كف عروسة

و بمناسبة التمثيل الرخيص اللي اتكلمت عنه الأسبوع اللي فات, كوكو بتبهرني بإهتمامها المفاجئ باللعب بالعرايس ماشي انا عارفة ان دا طبيعي جدا و كل الأطفال كدة بس حتي لو طبيعي مايمنعش انه منظر جميل جداً ومبهر ازاي اللي كانت حتة لحمة حمرا في ايدي بقت دلوقتي بتعمل تمثليات مع العرايس النونو آيه و النونو هابي والنونو خالتو.. أنا بسيب كوكو هي اللي تسمي عرايسها بتسميهم علي أسامي من تحبهم .. فيه فترة كدة كانت كوكو عشان تاكل لازم انصب السيرك واحط قدامها 35 عروسة اكلهم كلهم بالمعلقة و انا بقول نم نم نم نم و هي اخر واحدة فيهم تاكل و آه يا ويلي بقي لو فوِت ولا طنشت عروسة منهم اعديهم كلهم من الأول عقاباً لي 

بعد كدة تطور اللعب و بقت هي اللي بتأكلهم بنفسها وتحميهم وجابت بامبرز من ايام ما قبل التواليت و بقت بتغير لهم وتفسحهم في العربية وهي لابسة شنطتي وجذمتي ونضارتي الشمس علي البيجاما عادي جدا ولا اي اندهاش, من المشاهد المبهجة في البيت وكوكو بتسلي نفسها باللعب والتمثيل بعد ما كانت كائن غير قادر علي تسلية نفسه بأي شئ في الحياة من غير الاعتماد علي الرضاعة أو الهز أو الشيل أو اني اعملها قرد أو مهرج سيرك كبرت وبقت زقرد صغير بيلعب ويعيش في التمثليات. قلب الأم بيتأثر والدمعة حتفر من عيني ياخوانا أخيراً بدأت بشاير عتق رقبتي من الرق 

كل فترة كدة لما أحس اني بضيَع وقت علي الفيس أقوم داخلة علي جوجل اكتب toddlers  و اعمل بحث, طلع لي عن اهمية لعب الأولاد والبنات في سن كوكو بالعرايس وكانت مقالة جميلة ملخصها ان اللي كوكو بتعمله بالفطرة هو وسيلة طبيعية للتعلم وضروري اشجعها, بما ان الأطفال في سن كوكو بيكتسبوا لكل خبراتهم وبيتعلموا باللعب فاللعب بالعرايس من أهم الطرق للتعلم وتحسين الذاكرة و الخيال عند الأطفال,  والقاعدة الذهبية في عملية تعليم الأطفال هي المحاكاه, ومفيش أحسن من محاكاة الأطفال لحياتهم واللي بيشوفوه والخبرات اللي بيكتسبوها من الحضانة والبيت والأهل عن طريق اللعب بالعرايس 

المقالة كمان اتكلمت عن أهمية لعب الأولاد للعرايس, لأن كوكو طلعت بنت فكان التقليدي لها أي لعب تيجي لها هدية تكون عروسة بس العرايس للأولاد في سن ما قبل المدرسة بنفس الأهمية للبنات لأن المسألة في النهاية تعليم وتحسين ذاكرة بأسلوب معين مالهاش دعوة بالتفكير التقليدي بتاع ان البنت يجيي لها عروسة والولد يجيي له عربية, اعترف اني كنت لما بجيب هدايا لأولاد علي طول نظري بيتجه للعربيات مش عارفة ازاي حقنع أي أم معرفة اني بخدم ابنها لما أجيب له عروسة بعربيتها عشان يفسحها في البيت ههه حيبقي مشهد يستحق التسجيل إما بإعتباري مجنونة أو بخيلة جدا لدرجة اني استخصرت أجيب هدية للولد و جبت حاجة زايدة من عند كوكو أو اني عايزة أطلع الولد مش طبيعي ههههه و ابقوا سلمولي بقي علي الطب النفسي وتطور سلوكيات الأطفال 

