في البيت ... يعني مفيش نوم إلي حد الهذيان ... يعني الاهتمام و مراقبة كل تفصيلة فيها إلي حد الهوس ...يعني قراءة كل كتب و مواقع الأطفال المتخصصة إلي حد قئ المعلومات
كل دا لابد له من مخرج ما ...فإما ان اتحول إلي أم تقليدية دائرة اهتمامتها محدودة و محصورة في بيتها و عيالها و أما ان ألجأ لحل غير تقليدي افرغ به اللي في راسي و اسيب مجال لاهتمامات تانية برة نطاق البيت و الأولاد.

و من هنا جاءت فكرة التدوين و مشاركة تجربتي الشخصية و المعلومات اللي قريتها في كتب الاطفال يمكن افيد أم جديدة تانية و ارحمها من نصايح كل الناس اللي ناسيين كل حاجة و مع ذلك ما بيبطلوش نصايح و إبداء أراء علي الفاضية و المليانة لحد ما تحسي ان مفيش اي حاجة بعملها صح و البنت لسه عايشه بستر ربنا.

و بكده أقدر أقول بسم الله الرحمن الرحيم و ابتدي تدوين...  

جاتها نيلة اللي عايزة خلف

لو لسه ام جديدة طازة ... لسه مخلفه ... لسه تعبانة نفسيا و جسمانيا من الحمل و الولادة .. بتحبي ابنك أو بنتك جدا لكن مش قادرة تحسي بمشاعر الامومة اللي صدعونا بها طول عمرنا و حاسة انك مش طبيعية ... فأهلا و سهلا بك

لو بتكرهي لحظة ما تصحي من احلاها نومة علي صوت منبه اللي بيفكرك بمعاد الرضاعة أو أسوأ علي صوت عياط البيبي ... لو اتعمل عليكي و عالكنبة تواليت و كل اللي حواليك ضحكوا في سعادة مطمئنين علي جهاز اليبي الهضمي و انت الوحيدة اللي كشرتي عشان حاملة هم تنضيف الكنبة و الحمام اللي معندكيش وقت تاخديه ... فهو دا المكان اللي بتدوري عليه

لو كل اللي حواليك فرحانين و انت الوحيدة اللي بتعاني من المشاعر السلبية من أول احساسك ان دورك في الحياة ميزدش عن دور البقرة الحلوب مرورا بتغميض عينيك متمنىة ان كل دا يختفي لحد ما توصلي للحظات- وسط الصراخ المتواصل- بتتخيلي فيها انك بترمي بنتك من الشباك و بتضربي نفسك بالنار ... فأحنا الناس اللي لازم تتكلمي معاهم

لو مفيش حاجة بتهون عليكي كل دا غير لما تشوفي ضحكة بنتك و هي شبعانة و بتبص لك و عارفاكي انت بس انت كل العالم بالنسبة لها ... لما بتشوفي فرحة ابوها و جدودها بها و ان انت  سبب من أسباب الفرحة دي .. لما كل يوم بيفرق عن اليوم اللي قبله في نموها واستجابتها للعالم حولها ... يبقي انت كدة بقيتي أم .....