المقالة بتقول ان اللعب بالعرايس ممكن يبدأ بالشكل البسيط زي بتاع كوكو اللي بتصمم ان العروسة تاكل معاها المم من سن 18 شهر لكن التمثليات الحقيقية بتبدأ علي سن السنتين ودا معناه ان كوكو اتأخرت في اكتشاف عالم التمثليات 5 أو 6 شهور وبعد كدة الموضوع حيبدأ يتطور لتقسيم أدوار ان عروسة تلعب دور ماما أو بابا و هي دور فلانة علي سن تلات سنين, حيبقي مشهد ممتع خصوصا لما اعرف ماما من وجهة نظرها ايه وشايفاني ازاي قبل ما تتعلم تداري افكارها هههههاااي استر يا رب و ما اتصدمش في رأيها فيَ

المصدر :  http://onelovelivity.com/childofnatureblog/importance-of-doll-play-for-b...

التمثيل الرخيص

مبحبش الجو لما يغيِم, أبقي نازلة من البيت أنا وكوكو كلنا إشراق وتفاؤل باليوم الجديد ونلاقي مفيش شمس علي طول قلبي بينقبض وقد كان, فعلاً بعدها ب3 ساعات كلموني من الحضانة إن كوكو في حالة من القريفة والعياط و هم خلاص مش عارفين يعملوا معاها ايه, هو أنا بكره الشتا من شوية ؟؟؟ 

 من ساعة حادثة الحضانة وأنا نفسيتي زي الزفت وخوفي من إن يكون حصل حاجة في الحضانة زعلتها ومبقاش المكان دا بالنسبة لها الفسحة الحلوة اللي بتطلبها كل يوم وتتبخر معاها كل أحلامي ومجهوداتي الحثيثة في الشغل. قعدت بيها النهاردة في البيت لحد ما اشوف الوضع حيرسي علي ايه و حتطلب النونو تاني أمتي, إلي ذلك الحين وعشان مغمش نفسي أغمكم معايا أكتر من كدة خليني أحكي لكم عن كوكو و التمثيل الرخيص 

التمثيل الرخيص عند كوكو أسلوب حياة, لما أقرب ناحيتها بمقص الضوافر تجري علي باباها و تنط في حضنه و تقول أي أي أي و هي مغطية وشها بإيديها.. آه يا نصابة ! هو انا قربت لك لسه؟ شرحه مأساة كل ثلاث ساعات مع تسريح الشعر و لمه بالتوك, نفس الفيلم الهندي الرخيص " أياح أي أياح أي" قبل ما الفرشاة أصلا تلمس شعرها. 

اكتشفت في درج المطبخ موبايل من عصر الشباشب الأبيض و أسود دول معرفش جه منين أديته لكوكو, مكتفتش بكدة صممت اديلها معاه سماعة وشاحن! سرقنا سماعة من عند جدتها و شاحن نوكيا قديم ولازم كل يوم كوكو تخليني أشحن الموبايل عشان تعمل مكالمات مهمة جدا للقطة نِونِو ولهابي وآيه وخالتو وكل أفراد العيلة نفر نفر. انهماك كوكو في المكالمات ساعات بيشككني في نفسي مع اني متأكدة من مفيش شريحة  في الموبايل. بس الجدية في "الو .. ني.. هابي.. هاتي قطة .. لأ اه تحت .. بو .. بون بون.. تيش " الموضوع كبير اوي ومعقد زي ما كلنا سامعين والأجمد بقي هي قفلة المكالمة باي وترزع السماعة أو تتك جامد علي الزرار قال بقي يعني البت شخصيتها قوية و بتقفل المكالمة بحزم. 

كوكو بتطلع كل عقدها النفسية  ورفضها المكبوت لسلطاتي العلوية في النونو آية و بقية العرايس اللي عندها, من أول انها تأكلهم بالعافية و تحميهم و تسرح لهم شعرهم وتقلعهم هدومهم وتشخبط علي وشهم و ايديهم بالقلم كل دا وهي بتكلمني بحزم "نونو آيه نامي ننه ".. وتزعق لآيه نامي نامي... هههه واضح اني مش مثال للأم الحنون اللي ممكن يُحتذي به 

عشق كوكو للأدوية فاق الأفاق كل ما تلمح دوا في التلاجة ولا في أي حته تكح بمنتهي الرخص وتمسك زورها وتجس قورتها وتقعد تمثل كح ككح اه اه اه اوف اوف عندي اوف ماما نهي عندي اوف,  نفس أسلوب أمينة رزق في تصنع الأزمة القلبية لما نكون في الشارع وعايزة تتشال أوبح ,تقف فجأة في الشارع وما ترضاش تمشي وحجتها بقي " آه آه اووف اووف أي عايزة اوبح " 

وأخيراً وليس أخراً لما أرفض لها طلب بتركب الفيل البرتقالي البلاستيك وتمشي بيه في الشقة وهي بتمثل انها بتعيط , حد يركب فيل ويعيط ؟؟ منظر كوميدي جداً, ابديت أفكر جدياً اتعلم مبادئ التصوير عشان حرام المشاهد الكوميدية دي تضيع من غير ما تتسجل عايزة ألحق اسجلها قبل ما كوكو تخش المدرسة وتعرف إن اللي بتعمله دا تمثيل رخيص وتتعلم التمثيل اللي بجد 

النوم علي الطريقة الكوكوية

علي الهامش: التدوينة دي حتتنشر يوم الفالانتين, طبعاً موقف أبو كوكو من الفالانتين معروف سلفاً اليوم دا يمثل له ما يمثله العيد القومي لمحافظة المنوفية لأي مواطن قاهري. فالنسبة للي بيحتفلوا بيه كل سنة وانتم طيبين يومكم جميل وهدايا لطيفة, أما بقي للي زي حالاتي فإلي جنة الخلد بإذن الله 

نرجع للعرفكوش الصغير, من يوم ولادة كوكو وأنا عملت كل الأخظاء المهنية اللي من شأنها تربي في كوكو أسوأ عادات نوم. من أول نوم علي الرضاعة , نوم علي الهز نوم بالطبطبة نوم و انا بتمشي بيها نوم برة البيت نوم الضهر, كل شئ ممكن تخيُله طمعاً في نص ساعة زيادة أنامها دفعت تمنها ليال من السهر واللطم. أي أم جديدة مكسلة تعود ابنها علي النوم بطريقة صحيحة ومستصعبة الموضوع بقولها "أعمل الصح يا حزلقوم" متكسليش حتتعبي كام يوم في الأول وترتاحي بعدين. 

عرفت أمهات بشريات مش من كواكب أخري يعني قدروا يعودوا ولادهم من وهم لسه بيرضعوا علي النوم لوحدهم بطريقة ال Cry It Out  يعني تحط البيبي في السرير بتاعه بعد حضن وبوسة وتطلع برة تسيبوه يعيط 3 دقايق وترجع تدخل له تاني تطبطب وتبوس وتسيبه وهكذا لحد ما يعرف ازاي ينام لوحده! اه والله حصل. الكتب و الأمهات اللي نجحوا بالطريقة دي بيقولوا ان الموضوع بياخد في الأول بالكتير اوي 20 دقيقة وبعدها المدة  تقل, أنا فاكرة اني مرة جربت مع كوكو الطريقة دي وأنا يائسة عاجزة عن النوم قدرت تعيط من 11 بليل ل5 الفجر متواصل بلا أي انقطاع, طبعاً مجربتش تاني مش بمزاجي لكن عشان أبو كوكو و الجيران باسوا ايدي معملش كدة تاني, عيب يا نهنوش كدة الناس وراها مصالح برضه 

المهم بقي بعد كل  المآسي الإنسانية فيما المتعلقة بنوم كوكو أخيراً بعد الفطام بقت بتعرف تنام –نوعاً ما- لوحدها مرينا بمرحلة الطبطبة ومرحلة النوم علي الأغاني ومرحلة النوم علي الصلاة علي النبي ومرحلة ان هي اللي تفضل تطبطب عليَ لحد ما تنام, لحد أخيراً في يوم من ذات الأيام رقدت جنبها في هدوء لقيتها استكانت و نامت من غير أي مساعدات خارجية, احنا بقينا بني ادمين ولا ايه يا حالولي يا حالولي. 

عودة لسردي قائمة العادات السيئة في النوم حالياً كوكو متعودة عشان تنام اني لازم ارقد جنبها, ساعات تحضني و ساعات تحضن النونو آية المهم اني راقدة جنبها في هدوء لحد ما تروح في النوم. من كل الحاجات الغلط اللي بعملها دي أجمل عادة سيئة عملتها مع كوكو, فيه اجمل من 10-15 دقيقة في هدوء وكوكو حاضناني ومتدفيين تحت البطاطين, اللحظات دي باليوم كله وبنسي فيها الزن والقرف والمناهدة في الأكل والمواصلات والفراخ اللي غليت والناس المكشرة واحباطاتي اليومية وقنابل الغاز و و و... كل دا بنساه في العشر دقايق اللي كوكو بتحضني فيهم في هدوء وتستكين في السرير. قوة الأطفال المذهلة في اجبارك علي إدمان وجودهم, بستني العشر دقايق الأخيرة في يوم كوكو من ساعة ما أصحيها زي قدرتهم علي التسامح والنسيان, مفيش مرة اتعصبت فيها علي كوكو بحق أو بدون إلا وبعدها بعشر دقايق تكون نسيت تماماً وتبوسني عادي علي عكسي أنا اللي فاكرة كل القرف اللي وريتهولي من ساعة ما أتولدت إلي يومنا هذا, أنا عارفة أنا قلبي أصلا كاروهات أسود في كحلي و مبنساش أي حاجة, بس برضه ببوسها أنا كمان  

الزقرد المتطور

أول مرة أقرأ كلمة "Growth Spurt " كانت وكوكو في اسبوعها التالت فجأة لقيت نفسي برضعها بلا توقف وانا نايمة وانا باكل وانا في الحمام, مارثون الرضاعة وليترات من العصير يلحقوني بيها قبل ما اسخسخ, مكنتش فاهمة هو في ايه؟ علي 6 الصبح كدة بعد ما ماما مونتني بالعصير ودخلت تنام بدأت ادور بإيد واحدة علي الايباد هل أنا خلفت وحش اسطوري ولا لبني بقي قليل فلقيت ان الاجابة لا دي ولا دي وإن ببساطة كوكو تمر بما يُسمي ب"طفرة نمو"

عرفت إن طفرات النمو دا في السنة الأولي كوكو حتمر بيها حوالي خمس مرات المرة الأولي في الأسبوع الثالت والتاينة في الأسبوع السادس والباقيين في الشهر الثالت والسادس والتاسع علي التوالي, بس أنا مكنتش بحس بطفرات النمو دا لأن كوكو نموها طولي مش عرضي, أنا ازعم ان لبسها وهي 6شهور ممكن يدخل فيها دلوقتي وهي سنتين ونص بس حيبقي واصل لنص بطنها احنا بنطول بس وأنا مخلفة تقريبا باليرينا (أو برص علي رأي معظم اللي بيشفوها قالعة) 

من أسباب اكتئابي الحاد في السنة الأولي اني مكنتش بتعامل مع كوكو علي انها انسانة لها حق ورأي وشخصية, حتة اللحمة الحمرا تفرض مزاجها ونومها والبوبو بتاعها عليَ بأمارة ايه ان شاء الله؟ بس لقيت إن عشان أتقبل وضعي لازم أقتنع انها بني أدمة ولها شخصية, اه طبعا ابنك علي ما تربيه بس ابنك دا انسان لازم أحترم ادميته مش اتعامل معاه انه يتحط في أي حتة, السمو الأخلاقي اللي وصلت له دا لأن ببساطة كوكو رفضت انها مطرح ما تنحط تقعد ودعواتي لربنا انها لا تاخد مناخيري ولا شخصيتي الضعيفة أُستجيبت في موضوع الشخصية بس 

مش فاكرة أمتي أول مرة حسيت فيها انها بني ادم زيها زيي بس غالبا بعد ما مشيت, من وقت ما مشيت وأنا بتعامل معاها علي إنها كبيرة زينا لها رأي يؤخذ بيه, بعد الفطام بالذات كان رأيها بيتاخد في كل تفاصيل أكلها وفسحها. من وقتها ابتديت أكبرها واعمل لها حساب. يمكن زي ما كنت أوفر في تجاهل طلباتها في السنة الأولي, بقيت أوفر في اكبارها واني اديها وضع ورأي بعد الفطام كتير كنت بسمع تعليقات " انت عاملاها بني ادمة ولها رأي؟" "هي الزقردة دي كمان حتتكلم" "يا سلام وكمان الهانم بتنقي" إلي أخر كل هذه التعليقات اللي أوقات بشوفها منطقية جدا لما كوكو تقفش انها مش حتشرب العصير غير بالشاليموه الأزرقة أو انها مش عايزة تلبس الفستان عشان تلبس الحزام أو البلوزة الصيفي اللي عليها قطة واحنا في ديسمبر! 

بعد السنة الأولي مابقيتش احس بطفرات نمو فجائية زي الأول تنام وتصحي الأقي البيجاما قصرت عليها في ليلة, بس اللي لاحظته ان دايماً فيه طفرة نمو عقلي وسلوكي كل ست شهور. شهر فبراير وأغسطس دايما مليانين بالمفاجأت, امبارح كوكو فجأتني لأول مرة من ساعة ما اتولدت تقبلها انها تقعد مع باباها لحد ما أنزل باي لدكتور الأسنان وأرجع اوديها النادي, عادي لبست قدامها وقفلت الباب ورايا مسمعتش الصريخ المعتاد. مش عارفة الصراحة إن كانت دي صدفة لن تتكرر ولا طفرة نمو فبراير بعد إتمامها سنتين ونص, روحت البيت بعد ما باباها اللي اترجاني أرجع بسرعة لقيتها هي اللي بتطلب تستحمي! بعد ما كان ال" أمح لأ أمح لأ" و نجري ورا بعض في الشقة كوكو عايزة تستحمي! انت بنتي ؟ هو أنا قابلتك قبل كدة ؟؟ 

كوكو استحمت وأخيرا استجابت لطلبي أنها ترجع راسها لورا عشان الشامبو مايجييش علي عنيها و ليَفت نفسها وطلعت طلبت تحط علي جسمها زيت جزنسون و اتنشفت وطلبت تسشوَر شعرها ! هاتولي سيشوار وجابولك سيشوار يا كوكو ؟ جابولي شيسوار وقعدت تسشوَر في كل الاتجاهات إلا راسها و أنا بضرب كف علي كف ولسان حالي " إنت فاكرة نفسك بني أدمة ولا ايه؟" 

الضرب هو الحل

فلتذهب التربية الايجابية إلي الجحيم يلا بينا نرن العيال عٌلق, ايوة بقي فين تراثنا الجميل بتاع نكد علي الطفل ينام واكسر للبنت ضلع يطلع لها اربعة و عشرين,  متوقعة أسمع كتير من ال "أوووه نووو" "وعمر الضرب ما جاب نتيجة" والكلام دا,اعتبروا التدوينة دي فضفضة أو تنفيس بدل ما اتجنن لأن كدة سو اوفر اوفر اوفر

بصراحة أنا زهقت, هو يوم من نوعية الأيام اللي بصحي فيها أصلا مخنوقة من الحياة عامةً فتٌتوَج الخنقة دي برفض الأكل وعدم سمعان الكلام والدخول في دايرة مغلقة من الزن والزن علي الزن اللي قبله
أنا عارفة كسر الدائرة المغلقة محتاج تدخل مني أنا الكبيرة العاقلة مش من عقل عمره سنتين ونصف بس زي ما قلت هو يوم من تلك الأيام اللي الواحد معندوش أي طاقة ايجابية يكسر بيها الصاروخ السلبي اللي انفجر في البيت, الحل كان لازم يبقي تدخل أجنبي متمثل في أبو كوكو يفصل فيها بين قوات المعركة ويمنع تصاعد العنف المتمثل في كوكو اللي بدأت تضربني وتشد شعري. إنها تلك الغريزة بنت ال*** اللي مخلية كوكو مش طايقاني وتصرخ علي فراقي .. علاقة أم\بنتها مش ضروري تكون علاقة بمبي ساعات بتبقي "It’s complicated"

الفكرة ان التربية الإيجابية دي عاملة زي ما تكوني ماشية علي حبل رفيع ومطلوب منك تعملي شقلبظات, أنا بحب الشقلبظات وبحب الحياة تديني أحسن ما فيها وأدي عيلتي ونفسي أحسن ما عندي بس النهاردة زهقت من الشقلبظة بقي عايزة أريح بقي مش عايزة أفكر كتير ,التربية الإيجابية بتطالبني أدي كوكو إحساس بالاستقلالية وأخيَرها في الأكل بس في نفس الوقت تاكل أكل صحي وأبقي بشكل ما مسيطرة عليه طب ما الاستقلالية دي خليتها تتأمر و تبقي متعبة وماتاكلش اللي قدامها وهي ساكتة, زهقت من إني بحاول أفسحها كل يوم عشان تتشمس وتنطلق بس في نفس الوقت دا بقي مطلب يومي وحق مكتسب واجب عليَ مش بمزاجي, زهقت من إني عشان اخليها تجرب حاجات جديدة النتيجة بتبقي زن عشان دا يتكرر كل يوم أو كل ساعة, هو أنا برفع سقف توقعاتها لمستوي أنا مش حمله طب أعمل ايه يا بنتي يعني أحبسك في البيت وأسيبك تاكلي أي كلام و أسيبك تنامي وتصحي علي مزاجك و أديكي حلويات عمال علي بطال عشان أريح دماغي و نبطل زن؟ لما أبقي عارفة انها ميتة من الجوع ومش راضية تاكل الفطار اللي عملته لها وعارفة انها بتحبه غتاتة كدة بيبقي الضرب ساعتها حل مغري جداً, حتقلولي سبيها لحد ما تجوع و تاكل , طب ما هي جعانة جداً وداخلت في أعراض الجوع اللي بيرفض الأكل و بدأ في الزن الهستيري, هي عايزة أكلة معينة مش حينفع أعملها فيلا بينا نزن حتي نموت جميعاً

و يزيد علي كل الزهق اللي فات اني عارفة ان أنا السبب بصحياني من النوم مكتئبة وإن موودي بيأثر علي موودها وسلوكها,الكلام دا أكده لي مناقشتي مرة مع مهندسة صوت كانت بتتكلم علي تأثير الصوت علي الرضع والأطفال, فسألتها عن التفسير العلمي –بغض النظر عن البركة اللي في الموضوع طبعاً- لحب كوكو في النوم علي التسبيح وغٌنايا لأشعار متصوفة وعدم استجابتها لي لما أغني لها أغاني هدهدة أو أغاني أطفال عادية مع العلم إن صوتي كارثي في الحالتين , أنا الساوند ميتر اللي بيقيسوا عليه وحاشة الصوت. فقالت لي ان الأطفال عموما بيرتاحوا نفسيا للتكرار ونبرة الصوت ذات التردد المنخفض وفي نفس الوقت أنا أكيد لما بسبح أو بصلي علي النبي بهدي فهدوئي بيوصلها وبتهدي هي كمان ... من الآخر كدة It’s not Her It’s Me و مطلوب مني أبقي هادية وإيجابية 24\7 ... فين الابتسامة الحلوة ؟اهي يا جو اهيه